កំពង់ធំ៖ ឯកឧត្តម ហង្ស ច័ន្ទវរៈ ជំនួយការសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃ​ព្រះរាជាណា​ចក្រកម្ពុជា បានលើកឡើងពីសារសំខាន់នៃ​ការអាន​សៀវភៅជាប្រចាំ និងបានលើកទឹកចិត្តដល់ប្រជាជនគ្រប់វ័យឱ្យយកចិត្តទុក​ដាក់​លើ​ការសៀវភៅ ព្រោះការអានបានផ្សាភ្ជាប់ជាមួយជីវិតរស់នៅ។

ក្នុងពិធីសំណេះសំណាល និងចែកជូនសៀវភៅសីលរតនៈ ជាធម្មទាន​ដ៏មានតម្លៃពី​សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុនី ហ៊ុន ម៉ាណែត ដល់លោកគ្រូ អ្នកគ្រូ និងក្រុមគ្រូពេទ្យជាង៣៥០នាក់នៅ ក្នុង​ក្រុងស្ទឹងសែន ខេត្ត​កំពង់ធំ​កាលពីថ្ងៃទី២ ខែកក្កដា ឆ្នាំ២០២៥ នៅសាលប្រជុំសាលាខេត្តកំពង់ធំ​ឯកឧត្តម ហង្ស ច័ន្ទវរៈបាន​​បន្ត​ថា ការអានសៀវភៅជារៀងរាល់ថ្ងៃ ប្រៀបដូចជា​ការដាក់ជីឱ្យខួរក្បាល។ជាការបណ្ដុះពុទ្ធិ។សៀវភៅ​ជួយសម្អាតគំនិត បង្កើន​សមត្ថភាពវិភាគ និងជាផ្លូវឆ្ពោះទៅរកភាពជោគជ័យនានា។

ឯកឧត្តម ហង្ស ច័ន្ទវរៈ បានបញ្ជាក់ថាការអានជួយឱ្យមនុស្សមានទំនាក់ទំនងល្អ ។ជួយបង្កើនសមត្ថភាព។​យល់​ចិត្តអ្នកដទៃ ។បង្កើតសមត្ថភាពនៃការដោះស្រាយបញ្ហា និងបង្កើនការយល់ដឹងអំពីវប្បធម៌ សេដ្ឋកិច្ច នយោបាយ និងសង្គម។ទោះបីជា​ចូលចិត្តអានឬមិនចូលចិត្តក៏ដោយ គួរតែប្រើប្រាស់​ពេលវេលាផ្ទាល់ខ្លួន​សម្រាប់ការអាន៕

ដោយ៖​ប៊ុន​រដ្ឋា