ឧបនាយករដ្ឋមន្រ្តី ស៊ុន ចាន់ថុល អញ្ជើញពិនិត្យផ្ទៀងផ្ទាត់និយាមកានិងបោះបង្គោលព្រំដីជានិមិត្តរូប សម្រាប់គម្រោងព្រែកជីកហ្វូណន តេជោ កំណាត់ទី២
កំពត៖ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការនិងដឹកជញ្ជូន ជាប្រធានលេខាធិការដ្ឋានគណ:កម្មការពិសេសនៅចុងសប្ដាហ៍នេះបានអមដំណើរ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាអនុប្រធានប្រចាំការគណៈ:កម្មការពិសេសដើម្បីជំរុញការអនុវត្ត គម្រោងព្រែកជីកហ្វូណន តេជោ បានអញ្ជើញចុះផ្ទៀងផ្ទាត់និយាមកានិងបោះបង្គោលព្រំដីតាមបណ្តោយព្រែកជីកហ្វូណនតេជោ និងពិនិត្យទីតាំងសាងសង់ ហេដ្ឋារចនាសម្ព័ន្ធគាំទ្រសម្រាប់គម្រោង ព្រែកជីកហ្វូណនតេជោ ក្នុងភូមិសាស្ត្រខេត្តកំពតនិងខេត្តកែប។
គិតមកដល់បច្ចុប្បន្ន ក្រុមការងារបានបន្តចុះពិនិត្យផ្ទៀងផ្ទាត់និយាមកា និងបោះបង្គោលដី ជានិមិត្តរូប សម្រាប់គម្រោងព្រែកជីកហ្វូណនតេជោ កំណាត់ទី២ក្នុងខេត្តកំពតនិងកែប ខណៈកំណាត់ទី១ក្នុងខេត្តកណ្តាលនិងតាកែវ សម្រេចបាន១០០ភាគរយហើយ។
សូមជម្រាបថា គម្រោងព្រែកជីកហ្វូណនមានប្រវែងប្រមាណ១៨០គីឡូម៉ែត្រ និងឆ្លងកាត់ខេត្តចំនួនបួន។គម្រោងនេះបានប្រារព្ធបើកការដ្ឋាននៅថ្ងៃទី៥ ខែសីហា ឆ្នាំ២០២៤៕
ដោយ៖ សិលា សារិន
