ព្រះសង្ឃ និងពុទ្ធបរិស័ទនៅវត្តដំណាក់ ប្រារព្ធអាសាឍបូជាឬអាសាឡ្ហាបូជា និងចូលព្រះវស្សា
សៀមរាប៖ នៅក្រុងសៀមរាបនារសៀលថ្ងៃទី១០ ខែកក្កដា ឆ្នាំ២០២៥ ត្រូវនឹងថ្ងៃ១៥កើត ខែអាសាឍ ឆ្នាំម្សាញ់ សប្ដស័ក ព.ស.២៥៦៩ ព្រះសង្ឃ អាចារ្យគណៈកម្មការវត្តដំណាក់ និងបរិស័ទជិតឆ្ងាយបានរៀបចំពិធីបុណ្យអាសាឍបូជា ឬ អាសាឡ្ហបូជា រួមជាមួយពិធីចូលព្រះវស្សាផង ដោយមានការនិមន្ត ការដើរព្យុហយាត្រាជាផ្លូវការនៅក្នុងក្រុងសៀមរាប ដូចបែបបុណ្យមាឃបូជា និងវិសាខបូជា។នេះជាកម្មវិធីដំបូងបង្អស់ក្នុងព្រះរាជាណាចក្រកម្ពុជា។
ព្រះគ្រូធម្មវិសុទ្ធិរង្សី ឡាច ចន្ថា ចៅអធិការវត្តដំណាក់មានថេរដីកាថា កន្លងមកវត្តដំណាក់បានជោគជ័យក្នុងការរៀបចំបុណ្យពុទ្ធធម៌ធំៗ ដូចជា វិសាខបូជា និងមាឃបូជាដោយមានការចូលរួមយ៉ាងច្រើនកុះករពីព្រះសង្ឃ ពុទ្ធបរិស័ទជិត
ឆ្ងាយ។ចំណែកការរៀបចំកម្មវិធីអាសាឍបូជាឬអាសាឡ្ហបូជា លើកនេះ គឺដើម្បីផ្សព្វផ្សាយឱ្យពុទ្ធបរិស័ទជាតិខ្មែរបានស្គាល់ និងចូលរួមក្នុងបុណ្យនេះ។
សូមជម្រាបថា នៅក្នុងសម័យពុទ្ធកាលមានហេតុការណ៍សំខាន់កើតឡើង៤ប្រការប្រារព្ធដល់អាសាឍបូជា ឬអាសាឡ្ហបូជា ជាថ្ងៃពេញបូណ៌មី ១៥ កើតខែអាសាឍ ក្នុងហេតុសំខាន់៤យ៉ាងគឺ ៖១. ថ្ងៃព្រះពោធិសត្វចុះកាន់គក៌នៃព្រះមាតា, ២. ថ្ងៃព្រះអង្គចេញសាងមហាភិនេស្ក្រមណ៍,៣. ថ្ងៃទ្រង់សម្តែងធម្មចក្កប្បវត្តនសូត្រនិង៤. ថ្ងៃទ្រង់សម្តែងយមកប្បាដិហារ្យ ។
ព្រះគ្រូធម្មវិសុទ្ធិរង្សី មានថេរដីកាទៀតថា ក្រៅពីនេះថ្ងៃ១៥កើតខែអាសាឍ ក៏ជាថ្ងៃធ្វើបុណ្យប្រគេនភត្ត និងសំពត់ងូតទឹកផងដែរ។ពិធីចូលព្រះវស្សា ត្រូវបានចាប់ផ្ដើមនៅល្ងាចថ្ងៃទី១៥កើត ខែអាសាឍ។ បងប្អូនពុទ្ធបរិស័ទ បាននាំគ្នាហែទៀនវស្សា សាដក សំពត់ និងសម្ភារៈផ្សេងៗ ជុំវិញព្រះវិហារ បន្ទាប់មកស្តាប់ធម៌ និងវេរទៀនវស្សាប្រគេនព្រះសង្ឃ។
នៅព្រឹកថ្ងៃទី ១រោច ខែអាសាឍ មានការប្រគេនយាគូនិងបង្អែមដល់ព្រះសង្ឃ។ រយៈពេល ៣ខែជាប់ៗគ្នា ដែលហៅថា ព្រះវស្សា ក៏ជាឱកាសសម្រាប់សង្ឃបន្តសិក្សាធម៌ និងសិក្សាវិន័យយ៉ាងខ្ជាប់ខ្ជួន។ទៀនព្រះវស្សាត្រូវបានដុតបំភ្លឺរយៈពេលបីខែដើម្បីប្រើប្រាស់ក្នុងព្រះវិហារពេលយប់ផងដែរ៕
ដោយ៖ប៊ុនរដ្ឋា
