ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រធាន​ព្រឹទ្ធសភានៃព្រះរាជាណាចក្រកម្ពុជា បានអនុញ្ញាតឱ្យ លោក​ជំទាវ Ar. Siti Rozaimeriyanty Dato Haji Abdul Rahman អគ្គលេខាធិការអន្តរសភាអាស៊ាន និងសហការី ចូលជួបសម្ដែងការគួរសមនៅវិមានព្រឹទ្ធសភា រាជធានីភ្នំពេញ នាល្ងាចថ្ងៃទី១៦ ខែកក្កដា ឆ្នាំ២០២៥ ។

ក្នុងឱកាសនេះសម្ដេចតេជោ ហ៊ុន សែន បានសម្តែងនូវការ​ស្វាគមន៍យ៉ាងកក់ក្តៅចំពោះលោកជំទាវអគ្គលេខាធិការអន្តរ​សភា​អាស៊ាន ក្នុងឱកាសដែលលោកជំទាវចូលរួមកិច្ច​ប្រជុំ​អន្តរសភាអាស៊ាន (AIPA) នៅកម្ពុជាដែលធ្វើជាម្ចាស់ផ្ទះ នាពេលនេះ និងបានស្នើសុំលោកជំទាវបន្តចែក​រំលែក​បទពិសោធន៍ដល់ កម្ពុជា ដែលនឹងបំពេញតួនាទីជា​អគ្គ​លេខា​ធិការ AIPA ប្តូរវេនបន្តពីលោកជំទាវនាពេលខាង​មុខ​នេះ​ផងដែរ។

ជម្រាបជូនសម្ដេចតេជោ ហ៊ុន សែន, លោកជំទាវបានវាយ​តម្លៃខ្ពស់ និងអរគុណចំពោះបដិសណ្ឋារកិច្ចយ៉ាងកក់ក្តៅ​របស់​រដ្ឋសភាកម្ពុជា។ លោកជំទាវ បានសម្តែងនូវការដឹងគុណ​ចំពោះ​ការគាំទ្រ និងការណែនាំរបស់សម្តេចតេជោនាពេល​កន្លងមកចាប់​តាំងពីពេលដែលលោកជំទាវចូលកាន់តំណែងជាអគ្គលេខាធិការអន្តរសភាអាស៊ាននៅឆ្នាំ២០២២។
លោក​ជំទាវបានកត់សម្គាល់ជាវិជ្ជមាននូវកិច្ចពិភាក្សា គំនិតផ្តួច​ផ្តើម​ល្អៗ​ជាច្រើន ជាពិសេសគំនិតផ្តួចផ្តើមរបស់កម្ពុជា​ស្តីពី​បណ្ណាល័យឌីជីថលអំពីច្បាប់ ដែលបាននិងកំពុងផ្តល់អត្ថ​ប្រយោជន៍​​​ដល់ប្រជាជនកម្ពុជាផង និងអាស៊ានផង។

លោកជំទាវបានគូសរំលេចថា ដោយផ្អែកលើបទពិសោធ​ល្អរបស់កម្ពុជានេះ កាលពីខែមិថុនា ឆ្នាំ២០២៤ កន្លងទៅនេះ AIPA បានសម្ពោធ AIPA LYNC ដែលជាបណ្ណាល័យឌីជីថល រួមមានឯកសារច្បាប់ពីបណ្តាប្រទេសជាសមាជិកអាស៊ាន និងដែលមានអ្នកចូលប្រើប្រាស់រហូតដល់ជិតបីសែននាក់។

លោកជំទាវអគ្គលេខាធិការក៏បានថ្លែងអំណរគុណ និងកោត​សរសើរគំរូវីរភាពរបស់សម្តេចតេជោ ដែលបានចែករំលែកនា​ឱកាស​កិច្ចប្រជុំពេញអង្គសភាអន្តរជាតិដើម្បីភាព​អត់ឱន​និង​សន្តិភាពលើកទី១១ (IPTP) និង មហាសន្និបាតសន្និសីទ​អន្តរជាតិនៃបណ្តាគណបក្សនយោបាយនៅអាស៊ីលើកទី១២ (ICAPP) ជាពិសេសប្រវត្តិតស៊ូរបស់សម្តេច និងធម្មនុញ្ញ​សន្តិភាព​សកលរបស់សម្តេច។ប្រវត្តិសាស្រ្ត និងការ​តស៊ូរបស់សម្តេច នៅតែស្ថិតក្នុងការចងចាំរបស់លោកជំទាវ ហើយនេះ ជាមេរៀនសម្រាប់ការកសាងសន្តិភាព និងសុខដុមរមនាសំខាន់សម្រាប់អាស៊ាន។

លោកជំទាវអគ្គលេខាធិការ បានសម្តែងនូវអំណរអរគុណ និងការសាទរចំពោះគំនិតផ្តួចផ្តើម វេទិកាថ្នាក់ដឹកនាំ AIPA, AIPA Caucus និងកម្មវិធី AIPA Roadshow ដែលមាន​និស្សិតប្រមាណ ៤០០នាក់ រង់ចាំសួរសំណួរដោយផ្ទាល់ និង​រាប់ពាន់នាក់តាមប្រព័ន្ធអនឡាញ។

សម្តេចតេជោ ហ៊ុន សែន បានបញ្ជាក់ជូនភ្ញៀវថា កម្ពុជា បាន​បំពេញតួនាទីយ៉ាងសកម្មនៅក្នុងក្របខណ្ឌអាស៊ាន ហើយ​ជាក់ស្តែង សម្តេចបានកាន់ញញួរក្នុងឋានៈជាប្រធានអាស៊ាន​ចំនួន ៣ដងនាពេលកន្លងមក។ សម្តេចតេជោ បានសម្តែង​នូវក្តី​រីករាយចំពោះការបង្កើតឱ្យមានបណ្ណាល័យ AIPA LYNC ហើយនេះ ក៏ជាបទពិសោធន៍ល្អសម្រាប់អាស៊ានផងដែរ។

សម្តេចតេជោ ក៏បានចាត់ទុកតួនាទីរបស់សភា និងការចូលរួម​យ៉ាងផុសផុលដោយផ្ទាល់ និងអនឡាញនាពេលនេះ គឺជា​និម្មិតរូបនៃការចូលរួមយ៉ាងសកម្មរបស់ប្រជាជនក្នុងសមាហរណកម្មពេញលេញក្នុងអាស៊ាន ដែលនេះគឺជាមោទនភាព​របស់​កម្ពុជា។

ក្រោមទិដ្ឋភាពសកល សម្តេចតេជោ បានបន្តចែករំលែកស្ថាន​ភាព​មិនច្បាស់លាស់នៃពិភពលោក ដែលតម្រូវឱ្យយើងធ្វើ​សមាហរណកម្មជាមួយដៃគូនានា ជាពិសេសសហប្រតិបត្តិការ​ក្រោមកិច្ចព្រមព្រៀងពាណិជ្ជកម្មសេរីអាស៊ាន, អាស៊ាន-ចិន និង RCEP ជាដើម ដើម្បីឆ្លើយតបទៅនឹងការអនុវត្តដោយ​ឯកតោ​ភាគី។

សម្តេចតេជោប្រធានព្រឹទ្ធសភាបានសង្កត់ធ្ងន់ថា ការពង្រឹង​ភាព​ជាដៃគូ និងអង្គការតំបន់របស់យើង ទាំងស្ថាប័ននីតិ​ប្រតិបត្តិ និងនីតិប្បញ្ញត្តិ នឹងជំរុញឱ្យមានកំណើន ជាក់ស្តែងកំណើន​ពាណិជ្ជកម្មអាស៊ានគ្នាឯង និងការពង្រីកទីផ្សារ​ក្នុងក្របខ័ណ្ឌ RCEP ជាដើម។សម្តេចតេជោបានបន្តកត់សម្គាល់អំពីសារៈសំខាន់នៃការចែករំលែកប្រវត្តិ និងបទពិសោធន៍ ពីអ្នកជំនាន់មុនទៅអ្នកជំនាន់ក្រោយ តួយ៉ាងបទពិសោធជាច្រើនរបស់សម្តេច ក្នុងការកសាង និងរក្សា​បាននូវសន្តិភាព​ជូនកម្ពុជា ក្រៅពីអ្វីដែលសម្តេចបាន​ចែករំលែក​នៅភ្នំពេញ នៅហ្សារកាតា និងនៅទីម័រឡេស្តេផងដែរ។

សម្តេចតេជោ ហ៊ុន សែន បានសម្តែងនូវការសាទរចំពោះ​សមិទ្ធផលរយៈពេលជិត ២ឆ្នាំ នៃថ្នាក់ដឹកនាំអ្នកបន្តវេនកម្ពុជា ដែលរក្សាបាននូវស្ថិរភាពនយោបាយ ម៉ាក្រូសេដ្ឋកិច្ច និងកំណើនសេដ្ឋកិច្ចជារួម។

សម្តេចតេជោបានបន្តលើកឡើងថា នីតិប្បញ្ញត្តិគ្រប់ប្រទេស គួរគាំទ្រដល់រដ្ឋាភិបាលដើម្បីសម្រេចបាននូវចក្ខុវិស័យ និងឧត្តមប្រយោជន៍ជូនប្រជាជន។ ក្នុងន័យនេះ សម្តេចតេជោ បានផ្តួចផ្តើមវេទិកាថ្នាក់ដឹកនាំព្រឹទ្ធសភា សំដៅជំរុញឱ្យ​មានកិច្ចសន្ទនារវាងព្រឹទ្ធសភា និងប្រែក្លាយវេទិកានេះជា​រចនាសម្ព័ន្ធទ្រទ្រង់ដល់រដ្ឋាភិបាល ក៏ដូចជាយន្តការ​សម្រាប់​អាស៊ានផងដែរ៕
ដោយ៖វណ្ណលុក