(សៀមរាប)៖ តាមរយៈការដឹកនាំពីសំណាក់ សម្តេចតេជោ ហ៊ុនសែន អតីតនាយករដ្ឋមន្រ្តីកម្ពុជា និងបច្ចុប្បន្នជាប្រធានព្រឹទ្ធសភាកម្ពុជា បានធ្វើឱ្យប្រទេសកម្ពុជាបោះជំហានយ៉ាងសំខាន់ក្នុងការលើកកម្ពស់សេរីភាពសារព័ត៌មាន និងក៏ដូចជាការកសាងសមត្ថភាពវិជ្ជាជីវៈសារព័ត៌មាននៅកម្ពុជា។

គួរបញ្ជាក់ថា ការថ្លែងរបស់រដ្ឋមន្រ្តីក្រសួងព័ត៌មានបែបនេះធ្វើឡើងក្នុងពិធីបើកសន្និសីទកំពូលស្តីពី ប្រព័ន្ធផ្សព្វផ្សាយអាស៊ីលើកទី២០ (20th Asia Media Summit) នាសណ្ឋានគារ សុខា សៀមរាប ខេត្តសៀមរាបនាថ្ងៃទី ២២ ខែកក្កដា ឆ្នាំ ២០២៥ ។

ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មាន បានឱ្យដឹងថាប្រមុខដឹកនាំកម្ពុជាបានមានទស្សនវិស័យដោយចាត់ទុក ប្រព័ន្ធផ្សព្វផ្សាយមិនគ្រាន់តែជាឧបករណ៍នៃការទំនាក់ទំនងប៉ុណ្ណោះទេ ប៉ុន្តែជាឧបករណ៍នៃការកសាងសន្តិភាព ការអប់រំសាធារណៈ និងភាពធន់នឹងលទ្ធិប្រជាធិបតេយ្យផងដែរ។

ជាមួយគ្នានេះ រដ្ឋមន្រ្តីក្រសួងព័ត៌មានបានថ្លែងបញ្ជាក់ដែរថា ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជាក៏បានកំពុងអនុវត្តទស្សនវិស័យនេះ ប្រកបដោយភាពស្វាហាប់ជាថ្មី។ រាជរដ្ឋាភិបាលកម្ពុជាកំពុងជំរុញកំណែទម្រង់ជាយុទ្ធសាស្ត្រ ផ្តោតលើការផ្លាស់ប្តូរ ឌីជីថល សុចរិតភាពវិជ្ជាជីវៈ និងសីលធម៌ប្រព័ន្ធផ្សព្វផ្សាយ។

នាឱកាសក្នុងការបើកពិធីសន្និសីទកំពូលស្តីពី ប្រព័ន្ធផ្សព្វផ្សាយអាស៊ីលើកទី២០នៅកម្ពុជានេះ ឯកឧត្តម នេត្រ ភក្រ្តា បានមានប្រសាសន៍ថាក្នុងកិច្ចប្រជុំកំពូលប្រព័ន្ធផ្សព្វផ្សាយនេះដែរ វាគឺជាចលនាមួយ វេទិកាមួយ និងវាក៏ជាសញ្ញាមួយ ក្រោមការគ្រប់គ្រងរបស់វិទ្យាស្ថានអាស៊ីប៉ាស៊ីហ្វិកសម្រាប់ការអភិវឌ្ឍន៍ការផ្សាយ (AIBD) AMS បានផ្ដល់សិទ្ធិអំណាចដល់អ្នកជំនាញក្នុងការគិតឡើងវិញអំពីវិស័យសារព័ត៌មានក្នុងយុគសម័យឌីជីថលនេះ”។

ឯកឧត្តម នេត្រ ភក្រ្តាបានលើកឡើងផងថា “បដិវត្តន៍ឌីជីថលបានធ្វើឱ្យមានការបង្កើតខ្លឹមសារបែបប្រជាធិបតេយ្យ ពង្រីកព្រំដែននៃសារព័ត៌មាន និងពង្រីកសំឡេងដែលមិនធ្លាប់ឮ។ ប៉ុន្តែវាក៏បានឆ្លុះបញ្ចាំងនូវព័ត៌មានមិនពិត ការនិយាយស្អប់ ភាពលំអៀងនៃការដោះស្រាយ និងការរីករាលដាលដ៏គ្រោះថ្នាក់នៃព័ត៌មានក្លែងក្លាយ ដែលប្រសិនបើយើងទុកចោលដោយគ្មានការគិតគូនោះ វានឹង គំរាមកំហែងដល់ការបំផ្លាញមូលដ្ឋានគ្រឹះនៃសារព័ត៌មាន និងលទ្ធិប្រជាធិបតេយ្យ។

ឯកឧត្តមរដ្ឋមន្រ្តីក្រសួងព័ត៌មានបានបញ្ជាក់បន្ថែមថា៖ ក្នុងរយៈពេល ២០ឆ្នាំកន្លងមកនេះ ប្រទេសកម្ពុជាបានឆ្លងកាត់ការផ្លាស់ប្តូរគួរឱ្យកត់សម្គាល់ ពីប្រទេសដែលមានសង្រ្គាម ទៅជាប្រទេសដែលមានសន្តិភាព ការរីកចម្រើន និងទំនើបកម្ម។ ហើយការផ្លាស់ប្តូរនេះបានរួមបញ្ចូលបដិវត្តន៍មួយនៅក្នុងទិដ្ឋភាពប្រព័ន្ធផ្សព្វផ្សាយរបស់យើង។

គួរបញ្ជាក់ថា បើតាម ឯកឧត្តម នេត្រ ភក្រ្តា បានឱ្យដឹងដែរថាកាលពីអតីតកាលកម្ពុជាដែលមានស្ថានីយ៍វិទ្យុ និងទូរទស្សន៍ តិចតូច នៅដើមទសវត្សរ៍ឆ្នាំ ១៩៩០ ឥឡូវនេះប្រទេសកម្ពុជាមានប្រព័ន្ធផ្សព្វផ្សាយដ៏រស់រវើកមួយ ដែលរួមមានបណ្តាញទូរទស្សន៍រាប់សិប កន្លែងបោះពុម្ពឯករាជ្យ កម្មវិធីវិទ្យុ វេទិកាឌីជីថល និងមានការពង្រីកយ៉ាងឆាប់រហ័សនៃសារព័ត៌មានរដ្ឋ និងឯកជន និងប្រកបដោយគុណភាព ៕

ដោយ ៖ ម៉ាដេប៉ូ