(ភ្នំពេញ)៖ វេទិកាស្តីពី សុវត្ថិភាពលើប្រព័ន្ធអនឡាញ ឆ្នាំ២០២៥ លើកទី២ ក្រោមមូលបទ “កសាងទំនុកចិត្តក្នុងយុគសម័យបញ្ញាសិប្បនិម្មិត” ត្រូវបានរៀបចំឡើងនៅថ្ងៃទី១ ខែសីហា ឆ្នាំ២០២៥នេះ នៅ មជ្ឈមណ្ឌលសហប្រតិបត្តិការ កម្ពុជា-កូរ៉េ (CKCC) ក្នុងបរិវេណសាកលវិទ្យាល័យភូមិន្ទភ្នំពេញ ក្រោមអធិបតីភាព ឯកឧត្តម ជុន វ៉ាត រដ្ឋលេខាធិការក្រសួងប្រៃសណីយ៍និងទូរគមនាគមន៍ និងដោយមានការចូលរួមពី តំណាងក្រសួង ស្ថាប័ន ដៃគូអភិវឌ្ឍន៍ ក្រុមហ៊ុនបច្ចេកវិទ្យា អង្គការសង្គមស៊ីវិល គ្រឹះស្ថានអប់រំ លោកគ្រូ អ្នកគ្រូ សិស្ស-និស្សិត និងសាធារណជនជាច្រើនកុះករប្រមាណ ៦០០នាក់ ។

វេទិកានេះរៀបចំឡើងក្នុងគោលបំណងលើកកម្ពស់ការយល់ដឹងរបស់ប្រជាពលរដ្ឋកម្ពុជាអំពីហានិភ័យលើប្រព័ន្ធអនឡាញ ចែករំលែកចំណេះដឹងអំពីបច្ចុប្បន្នភាពបច្ចេកវិទ្យាបញ្ញាសិប្បនិម្មិត ឬ (Al) ជាពិសេស Generative AI ជា AI ជំនាន់ថ្មីដែលមានសមត្ថភាពផលិតមាតិកាល្អ និងមាតិកាមិនសមរម្យដែលអាចបង្កហានិភ័យ និង គ្រោះថ្នាក់ដល់សុខភាពសាធារណៈ និងសណ្តាប់ព័ត៌មានសង្គម ។

ឯកឧត្តម ជុន វ៉ាត បានមានប្រសាសន៍ថា វេទិកានេះជាការឆ្លុះបញ្ជាំងពីយន្តការសហការគ្រប់ភាគីពាក់ព័ន្ធ (Multistakeholder Approach) ជាយន្តការមានសារៈសំខាន់ ដើម្បីដោះស្រាយបញ្ហាគ្រោះថ្នាក់លើប្រព័ន្ធអនឡាញប្រកបដោយសុវត្ថិភាព និងមានប្រសិទ្ធភាព។ ជាការពិតជាក់ស្តែង ការរក្សាសន្តិសុខ និងសុវត្ថិភាពលើប្រព័ន្ធអនឡាញ ទាមទារការចូលរួមពីគ្រប់ភាគីពាក់ព័ន្ធ ក្នុងនោះរាជរដ្ឋាភិបាលជាអ្នកសម្រេចដាក់ចេញនូវគោលនយោបាយ ចំណែកវិស័យឯកជន ជាពិសេសក្រុមហ៊ុនបច្ចេកវិទ្យាឌីជីថលត្រូវការអនុវត្តវិធានបច្ចេកទេសទាំងឡាយដែលអាចការពារសុវត្ថិភាពផលិតផល សេវា និងអ្នកប្រើប្រាស់របស់ខ្លួន។ ក្នុងនោះផងដែរ អ្នកប្រើប្រាស់ត្រូវមាននូវការយល់ដឹងលើចំណុចសំខាន់ៗ ព្រមទាំងរបៀបការពារខ្លួន ។

ឯកឧត្តមរដ្ឋលេខាធិការ អំពាវនាវដល់អ្នកប្រើប្រាស់គ្រប់រូបបង្កើននូវការប្រុងប្រយ័ត្ន និងត្រូវអភិវឌ្ឍចំណេះដឹងខ្លួនលើផ្នែកសុវត្ថិភាពអនឡាញជាប្រចាំ ដើម្បីបង្កើនការរក្សាសុវត្ថិភាពរបស់ខ្លួននៅលើលំហសាយប័រ បានគ្រប់ជ្រុងជ្រោយ និងលើកទឹកចិត្តអ្នកចូលរួមទាំងអស់ចូលស្តាប់ និងសិក្សាពីបញ្ហា ព្រមទាំងវិធីសាស្រ្តនានាក្នុងបន្ទប់សិក្ខាសាលាដែលក្រុមការងារបានរៀបចំឡើងក្នុងវេទិកានេះ ដើម្បីបង្កើនការយល់ដឹង និងចូលរួមទាំងអស់គ្នាក្នុងការកសាងបរិស្ថានឌីជីថលប្រកបដោយសុវត្ថិភាពសម្រាប់ប្រជាជនជាពិសេសកុមារកម្ពុជា។

គួរបញ្ជាក់ថា វេទិកានេះរៀបចំឡើង២ទម្រង់ ក្នុងពេលតែមួយរួមមាន៖ កិច្ចពិភាក្សា (Panel Discussion) ចំនួន ៤ប្រធានបទ និងបន្ទប់សិក្ខាសាលអនុវត្តផ្ទាល់ (Practical Workshop) ចំនួន ២បន្ទប់ ដែលអនុញ្ញាតឱ្យសាធារណៈជនចូលរួម ដោយសេរី ព្រមទាំងមានការដាក់តាំងបង្ហាញសមិទ្ធផលសេវាសាធារណៈឌីជីថលរបស់ ក.ប.ទ. ផងដែរ ៕ ដោយ ៖ ង៉ាន់ ទិត្យ