ក្រសួងប្រៃសណីយ៍ ពិភាក្សាពិគ្រោះយោបល់បច្ចេកទេសលើ សេចក្តីព្រាង ក្របខណ្ឌតាមដាន ត្រួតពិនិត្យ និងវាយតម្លៃការអនុវត្តក្របខណ្ឌគោលនយោបាយសេដ្ឋកិច្ច និងសង្គមឌីជីថល សង្គមឌីជីថល ២០២១-២០៣៥
(ភ្នំពេញ)៖ នៅព្រឹកថ្ងៃទី៥ ខែសីហា ឆ្នាំ២០២៥ នៅទីស្តីការក្រសួងប្រៃសណីយ៍និងទូរគមនាគមន៍ (ក.ប.ទ.) ឯកឧត្តម ជុន វ៉ាត រដ្ឋលេខាធិការ ក.ប.ទ. និងជាប្រធានក្រុមតាមដាន ត្រួតពិនិត្យ និងវាយតម្លៃនៃអគ្គលេខាធិការដ្ឋានក្រុមប្រឹក្សាជាតិសេដ្ឋកិច្ចនិងសង្គមឌីជីថល (ក.ស.ឌ.) បានអញ្ជើញដឹកនាំកិច្ចប្រជុំពិភាក្សាពិគ្រោះយោបល់បច្ចេកទេសលើសេចក្តីព្រាង “ក្របខណ្ឌតាមដាន ត្រួតពិនិត្យ និងវាយតម្លៃការអនុវត្តក្របខណ្ឌគោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥”។
កិច្ចប្រជុំនេះមានការអញ្ជើញចូលរួមពី ឯកឧត្តម លោកជំទាវ តំណាងគណៈកម្មាធិការរដ្ឋាភិបាលឌីជីថល (គ.រ.ឌ.) គណៈកម្មាធិការសេដ្ឋកិច្ច និងធុរកិច្ចឌីជីថល (គ.ស.ធ.ឌ.) និងគណៈកម្មាធិការសន្តិសុខឌីជីថល (គ.ស.ឌ.) ទីប្រឹក្សាបច្ចេកទេសមកពីកម្មវិធីអភិវឌ្ឍន៍អង្គការសហប្រជាជាតិ (UNDP) និងក្រុមការងារជំនាញបច្ចេកទេសតាមដាន ត្រួតពិនិត្យ និងវាយតម្លៃនៃ ក.ប.ទ. សរុបប្រមាណ ៣០រូប ។
កិច្ចប្រជុំនេះរៀបចំឡើងក្នុងគោលបំណងប្រមូលធាតុចូលអំពីសូចនាករដែលត្រូវធ្វើការវាស់វែងលើវិធានគោលនយោបាយ និងមតិយោបល់ដើម្បីកែលម្អសេចក្តីព្រាងក្របខណ្ឌខណ្ឌតាមដាន ត្រួតពិនិត្យ និងវាយតម្លៃការអនុវត្តក្របខណ្ឌគោលនយោបាយសេដ្ឋកិច្ច និងសង្គមឌីជីថល ២០២១-២០៣៥ ឱ្យកាន់តែមានលក្ខណៈគ្រប់ជ្រុងជ្រោយ និងអាចអនុវត្តបានប្រកបដោយប្រសិទ្ធភាពខ្ពស់។
ជាមួយគ្នានេះ ឯកឧត្តមរដ្ឋលេខាធិការ ជុន វ៉ាត បានគូសបញ្ជាក់អំពីសារៈសំខាន់ នៃក្របខណ្ឌតាមដាន ត្រួតពិនិត្យ និងវាយតម្លៃនេះ ដែលជាយន្តការដ៏ចាំបាច់មួយសម្រាប់ធ្វើការវាស់វែងការអនុវត្ត កំណត់វិធីសាស្រ្ត និងជាឧបករណ៍សម្រាប់ពង្រឹងនូវប្រព័ន្ធ និងសមត្ថភាពតាមដាន ត្រួតពិនិត្យ និងវាយតម្លៃ ក្នុងការអនុវត្ត ក្របខណ្ឌគោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥៕
ដោយ ៖ ង៉ាន់ ទិត្យ
