បរទេស៖ ទឹកជំនន់ភ្លាមៗ បានវាយប្រហារភូមិ ដារ៉ាលី (Dharali) រដ្ឋ អ៊ូតារ៉ាខាន (Uttarakhand) ប្រទេសឥណ្ឌា បណ្តាលឲ្យស្លាប់និងបាត់ខ្លួន មនុស្ស ជាង៥០នាក់។

ក្រុមបុគ្គលិកសង្គ្រោះបន្ទាន់ បានទៅដល់ភូមិ ដែលស្ថិតនៅក្នុងតំបន់ព្រៃភ្នំ ហិមាល័យ មួយនេះ ភ្លាមៗ បន្ទាប់ពី រងការជន់លិច ដែលមានទាំងការអិលបាក់ដី ដ៏បំផ្លិចបំផ្លាញ កាលពីថ្ងៃទី៥ ខែសីហា ឆ្នាំ២០២៥។ ដំបូងឡើយ មានសេចក្តីរាយការណ៍ថា បាត់ខ្លួន ១០០នាក់ ប៉ុន្តែ គិតមកដល់ថ្ងៃពុធ ទី៦ ខែសីហា ចំនួនបាត់ខ្លួនបានធ្លាក់ នៅត្រឹមជាង៥០នាក់ ខណៈអ្នកស្លាប់ មានចំនួន៤នាក់។

កងទ័ពឥណ្ឌា បាននាំយកទាំងសត្វឆ្កែ sniffer និង យន្តហោះគ្មានមនុស្សបើក ដើម្បីស្វែងរកមនុស្ស ជាច្រើននាក់ដែលបាត់ខ្លួន បន្ទាប់ពីទឹកជំនន់ដ៏សាហាវនេះ។

អ្នកជំនាញការបម្រែបម្រួលអាកាសធាតុ បានព្រមានថា គ្រោះមហន្តរាយនេះ គឺជា «ការដាស់តឿន» ចំពោះផលប៉ះពាល់ នៃការឡើងកំដៅផែនដី។ ទឹកជំនន់ និងការរអិលបាក់ដី ដែលសម្លាប់មនុស្ស គឺជារឿងធម្មតា នៅក្នុងរដូវខ្យល់មូសុង ចាប់ពីខែមិថុនា ដល់ខែកញ្ញា ប៉ុន្តែ អ្នកជំនាញ និយាយថា ការប្រែប្រួលអាកាសធាតុ រួមជាមួយនឹងទីក្រុងបង្កើនសកម្មភាពកាន់តែខ្លាំង កំពុងបង្កើនបញ្ហានេះ កាន់តែធ្ងន់ធ្ងរ៕

ប្រភពពី AFP ប្រែសម្រួល៖ សារ៉ាត