ភ្នំពេញ៖ប្រមុខរាជរដ្ឋាភិបាលនៃព្រះរាជាណាចក្រកម្ពុជា សម្ដេចមហា បវរធិបតី ហ៊ុន ម៉ាណែត​ នៅថ្ងៃទី៧ ខែសីហា ឆ្នាំ២០២៥​បានផ្ញើលិខិត ផ្លូវការទៅគណៈកម្មការពានរង្វាន់ណូបែលសន្តិភាព ដើម្បីគាំទ្របេក្ខភាព ឯកឧត្តមប្រធានាធិបតី អាមេរិក ដូណាល់ ត្រាំ សម្រាប់ពានរង្វាន់ណូបែល សន្តិភាព។

ជាមួយគ្នានេះលើបណ្ដាញសង្គមហ្វេសប៊ុកនារាត្រីថ្ងៃទី៧ ខែសីហានេះ សម្ដេចធិបតី ហ៊ុន ម៉ាណែត បានបង្ហោះសារដែល​មានខ្លឹមសារដូច្នេះថា “ត​បតាមសំណូមពររបស់ប្រជាពលរដ្ឋខ្មែរទាំងក្នុងនិងក្រៅប្រទេស និង ដើម្បីជាការថ្លែង​អំណរ​គុណចំពោះឯកឧត្តមប្រធានាធិបតី Donald Trump ដែលឯកឧត្តមបានយកចិត្តទុកដាក់ដោយផ្ទាល់ ក្នុងការផ្ដួច ផ្ដើមនិង​ជំរុញឲ្យមានបទឈប់បាញ់គ្នារវាងកងទ័ពកម្ពុជានិងកងទ័ពថៃ និងបន្តតាមដានការអនុវត្តបទឈប់បាញ់រហូត​ដល់មាន​សន្តិភាព​ពេញលេញរវាងប្រទេសទាំងពីរ ខ្ញុំក្នុងនាមជានាយករដ្ឋមន្ត្រីនៃ ព្រះ រាជាណាចក្រកម្ពុជា បានផ្ញើលិខិតជាផ្លូវការ​ទៅគណៈកម្មការពានរង្វាន់ ណូបែលសន្តិភាព ដើម្បីគាំទ្របេក្ខភាពឯកឧត្តមប្រធានាធិបតី Donald Trump សម្រាប់​ពានរង្វាន់ណូបែលសន្តិភាព”។

លិខិតទៅកាន់គណៈកម្មការពានរង្វាន់ណូបែលសន្តិភាពនេះ បាន កើតឡើងតែប៉ុន្មានម៉ោងបន្ទាប់ពី កិច្ចប្រជុំវិសាមញ្ញ​គណៈកម្មាធិការ​ព្រំដែនទូទៅកម្ពុជា-ថៃ (GBC)បានប្រព្រឹត្តទៅប្រកបដោយ ជោគជ័យ និងផ្លែផ្កា ដោយភាគី​ទាំងពីរ​ក៏បានឯកភាពលើលក្ខខណ្ឌនៃបទឈប់បាញ់ និងការរៀបចំយន្តការសម្រាប់អនុវត្តនូវលក្ខខណ្ឌ ១៣ចំណុច ក្រោមការ​ចូលរួមសង្កេតការណ៍ពី ម៉ាឡេស៊ី សហរដ្ឋអាមេរិក និងសាធារណរដ្ឋ ប្រជាមានិតចិន ៕

ដោយ៖វណ្ណលុក