កំពង់ចាម៖ រូបសំណាក “នាគព័ន្ធ” ដែលបានកសាងឡើងក្នុងសម័យ​សង្គម​រាស្ត្រនិយមមានទីតាំងស្ថិតនៅរង្វង់មូល ខាងមុខប្រាសាទ​នគរបាជ័យ (ព្រំប្រទល់ក្រុងកំពង់ចាម-ស្រុកកំពង់សៀម) នឹងត្រូវ​យកមកតម្កល់នៅក្នុង​បរិវេណ​សាលាខេត្តកំពង់ចាម នាពេល​ឆាប់ៗខាងមុខ ហើយនឹងជំនួសដោយរូបសំណាក “នាគព័ន្ធ” ថ្មី ដែលមានទំហំធំជាងមុនខណៈដែលទីតាំងនេះទទួលបាន​ផ្លូវ​កាន់​​តែធំទូលាយជាងមុនដែរ។ 

ឯកឧត្តម អ៊ុន ចាន់ដា អភិបាលខេត្តកំពង់ចាម បានបញ្ជាក់ឱ្យដឹងនៅក្នុង​កិច្ចប្រជុំក្រុមប្រឹក្សាខេត្តថារូបសំណាក “នាគព័ន្ធ” ស្ថិតនៅរង្វង់មូល “នាគព័ន្ធ” នឹងត្រូវដកចេញព្រោះស្ថិតនៅក្នុងគម្រោងការដ្ឋានពង្រីក​កម្រិតផ្លូវជាតិលេខ៧ ពី២ គន្លង ទៅជា៤គន្លង ដែលថ្នាក់ដឹកនាំតម្រូវ​ឱ្យកសាង រូបសំណាក “នាគព័ន្ធ” ថ្មី ដែលមានទំហំធំ និងដើម្បីឱ្យ​សក្តិសម​ជាមួយនឹងទំហំផ្លូវ។

ឯកឧត្តមអភិបាលខេត្តបន្ថែមថា ក្នុងនាមយើងជាថ្នាក់ដឹកនាំ និងជាយុវជនជំនាន់ក្រោយ ត្រូវរួមគ្នាថែរក្សាការពារនូវ​មរតក និងស្នាដៃរបស់ថ្នាក់ដឹកនាំជំនាន់មុនៗ ដើម្បីជាការតបស្នង និងការដឹងគុណ និងដើម្បីទុកជាកេរ្តិ៍ដំណែល​ប្រវត្តិសាស្ត្រសម្រាប់ក្មេងជំនាន់ក្រោយៗ។

ឯកឧត្តមព្រឹទ្ធាចារ្យ ស្រី កានឿន អតីតប្រធានមន្ទីរធម្មការនិងសាសនា​ខេត្តកំពង់ចាម បច្ចុប្បន្នជាសមាជិក​ក្រុមប្រឹក្សា​ខេត្តកំពង់ចាម បានបញ្ជាក់អំពីប្រវត្តិ ” រង្វង់មូលនាគព័ន្ធ”  ថា រង្វង់មូលរូបសំណាក​នាគព័ន្ធ​ត្រូវបានបានកសាងឡើង ក្នុងទសវត្ស៦០ ក្នុងសម័យសង្គម​រាស្ត្រនិយម ដែលជាស្នាព្រះហស្ថរបស់ព្រះករុណា ព្រះបរមរតនកោដ្ឋ។ជាអកុសល រូបសំណាក “នាគព័ន្ធ” ខាងលើត្រូវបានកម្ទេចនៅក្នុងរបប​កម្ពុជាប្រជាធិបតេយ្យ។

ក្រោយមកនៅអំឡុងទសវត្ស៩០ ក្នុងអាណត្តិសម្តេចទេពញាណ ហ៊ុន ណេង ជាអភិបាលខេត្តកំពង់ចាម​សម្តេចបានស្វែងរករូបថតរូបសំណាកនាគព័ន្ធ ខាងលើ និងក្រុមជាងដែលបានកសាងរូបសំណាកនាគព័ន្ធជំនាន់មុន មកកសាងឡើងវិញតាមរចនាប័ទ្ម និងទំហំដូច​គ្នានឹងរូបសំណាកចាស់។ក្រុមជាងទាំងនោះ មានទីលំនៅក្នុងស្រុកកោះសូទិន ខេត្តកំពង់ចាម៕ដោយ៖លី ពៅ