បាងកក ៖ ទាហានថៃម្នាក់ ដែលបានបាញ់អ្នកភូមិ ២នាក់ ឲ្យរងរបួសធ្ងន់ធ្ងរ នៅថ្ងៃទី១៥ ខែសីហានេះ ត្រូវបានរកឃើញថា ស្លាប់បាត់បង់ជីវិត សង្ស័យធ្វើអត្តឃាតខ្លួនឯង បណ្តាលមកពីភាពតានតឹងផ្លូវចិត្ត។

ទាហាន Ratthapoom Thepsiri នៃ កងពលតូចថ្មើរជើងលេខ ១៦២៣ បានប្រើប្រាស់កាំភ្លើង M16 បាញ់រះ ទៅលើអ្នកភូមិ នៅស្រុក Kap Choeng កាលពីម៉ោងប្រហែល ១ ទៀបភ្លឺ ថ្ងៃទី ១៥ ខែសីហា មុនពេលរត់ចូល ទៅក្នុងព្រៃក្បែរនោះ ហើយ ត្រូវបានគេប្រទះឃើញថា ស្លាប់ បន្ទាប់ពីប្រតិបត្តិការរុករក និងឡោមព័ទ្ធ អស់រយៈពេល ជិត១០ម៉ោង។

នៅវេលាម៉ោង ១០ និង៤០នាទីព្រឹក សាកសពរបស់លោក ត្រូវបានគេប្រទះឃើញ នៅក្នុងព្រៃ ខាងកើត ចំងាយប្រហែល១៥០ម៉ែត្រ ពីកន្លែងកើតហេតុ។ អាជ្ញាធរជឿថា គាត់បានបញ្ចប់ជីវិតដោយខ្លួនឯង។

យ៉ាងណា លោក Boonsin Padklang មេបញ្ជាការ ភូមិភាគ ២ និយាយថា មូលហេតុពិតប្រាកដ មិនទាន់ដឹងនៅឡើយទេ ប៉ុន្តែ បានអះអាងថា «នៅក្នុងស្ថានភាពសង្រ្គាម មានការតានតឹងផ្លូវចិត្ត នៅលើសមរភូមិ រួចហើយ»។ លោកបានបន្ថែមថា ការប៉ះទង្គិចគ្នា នាពេលថ្មីៗនេះ ពិតជាបានប៉ះពាល់ដល់សុខភាពផ្លូវចិត្ត របស់ទាហានជួរមុខ។

ក្រោយកើតហេតុ លោក បានបញ្ជាឱ្យមេបញ្ជាការកងឯកភាព យកចិត្តទុកដាក់ ថែទាំមន្ត្រីក្រោមឱវាទ ឱ្យបានហ្មត់ចត់ និងបានណែនាំក្រុមគ្រូពេទ្យ ឱ្យវាយតម្លៃសុខភាពផ្លូវចិត្ត របស់យោធិនទាំងអស់៕

ប្រភពពី The Nation ប្រែសម្រួល៖ សារ៉ាត