(ភ្នំពេញ)៖ ក្នុងដំណើរទស្សនកិច្ច របស់ក្រុមអ្នកសង្កេតការណ៍អន្តរកាល(IOT) ចំនួន ៧ប្រទេសដើម្បីត្រួតពិនិត្យមើលដោយផ្ទាល់ពីការវិវត្តន៍ស្ថានការណ៍នៅទីតាំងជាក់ស្ដែង ដែលរងការបំផ្លិតបំផ្លាញ ដោយការប្រយុទ្ធគ្នារវាងកងកម្លាំងកម្ពុជា និង ថៃតាមព្រំដែននៅកម្ពុជាបានបញ្ចប់ដោយជោគជ័យ ។

ថ្លែងក្នុងសេចក្តីសង្ខេបព័ត៌មានប្រចាំថ្ងៃ ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នៅល្ងាចថ្ងៃ ទី១៥ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិបានឱ្យដឹងថា ៖ ក្រសួងការពារជាតិ បានសម្របសម្រួលជូនក្រុមអ្នកសង្កេតការណ៍អន្តរកាល IOT ដឹកនាំដោយលោកវរសេនីយ៍ឯក NAZLEE BIN ABDUL RAHIM អនុព័ន្ធយោធាម៉ាឡេស៊ី ប្រចាំកម្ពុជា ដែលមានតំណាងមកពីប្រទេសចំនួន ៧ប្រទេសដើម្បី ចូលរួមមាន ប្រ៊ុយណេ ឥណ្ឌូនេស៊ី ឡាវ មីយ៉ាន់ម៉ា ហ្វីលីពីន និងវៀតណាម ដែលមាននិវេសន្នដ្ឋានក្នុង និងក្រៅប្រទេសកម្ពុជា ដោយមានសមាជិកសរុបចំនួន ៧ប្រទេស បានចេញដំណើរទៅកាន់ទីតាំងជាក់ស្តែងផ្សេងៗ ដើម្បីសង្កេតមើលស្ថានភាពសន្តិសុខតាមព្រំដែន ដែលប៉ះពាល់ផ្ទាល់ក្នុងអំឡុងជម្លោះព្រំដែនកម្ពុជា-ថៃ ដូចជា៖ទិសដៅ១- ខេត្តបាត់ដំបង ” យោធភូមិភាគទី៥ ” ,២-ខេត្តបន្ទាយមានជ័យ ច្រកព្រំដែនអន្តរជាតិប៉ោយប៉ែត ច្រកអូបីជាន់ ” ភូមិជោគជ័យ ” និងច្រកបឹងត្រកួន,៣- ខេត្តព្រះវិហារ ” ច្រកព្រំដែនអានសេះ ” ។

លោកជំទាវអ្នកនាំពាក្យបញ្ជាក់ថា ៖ បេសកម្មនេះបានបញ្ចប់ និងទទួលបានជោគជ័យ ។

គួរបញ្ជាក់ថា បេសកកម្មនេះដែរបានកើតចេញពីលទ្ធផលនៃកិច្ចប្រជុំពិសេសដែលបានធ្វើឡើងនៅថ្ងៃទី២៨ ខែកក្កដា ឆ្នាំ២០២៥ នៅទីក្រុងពូត្រាយៃយ៉ា ប្រទេសម៉ាឡេស៊ី និងកិច្ចប្រជុំវិសាមញ្ញ នៃគណៈកម្មាធិការព្រំដែនទូទៅកម្ពុជា-ថៃ GBC ដែលបានបញ្ចប់កាលពីថ្ងៃទី៧ ខែសីហា ឆ្នាំ២០២៥ ដោយក្នុងនេះបានបញ្ជាក់សារជាថ្មីអំពីសារៈសំខាន់នៃការបង្កើតឱ្យមានក្រុម IOT ។

លោកជំទាវ បានឱ្យដឹងដែរថាកម្ពុជា សូមគូសបញ្ជាក់ សារជាថ្មីម៉ឺងម៉ាត់ និង ច្បាស់លាស់បំផុតនូវការប្តេជ្ញាចិត្តឥតងាករេរបស់ខ្លួនក្នុងការគោរព និងអនុវត្តយ៉ាងខ្ជាប់ខ្ជួននូវបទឈប់បាញ់ ដែលបានសម្រេចកាលពីថ្ងៃទី ២៨ ខែកក្កដា ឆ្នាំ២០២៥ និងគោលការណ៍ឯកភាពទាំង ១៣ ចំណុចនៅកិច្ចប្រជុំវិសាមញ្ញ នៃគណៈកម្មាធិការព្រំដែនទូទៅកម្ពុជា-ថៃ GBC ដែលបានបញ្ចប់កាលពីថ្ងៃទី៧ ខែសីហា ឆ្នាំ២០២៥ មានអ្នកសង្កេតការណ៍ទាំង៣ប្រទេសចូលរួមផងដែរ ៕

ដោយ ៖ ម៉ាដេប៉ូ
រូប ៖លោក វេង លឹមហួត