ប្រជាពលរដ្ឋ៥០គ្រួសារ នៅឃុំក្តីដូងទទួលអំណោយមនុស្សធម៌ពីអង្គការបេសកកម្មយុត្តិធម៌អន្តរជាតិ
កំពង់ធំ៖លោកស្រី លំ គន្ធារី អភិបាលរងខេត្តកំពង់ធំ នៅថ្ងៃទី១៩ ខែសីហា ឆ្នាំ២០២៥បានអញ្ជើញសួរសុខទុក្ខ និងនាំយកអំណោយមនុស្សធម៌របស់អង្គការបេសកកម្មយុត្តិធម៌អន្តរជាតិ (IJM) ជូនដល់ប្រជាពលរដ្ឋចំនួន ៥០ គ្រួសារ នៅឃុំក្តីដូង ស្រុកកំពង់ស្វាយ ខេត្តកំពង់ធំ។
គ្រួសារទទួលអំណោយក្នុងឱកាសនេះរួមមានភរិយា និងគ្រួសារយោធាជួរមុខ ,គ្រួសារពលករនៅប្រទេស និងគ្រួសារដែលកំពុងជួបការលំបាកជីវភាព។កម្មវិធីមានការចូលរួមពីលោក ជុំ សាឯម នាយកប្រចាំប្រទេសអង្គការ IJM លោក យិន ប៊ុនរ័ត្ន អនុប្រធានមន្ទីរការងារនិងបណ្ដុះបណ្ដាលវិជ្ជាជីវៈ ខេត្តកំពង់ធំ ។
ក្នុងឱកាសនេះលោក ជុំ សាឯម បានកោតសរសើរ និងថ្លែងអំណរគុណចំពោះវីរភាពរបស់យុទ្ធជនកងទ័ពជួរមុខដែលក្លាហានការពារបូរណភាពទឹកដីពីការឈ្លានរបស់ទាហានថៃ។
អំណោយដែលផ្តល់ជូនប្រជាពលរដ្ឋ៥០គ្រួសារមាន អង្ករ ទឹកស៊ីអ៊ីវ ទឹកត្រី ស៊ុបខ្នុរ ត្រីខកំប៉ុង សាច់ក្រក សាប៊ូបោកខោអាវ សាប៊ូដុសខ្លួន ច្រាសដុសធ្មេញ និងកន្សែងពោះគោ៕
ដោយ៖ប៊ុនរដ្ឋា
