ដឹកនាំសាសនាឥស្លាមខេត្តសៀមរាបនិងសប្បុរសជនប្រគល់ម៉ូតូជូនដល់វីរកងទ័ពចំនួនបីរូបដែលកំពុងឈរ ជើងការពារទឹកដី
សៀមរាប៖នៅវិហារឥស្លាមអាន់នៀកម៉ាស់ ក្នុងភូមិស្ទឹងថ្មី សង្កាត់ស្វាយដង្គំ ក្រុងសៀមរាប កាលពីរសៀលថ្ងៃទី២០ ខែសីហា ឆ្នាំ២០២៥ ឯកឧត្តម អែល សៀត សមាជិកក្រុមប្រឹក្សាខេត្តសៀមរាបនិង ជាអនុប្រធានសាសនាឥស្លាមខេត្តរួមជាមួយសប្បុរសជនខ្មែរឥស្លាមបានប្រគល់ម៉ូតូថ្មីចំនួនបីគ្រឿង,ស្បៀងអាហាររួមជាមួយថវិកា មួយចំនួនជូនវីរកងទ័ពខ្មែរឥស្លាមចំនួនបីរូប ដែលកំពុងឈរជើងការពារបូរណភាពទឹកដីព្រំដែនកម្ពុជា-ថៃ ។
មានប្រសាសន៍ក្នុងឱកាសនេះឯកឧត្តម អែល សៀត បានបញ្ជាក់ថា ម៉ូតូចំនួនបីគ្រឿងដែលប្រគល់ជូនកងទ័ពខ្មែរឥស្លាមនាពេលនេះគឺបានមកពីសប្បុរសជនខ្មែរឥស្លាមឈ្មោះ ហាជី ម៉ាត់ កូប និងក្រុមគ្រួសាររស់នៅភូមិស្ទឹងថ្មី ដែលមានបេះដូងខ្មែរ ស្រលាញ់ខ្មែរក្នុងជាតិសាសន៍តែមួយ និងដើម្បីជួយគាំទ្រលើកទឹកចិត្តដល់វីរកងទ័ពជួរមុខ ដែលកំពុងឈរជើងការពារបូរណភាពទឹកដីផងដែរ ។
ក្នុងនាមថ្នាក់ដឹកនាំសាសនាឥស្លាមខេត្តសៀមរាប ឯកឧត្តម អែល សៀត ក៏បានថ្លែងអំណរគុណដល់លោក ហាជី ម៉ាត់កូប និងក្រុមគ្រួសារព្រមទាំងសប្បុរសជនខ្មែរឥស្លាមទាំងអស់ដែលមានស្មារតីស្រលាញ់ជាតិ ដោយបានចូលរួមឧបត្ថម្ភគ្រឿងឧបភោគ បរិភោគនិងថវិកាដើម្បីគាំទ្រដល់សមរភូមិជួរមុខ ដោយទឹកចិត្តស្មោះសរ៕
ដោយ៖ប៊ុនរដ្ឋា
