(ភ្នំពេញ)៖ ក្នុងពិធីអបអរសាទរ ខួបលើកទី៨០ ទិវាឯករាជ្យជាតិ នៃសាធារណរដ្ឋសង្គមនិយមវៀតណាម ដែលរៀបចំឡើងដោយ ស្ថានទូតវៀតណាមប្រចាំកម្ពុជា នាល្ងាចថ្ងៃទី២១ ខែសីហា ឆ្នាំ២០២៥ នៅសណ្ឋាគារសូហ្វីតែលភូគីត្រាភ្នំពេញ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានថ្លែងថា កម្ពុជា​​ផ្តល់​សារៈសំខាន់ចំពោះ​ទំនាក់ទំនងដ៏ជិតស្និទ្ធ និងកិច្ចសហប្រតិបត្តិការ​គ្រប់​ជ្រុង​​ជ្រោយ​រវាងកម្ពុជា និងវៀតណាម ដែលបាននិងកំពុងរីកចម្រើនលើគ្រប់វិស័យ និងគ្រប់​កម្រិត ដោយឈរលើស្មារតី ភាពជាអ្នកជិតខាងល្អ មិត្តភាពជាប្រពៃណី កិច្ចសហ​ប្រតិ​បត្តិការគ្រប់ជ្រុងជ្រោយ និងស្ថិរភាពយូរអង្វែង ។

សម្តេចតេជោ រំលេចថា កម្ពុជា និងវៀតណាម បានភ្ជាប់ទំនាក់ទំនងការទូតជាផ្លូវការនៅឆ្នាំ​១៩៦៧ ។ ចាប់តាំង​ពីការភ្ជាប់ទំនាក់ទំនងជាផ្លូវការមក ប្រជាជនកម្ពុជា និងប្រជាជនវៀតណាម រក្សាបាន​ទំនាក់ទំនងមិត្តភាពកក់ក្តៅ និងភាពជាដៃគូដ៏ល្អប្រសើរ។ ប្រពៃណីនេះ ត្រូវបានបន្ត​ពូន​​ជ្រុំ​ដោយថ្នាក់ដឹកនាំគ្រប់ជំនាន់ នៃប្រទេសទាំងពីរ ចាប់តាំងពីសម័យព្រះបាទ សម្តេ​ច​ព្រះ នរោត្តម សីហនុ ព្រះបរមរតនកោដ្ឋ ជាមួយអតីតថ្នាក់ដឹកនាំបក្ស និងរដ្ឋា​ភិបាល​វៀតណាម រហូតមកដល់ថ្នាក់ដឹកនាំបច្ចុប្បន្ន ។

សម្តេចតេជោ ហ៊ុន សែន បានគូសបញ្ជាក់ថា ស្របពេល ទំនាក់ទំនងដ៏ជិតស្និទ្ធ និង​កិច្ចសហប្រតិបត្តិការគ្រប់ជ្រុងជ្រោយ​រវាងប្រទេសទាំងពីរមានការរីកចម្រើនជាលំដាប់ ប្រទេសទាំងពីរ នៅតែចងចាំជានិច្ចនូវការជួយគាំទ្រគ្នាទៅ​វិញ​ទៅមកក្នុងអតីតកាល គឺក្នុងគ្រាប្រជាជនកម្ពុជា បានលះបង់ និងគាំទ្រវៀត​ណាម ​​ក្នុងការតស៊ូ​ដើម្បីបុព្វ​ហេតុ​នៃការបង្រួបបង្រួមទឹកដី និងឯករាជ្យរបស់វៀត​ណាម និងការលះបង់របស់កង​ទ័ព​ស្ម័គ្រចិត្ត និងប្រជាជនវៀតណាម ក្នុងការផ្តួលរំលំ និងជួយរំដោះប្រជាជនកម្ពុជា ចេញ​ពីរបបប្រល័យពូជសាសន៍ ជួយទប់ស្កាត់ការ​វិលត្រឡប់ នៃរបបប្រល័យ​ពូជ​សាសន៍ និងជួយកម្ពុជា កសាងប្រទេសឡើងវិញ ។ នេះគឺជា​សច្ចភាពប្រវត្តិសាស្ត្រ​ដែលគ្មានកម្លាំងប្រតិកិរិយាណាមួយអាចប្រែក្រឡាស់​បាន​ឡើយ ។

សម្តេចតេជោ ក៏បានលើកឡើងផងដែរថា ទំនាក់ទំនងកម្ពុជា-វៀតណាម ដែលបាន​កសាង​ឡើងឈរលើមូលដ្ឋាននៃការគោ​រព​គ្នា​​ទៅវិញទៅមក ជួយគ្នាទៅវិញទៅមក បាន​ផ្ដល់ផលប្រយោជន៍សម្រាប់ប្រទេស និង​ប្រជាជនទាំងពីរ ក៏ដូចជាបានចូល​រួម​ចំណែកយ៉ាងសំខាន់ ដល់ការថែរក្សាសន្តិ​ភាព ស្ថិរភាព ការអភិវឌ្ឍប្រកបដោយ ចីរភាព និងវិបុលភាពនៅក្នុងតំបន់ ៕

អត្ថបទ ៖ វណ្ណលុក
រូប ៖ សួង ពិសិដ្ឋ