(ភ្នំពេញ)៖ សម្តេចតេជោ ហ៊ុន សែន បញ្ជាក់ថា ទំហំពាណិជ្ជកម្មទ្វេភាគីកម្ពុជា-វៀតណាម មានការ​កើន​ឡើងគួរឱ្យកត់សម្គាល់ ខណៈនៅឆ្នាំ២០២៤ វៀតណាម ជាដៃគូពាណិជ្ជកម្មលំដាប់​ទី៣ របស់កម្ពុជា ។

សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា កម្ពុជា ថ្លែងដូច្នេះក្នុងពិធីអបអរសាទរ ខួបលើកទី៨០ ទិវាឯករាជ្យជាតិ នៃសាធារណរដ្ឋសង្គមនិយមវៀតណាម ដែលរៀបចំឡើងដោយស្ថានទូតវៀតណាមប្រចាំកម្ពុជា នាល្ងាចថ្ងៃទី២១ ខែសីហា ឆ្នាំ២០២៥ នៅសណ្ឋាគារសូហ្វីតែលភូគីត្រាភ្នំពេញ ។

សម្តេចតេជោ បង្ហាញសេចក្តីរីករាយដោយបានកត់​សម្គាល់​ឃើញថា កិច្ចសហប្រតិបត្តិការគ្រប់ជ្រុងជ្រោយរវាងកម្ពុជា និងវៀតណាម មានការរីកចម្រើនឥតឈប់ឈរលើគ្រប់វិស័យ។ ក្នុងនោះ ទំហំពាណិជ្ជកម្មទ្វេភាគី មានការ​កើន​ឡើងគួរឱ្យកត់សម្គាល់ ដោយនៅឆ្នាំ២០២៤ វៀតណាម គឺជាដៃគូពាណិជ្ជកម្មលំដាប់​ទី៣ របស់កម្ពុជា ដោយមានទំហំពាណិជ្ជកម្មទ្វេភាគីជាង ១០ពាន់លាន​ដុល្លារ​អាមេ​រិក មានការកើនឡើងជាង ១៨ភាគរយ ធៀបនឹងឆ្នាំ២០២៣ ។

សម្តេចតេជោ បានបន្តថា ស្របតាមនិន្នាការកំណើនជាលំដាប់នេះ ប្រទេសទាំងពីរ ក៏បាន​ប្តេជ្ញាជំរុញកិច្ចសហប្រតិបត្តិការ ដើម្បីសម្រេចឱ្យបាន គោលដៅ ២០ពាន់លានដុល្លារ​អាមេរិកនាពេលខាងមុខ។ វៀតណាម ឈរនៅលំដាប់ទី៥ នៃការវិនិយោគបរទេស​នៅ​កម្ពុជា ហើយលំដាប់ទី២ បន្ទាប់ពីប្រទេសសិង្ហបុរី ក្នុងចំណោមប្រទេសសមាជិក​អាស៊ាន ។

សម្ដចបន្ថែមថា ចំនួនទេសចរវៀតណាម មកកម្ពុជា បានកើនឡើងជិត ៣២ភាគរយ ឈរនៅ​លំដាប់​ទី២។ មកដល់ពេលនេះ កម្ពុជា និងវៀតណាម មានជើងហោះហើរត្រង់ សរុប ១០០ជើង ក្នុងមួយសប្ដាហ៍ ប្រតិបត្តិការដោយក្រុម ហ៊ុនអាកាសចរណ៍វៀតណាម​ចំនួន​២ និងកម្ពុជាចំនួន២ ។

សម្តេចតេជោ ហ៊ុន សែន ក៏បានបង្ហាញការកត់សម្គាល់ ដោយពេញចិត្តផងដែរ ចំពោះ​ការប្ដេជ្ញារបស់ប្រទេសទាំងពីរ ក្នុងការជំរុញ​កិច្ច​សហប្រតិបត្តិការបន្ថែមទៀត នៅក្នុង​វិស័យ​គន្លឹះមួយចំនួនរួមមាន៖ ការពារជាតិ និងសន្តិសុខ អប់រំ សុខាភិបាល ថាមពល ទេសចរណ៍ វប្បធម៌ បច្ចេកវិទ្យា និងវិទ្យា​សាស្ត្រ។

បន្ថែមពីលើនោះ កម្ពុជា និង វៀត​ណាម បាននិងកំពុងធ្វើការយ៉ាងជិតស្និទ្ធជាមួយគ្នា និងគាំទ្រគ្នាទៅ​វិញ​ទៅមក ក្នុង​ក្រប​ខ័ណ្ឌតំបន់ និងអន្តរជាតិ រួមទាំងអង្គការសហប្រជាជាតិ អាស៊ាន និងក្របខ័ណ្ឌ​អនុ​តំបន់ផ្សេងទៀត ដែលមិនត្រឹមតែបម្រើផលប្រយោជន៍​រួមរបស់​ប្រទេស​ទាំងពីរ​ប៉ុណ្ណោះទេ ប៉ុន្តែថែមទាំងរួមចំណែក ដល់សន្តិភាព សន្តិសុខ ស្ថិរភាព និងការអភិវឌ្ឍ​ប្រកប​ដោយចីរភាពនៅទូទាំងពិភព​លោក ៕

អត្ថបទ៖ វណ្ណលុក
រូប៖ សួង ពិសិដ្ឋ