(ភ្នំពេញ)៖ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍ កាលពីរសៀលថ្ងៃទី២២ ខែសីហា ឆ្នាំ២០២៥ បានអញ្ជើញជួបសំណេះសំណាលជាមួយនិស្សិតជ័យលាភីអាហារូបករណ៍សិក្សានៅសាធារណរដ្ឋបារាំង សាធារណរដ្ឋឆែក សាធារណរដ្ឋប្រជាមានិតចិន សាធារណរដ្ឋកូរ៉េ សាធារណរដ្ឋអៀរឡង់ និងប្រទេសជប៉ុន សរុបចំនួន ១២៤រូប ។

ក្នុងពិធីសំណេះសំណាលនេះ ឯកឧត្តមរដ្ឋមន្រ្តី បានជម្រាបជូននិស្សិតជ័យលាភីអាហារូបករណ៍ អំពីវឌ្ឍនភាពថ្មីៗក្នុងវិស័យឌីជីថលនៅកម្ពុជា ការធ្វើទំនើបស្ថាប័នរដ្ឋ ការបណ្តុះបណ្តាលធនធានមនុស្សឌីជីថល (ការបណ្តុះបណ្តាលមន្រ្តីរាជការ វិស័យឯកជន និងសិស្ស-និស្សិត) ការកសាងមជ្ឈមណ្ឌលបច្ចេកវិទ្យាសហគមន៍ និងការចាប់យកបច្ចេកវិទ្យាឌីជីថលយ៉ាងឆាប់រហ័សនៅក្នុងសហគមន៍។

បន្ថែមលើនេះ ឯកឧត្តមរដ្ឋមន្រ្តី បានថ្លែងកោតសរសើរ និងលើកទឹកចិត្តដល់និស្សិតជ័យលាភីអាហារូបករណ៍ដែលនឹងបន្តការសិក្សានៅក្រៅប្រទេសឱ្យខិតខំក្រេបជញ្ជក់យកចំណេះដឹង និងបទពិសោធល្អៗ ដើម្បីពង្រឹងសមត្ថភាពផ្ទាល់ខ្លួនផង ក៏ដូចជាចូលរួមចំណែកជាមួយរាជរដ្ឋាភិបាលកម្ពុជាក្នុងការអភិវឌ្ឍសង្គមកម្ពុជាឱ្យរីកចម្រើនបន្ថែមទៀត ព្រមទាំងប្រកាន់ស្មារតីជាខ្មែរទោះស្ថិតក្នុងកាលៈទេសណាក៏ដោយ៕

ដោយ ៖ ង៉ាន់ ទិត្យ