កៀវ ៖ កងទ័ពអាកាសអ៊ុយក្រែនបាននិយាយនៅក្នុងសេចក្តីថ្លែងការណ៍មួយនៅថ្ងៃទី២៣ ខែសីហាថា យន្តហោះចម្បាំង MiG-29 របស់អ៊ុយក្រែន មានតម្លៃខ្ទង់ ៣០លានដុល្លារ បានធ្លាក់កាលពីថ្ងៃសៅរ៍ បណ្តាលឲ្យពីឡុតម្នាក់បាត់បង់ជីវិតភ្លាមៗ។

យោងតាមសេចក្តីថ្លែងការណ៍នៅលើផេកហ្វេសបុកកងទ័ពអាកាសអ៊ុយក្រែន បានឲ្យដឹងថា យន្តហោះចម្បាំងមួយគ្រឿងនេះបានជួបគ្រោះថ្នាក់ នៅពេលព្យាយាមចុះចតនៅលើដី បន្ទាប់ពីបេសកកម្មប្រយុទ្ធ។

យ៉ាងណាមិញ មូលហេតុនៅពីក្រោយករណីធ្លាក់យន្តហោះនេះកំពុងស្ថិតក្រោមការស៊ើបអង្កេត។ ឧប្បត្តិហេតុនេះកើតឡើងបន្ទាប់ពីអ៊ុយក្រែនទើបបាត់បង់យន្តហោះចម្បាំង Mirage-2000 កាលពីខែមុន ប៉ុន្តែសំណាងល្អ ពីឡុតបានចុចគន្លឹះសុវត្ថិភាពរួចផុតពីសេចក្តីស្លាប់៕

ប្រភព ៖ ស៊ីនហួរ ប្រែសម្រួល ៖ ឈឹម ទីណា