ក្រសួងសុខាភិបាល អំពាវនាវឱ្យស្ថាប័នពាក់ព័ន្ធចូលរួមសហការកាត់បន្ថយការនាំចូល និងប្រើប្រាស់សម្ភារៈដែលមានផ្ទុកសារធាតុ អាបេស្តុស
(ភ្នំពេញ)៖ ស្ថាប័នពាក់ព័ន្ធទាំងអស់ សូមចូលរួមសហការកាត់បន្ថយការនាំចូល និងប្រើប្រាស់សម្ភារៈដែលមានផ្ទុកសារធាតុអាបេស្តុស ជាពិសេសសម្ភារៈសំណង់ប្រើប្រាស់ប្រចាំថ្ងៃ ដែលអាចនាំឱ្យមានហានិភ័យខ្ពស់ដល់សុខភាពប្រជាជន។
ផលប៉ះពាល់សារធាតុអាបេស្តុស ដែលសារធាតុទាំងនេះនឹងបណ្តាលឱ្យកើតជំងឺមហារីកខ្ពស់ ដូចជា មហារីកសួត ផ្លូវដង្ហើមធ្ងន់ធ្ងរបំផុត។ ដូចនេះ ត្រូវចូលរួមគ្នាស្វែងយល់បន្ថែមពីសារៈសំខាន់ក្នុងការរកវិធាន ការពារយ៉ាងម៉ឹងម៉ាត់បំផុត ។ ទន្ទឹមនេះ ក្រសួងសុខាភិបាល បានលើកទឹកចិត្តយ៉ាងខ្លាំង ដល់ការប្រើប្រាស់សម្ភារៈ ជំនួយឱ្យសម្ភារៈអាបេស្តុស និងស៊ីលីការនេះ ក្នុងជំហរក្រសួងដែលគិតគូរពីលើកកម្ពស់សុខុមាលភាពប្រជាជន ក្នុងការកាត់បន្ថយអត្រាព្យាបាល ។
ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានថ្លែងអំពាវនាវដូចនេះ នាព្រឹកថ្ងៃទី២៧ ខែសីហា ឆ្នាំ២០២៥ ក្នុងពិធីបើកសិក្ខាសាលាបណ្តុះបណ្តាល ស្តីពីការធ្វើឱ្យប្រសើរឡើងនូវការធ្វើរោគវិនិច្ឆ័យ និងការឆ្លើយតបចំពោះជំងឺមហារីកដោយសារធាតុអាបេស្តុស និងធូលី ។
ឯកឧត្តមសាស្រ្តាចារ្យ បានសង្កត់ធ្ងន់ថា សារធាតុអាបេស្តុស និងស៊ីលីកា នឹងសម្លាប់ជីវិតមនុស្ស ក្នុងរយៈពេលយូរបំផុត ហើយឈានដល់ករណីជំងឺមហារីក។ នៅពីក្រោយនៃជំងឺមហារីក នឹងមានគ្រួសាររងគ្រោះ ដែលត្រូវបានបំផ្លាញទាំងស្រុងផងដែរ។
ឯកឧត្តមសាស្រ្តាចារ្យសង្ឃឹមថា សិក្ខាសាលានិងវគ្គបណ្តុះបណ្តាលជំនាញនេះ គឺជាការសហការរវាង ក្រសួងពាក់ព័ន្ធ នៅក្នុងប្រទេសកម្ពុជា និងរដ្ឋាភិបាលអូស្ត្រាលី ដើម្បីពិភាក្សា និងចូលរួមចែករំលែកនូវចំណេះដឹងបន្ថែមទៅលើឯកទេសដែលកំពុងអនុវត្តនាពេលបច្ចុប្បន្ន ហើយរៀបចំជាកម្រងព័ត៌មានជាតិអំពីសារធាតុអាបេស្តុស និងផែនការមេសុខភាពសុវត្ថិភាពការងារ ដែលមានផែនការសកម្មភាពថ្នាក់ជាតិសម្រាប់សារធាតុអាបេស្តុស (ឆ្នាំ២០២៣ ដល់ ២០២៧)។
ឯកឧត្តមសាស្រ្តាចារ្យរដ្ឋមន្រ្តី សូមថ្លែងអំណរគុណ ចំពោះការគាំទ្រទៅលើផលប៉ះពាល់ពីរដ្ឋាភិបាលប្រទេសអូស្ត្រាលី និងសូមអរគុណយ៉ាងជ្រាលជ្រៅដល់អ្នកជំនាញឯកទេសទាំងអស់អញ្ជើញមកពីប្រទេសអូស្ត្រាលី ដែលបានចំណាយពេលវេលាដ៏មានតម្លៃ ដើម្បីចូលរួមសិក្ខាសាលាបណ្តុះបណ្តាល និងចែករំលែកចំណេះដឹងដល់អ្នកជំនាញ និងក្រុមគ្រូពេទ្យនៅប្រទេសកម្ពុជា៕
ដោយ ៖ ហេង សម្បត្តិ+ថេត វិចិត្រ
