មន្រ្តីរដ្ឋបាលខេត្ត៖បង្កើនការរកឃើញអ្នកមានផ្ទុកមេរោគអេដស៍ថ្មីដើម្បីបញ្ចប់នូវការចម្លងមេរោគអេដស៍
បន្ទាយមានជ័យ៖សិក្ខាសាលាគណៈកម្មាធិការប្រយុទ្ធនឹងជំងឺអេដស៍ខេត្តស្តីពីបច្ចុប្បន្នភាព និងលទ្ធផលនៃការឆ្លើយតបនឹងមេរោគអេដស៍ក្នុងខេត្ត និងការអនុវត្តផែនការយុទ្ធសាស្ត្រ “រួមគ្នាពន្លឿនការឆ្លើយតប ដើម្បីបញ្ចប់ការចម្លងមេរោគអេដស៍ត្រូវបានប្រារព្ធនៅសាលប្រជុំក្រុមប្រឹក្សាខេត្តបន្ទាយមានជ័យ។
លោកវេជ្ជបណ្ឌិត គីលីន ពិសី ប្រធានកម្មវិធីអេដស៍ខេត្តបានឱ្យដឹងក្នុងសិក្ខាសាលាកាលពីថ្ងៃទី២៩ ខែសីហា ឆ្នាំ២០២៥ នូវលទ្ធផលការងារដែលសម្រេចបាន។
សូមជម្រាបថា សិក្ខាសាលាខាងលើបានបង្ហាញអំពីការវិភាគស្ថានភាពរីករាលដាលមេរោគអេដស៍និងលទ្ធផលអនុវត្តលើកម្មវិធីអេដស៍និងលើកទិសដៅអនុវត្តបន្ត ដើម្បីអនុវត្តពន្លឿនការឆ្លើយតបមេរោគអេដស៍ ជំងឺអេដស៍នៅខេត្តបន្ទាយមានជ័យ និងឈានសម្រេចគោលដៅ ៩៥:៩៥:៩៥ ឱ្យមានប្រសិទ្ធភាព។
អញ្ជើញចូលរួមក្នុងអង្គសិក្ខាសាលលោកស្រី រស់ សុផានី អភិបាលរងខេត្តបន្ទាយមានជ័យបានបញ្ជាក់ថា ការអនុវត្តផែនការយុទ្ធសាស្ត្រ “រួមគ្នាពន្លឿនការឆ្លើយតប ដើម្បីបញ្ចប់ការចម្លងមេរោគអេដស៍ចាំបាច់អនុវត្តបង្កើនការរកឃើញអ្នកមានផ្ទុកមេរោគអេដស៍ថ្មីដើម្បីបញ្ចប់នូវការចម្លងមេរោគអេដស៍ ។ ជាមួយនេះបន្តអប់រំផ្សព្វផ្សាយការបង្ការការចម្លងមេរោគអេដស៍ និងកាមរោគ ដោយការប្រើប្រាស់ស្រោម អនាម័យត្រឹម ត្រូវ ១០០% ។
លោកស្រីក៏បានផ្តល់សារៈសំខាន់ដល់កិច្ចសហការជាមួយក្រុមការងារ អាជ្ញាធរ អង្គការដៃគូពាក់ព័ន្ធ រួមទាំងជំរុញលើកទឹកចិត្តការធ្វើតេស្តឈាម ការប្រើប្រាស់សេវា ប្រឹក្សាផ្តល់ឱសថបង្ការនឹងការប្រឈមការឆ្លងមេរោគអេដស៍ក្នុងចំណោមក្រុមប្រឈមនិងផ្តល់ឱកាសឱ្យក្រុមគោលដៅចូលរួមទទួលការអប់រំការធ្វើតេស្តឈាមនិងទទួលសេវាបង្ការ ថែទាំជំងឺ អេដស៍និងកាមរោគ៕
ដោយ៖គៀន ច័ន្ទហ៊ីន
