ហាណូយ ៖ វៀតណាមបាននាំចេញអង្ករ ៥.៨៧លានតោន បានតម្លៃជាង ៣ពាន់លានដុល្លារ គិតត្រឹមពាក់កណ្តាលខែសីហា នេះបើតាមសមាគមស្បៀងអាហារវៀតណាម។

ទីភ្នាក់ងារព័ត៌មាន VN Express បានចុះផ្សាយ កាលពីថ្ងៃទី៤ ដោយដកស្រង់ ប្រភពពីសមាគម ឲ្យដឹងបន្ថែមថា ទំហំនេះមានកំណើន ជិត៣ភាគរយ បើធៀបនឹងរយៈពេលដូចគ្នា កាលពីឆ្នាំ២០២៤ ប៉ុន្តែ តម្លៃ វិញ ធ្លាក់ចុះ ១៦ភាគរយ។

លោក Do Ha Nam ប្រធានសមាគម ធ្លាប់បានកត់សម្គាល់ថា កំណើននាំចេញអង្ករ ៧ខែ គឺដោយសារតែមានជំហររឹងមាំ ក្នុងនាមជាប្រទេសនាំចេញអង្ករធំជាងគេ លំដាប់ទីពីរ របស់ពិភពលោក ព្រោះតែ អត្តសញ្ញាណម៉ាកយីហោ ផ្ទាល់ខ្លួន ព្រមទាំង កំណើននៃការទទួលស្គាល់ នៅលើទីផ្សារអន្តរជាតិ។ ការណ៍នេះ បង្ហាញទំនុកចិត្តថា ជាមួយនឹងលទ្ធផលដ៏រឹងមាំ ការនាំចេញអង្កររបស់វៀតណាម នឹងលើសពី ៨លានតោន នៅឆ្នាំ២០២៥នេះ។

យ៉ាងណាមិញ ពាណិជ្ជករ នៅទីក្រុងហូជីមិញ បានកត់សម្គាល់ថា ការផ្គត់ផ្គង់កំពុងរឹតបន្តឹង ខណៈទោះបីតម្រូវការនៅតែមានស្ថិរភាព ក្នុងនោះ ប្រទេសហ្វីលីពីន ដែលជាទីផ្សារសំខាន់ បានផ្អាកនាំចូល រយៈពេល៦០ថ្ងៃ ចាប់ផ្តើមពីថ្ងៃទី ១ ខែកញ្ញា តទៅ៕

ប្រភពពី VN Express ប្រែសម្រួល ៖ សារ៉ាត