(ភ្នំពេញ)៖ អ្នកនាំពាក្យក្រសួងបរិស្ថាន ឯកឧត្តម ខ្វៃ អាទិត្យា នៅថ្ងៃទី៩ ខែកញ្ញា ឆ្នាំ២០២៥ បានបញ្ជាក់ថា ក្នុងរយៈពេល១សប្តាហ៍ មានន័យថាចាប់ពីថ្ងៃទី១ ដល់ថ្ងៃទី៨ ខែកញ្ញា កន្លងមកនេះ គុណភាពខ្យល់ក្នុងបរិយាកាស នៅកម្ពុជា​នៅទូទាំងប្រទេស មានកំហាប់ភាគល្អិតនិចល PM 2.5 បានប្រែប្រួលតាមថ្ងៃ ក្នុងចន្លោះពី ៤,៦០ ដល់៦,៩៧ មីក្រូក្រាមក្នុងមួយម៉ែត្រគូប (µg/m3)។

មានន័យថាកម្ពុជាមានគុណភាពខ្យល់ គឺនៅតែ«ល្អណាស់» ក្រោមបន្ទាត់ក្រហម​នៃខ្យល់ពុលឆ្ងាយណាស់ ធៀបនឹងស្តង់ដារជាតិ ដែលកំណត់គឺ ៥០ µg/m3។ ដោយឡែក ស្ថានភាពគុណភាពខ្យល់ នៅក្នុងព្រះរាជាណាចក្រកម្ពុជា សម្រាប់​ថ្ងៃទី៨ ខែកញ្ញា ឆ្នាំ២០២៥ ចាប់ពីម៉ោង ៧ ព្រឹក ដល់ម៉ោង ៧ ព្រឹក ថ្ងៃទី៩ ខែកញ្ញា ឆ្នាំ២០២៥ ដែលមានកំហាប់ភាគល្អិតនិចលគិតជាមធ្យមស្មើនឹង ៥.១៧ µg/m3 ធៀបនឹងស្តង់ដារ ៥០ µg/m3 និងគិតជាសន្ទស្សន៍គុណភាពខ្យល់ (Air Quality Index) គឺ “ល្អណាស់”។

សូមបញ្ជាក់ថា ឆ្លើយតបទៅនឹងយុទ្ធនាការដើម្បីភាពស្អាតផ្ទៃមេឃ ដែលជាផ្នែកមួយ​ដែលបានដាក់ចេញក្នុងសសរស្តម្ភទី១ នៃយុទ្ធសាស្រ្តចក្រាវិស័យបរិស្ថាន និង​យុទ្ធនាការ «ផ្ទៃមេឃពណ៌ខៀវ» ក្រសួងបរិស្ថានបានបំពាក់ឧបករណ៍ និង​ស្ថានីយតាមដានត្រួតពិនិត្យគុណភាពខ្យល់ ស្វ័យប្រវត្តិនៅទូទាំងរាជធានី ខេត្តចំនួន ៥៩ទីតាំង រថយន្តចល័តត្រួតពិនិត្យគុណភាពខ្យល់ ចំនួន៣គ្រឿង និងឧបករណ៍​តាមដានត្រួតពិ​និត្យគុណភាពខ្យល់ពីផ្កាយរណប ចំនួន១គ្រឿង។ ទិន្នន័យ​ទទួល​បានពីឧបករណ៍ និងស្ថានីយតាមដានគុណភាពខ្យល់ត្រូវបាន​ផ្សព្វផ្សាយ ជូនសា​ធារណៈបានទាន់ពេលវេលា និងប្រកបដោយប្រសិទ្ធភាព និងទទួលបានការគាំទ្រ​ពីប្រជាពលរដ្ឋ។

ជាមួយគ្នានេះ លើសពីនេះសាធារណជន អាចតាមដានគុណភាពខ្យល់ប្រចាំថ្ងៃ របស់កម្ពុជាតាមរយៈ វេបសាយ(Website): airquality.moe.com.kh, ផេកហ្វេសប៊ុក (Facebook): Ministry of Environment, ប្រព័ន្ធ APPចក្រា: CGS SPA បន្ទាប់មកសាធារណជនអាចចូលទៅប្រអប់«គុណភាពខ្យល់» លោកអ្នក​អាចចុញលើទីតាំងណាមួយលើផែនទីកម្ពុជា ដែលបានបង្ហាញដោយ​សញ្ញាសម្គាល់​៕

ដោយ៖ង៉ាន់ ទិត្យ