ឯកឧត្តម ហ៊ុន ម៉ានី៖ កម្មវីធីពិព័រណ៍ផលិតផលខ្មែរ ដែលនឹងប្រព្រឹត្តទៅនាពេលខាងមុខនេះ ដើម្បីបង្ហាញនូវស្មារតីនៃការរួបរួម សាមគ្គីឯកភាពគ្នា ក្នុងការគាំទ្រផលិតផលខ្មែរ
(ភ្នំពេញ)៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា កាលល្ងាចថ្ងៃទី១០ ខែកញ្ញា ឆ្នាំ២០២៥ បានអញ្ជើញដឹកនាំកិច្ចប្រជុំជាមួយរចនាសម្ព័ន្ធ ស.ស.យ.ក. ទូទាំងប្រទេស ដើម្បីផ្តល់ព័ត៌មាន និងផ្សព្វផ្សាយអំពីកម្មវិធីពិព័រណ៍ផលិតផលខ្មែរ ដែលនឹងប្រព្រឹត្តទៅនាពេលខាងមុខនេះ។ កិច្ចប្រជុំនេះមានការចូលរួមពី សមាជិក សមាជិកា ស.ស.យ.ក. រចនាសម្ព័ន្ធទូទាំងប្រទេសសរុបប្រមាណ ៣៣០ នាក់ តាមរយៈប្រព័ន្ធអនឡាញ Zoom។
ឯកឧត្តមប្រធានបានមានប្រសាសន៍ សួរសុខទុក្ខ និងសំណេះសំណាលជាមួយសមាជិក សមាជិកា រចនាសម្ព័ន្ធ ស.ស.យ.ក. ទូទាំងប្រទេស។ ឯកឧត្តមបានគូសបញ្ជាក់ថា កិច្ចប្រជុំថ្ងៃនេះ ត្រូវបានរៀបចំឡើងដើម្បីផ្តល់ព័ត៌មាន និងធ្វើបទបង្ហាញអំពីកម្មវីធីពិព័រណ៍ផលិតផលខ្មែរ ដែលនឹងប្រព្រឹត្តទៅនាពេលខាងមុខនេះ និងយកជាឱកាសដើម្បីអំពាវនាវឲ្យសមាជិក សមាជិកា ស.ស.យ.ក ទាំងអស់ត្រៀមខ្លួនមកចូលរួមក្នុងកម្មវិធីដើម្បីបង្ហាញនូវស្មារតីនៃការរួបរួម សាមគ្គីឯកភាពគ្នា ក្នុងការគាំទ្រផលិតផលខ្មែរ។
ឯកឧត្តមបានលើកឡើងថា សហភាពសហព័ន្ធយុវជនកម្ពុជា (ស.ស.យ.ក.) តែងតែចូលរួមចំណែកជាមួយរាជរដ្ឋាភិបាលក្នុងពេលដែលប្រទេសជាតិជួបវិបិត្ត តាមលទ្ធភាពដែលអាចធ្វើបាន។ មិនខុសពីសព្វមួយដង កម្មវិធីពិព័រណ៍ផលិតផលខ្មែរ គឺយើងចង់ប្រមូលបងប្អូនខ្មែរ សមាជិក សមាជិកា ទាំងអស់ មកកន្លែងមួយរួមគ្នានាំយកស្មារតីតែមួយ គាំទ្រដល់រាជរដ្ឋាភិបាល និងកងកម្លាំងរបស់យើង។ ឯកឧត្តមបានបន្ថែមថាការចូលរួមរបស់ថ្នាក់ដឹកនាំ សមាជិកា ស.ស.យ.ក. មិនត្រឹមតែជាការមកមើលការតាំងពិព័រណ៍ប៉ុណ្ណោះទេ តែវត្តមានរបស់អ្នកទាំងអស់គ្នា គឺជាសម្លេងដ៏រឹងមាំ ក្នុងការបង្ហាញស្មារតីស្នេហាជាតិ និងការគាំទ្រឥតងាករេដល់រាជរដ្ឋាភិបាល និងកងកម្លាំងរបស់យើង។
អង្គប្រជុំ បានបញ្ចប់ដោយស្មារតីភាតរៈ និងទទួលធាតុចូលពីសំណាក់ឯកឧត្តម លោកជំទាវ លោក លោកស្រី ដែលជាសមាជិក សមាជិកា មកពីរចនាសម្ព័ន្ធទូទាំងប្រទេស ដែលម្នាក់ៗ បានបង្ហាញពីការតាំងចិត្ត និងការត្រៀមខ្លួនរួចជាស្រេចដើម្បីចូលរួម និងផ្សព្វផ្សាយអំពីកម្មវិធីពិព័រណ៍ផលិតផលខ្មែរ៕
ដោយ៖ង៉ាន់ ទិត្យ
