ប៊ុលហ្គារី៖ ក្នុងជំនួបសម្តែងការគួរសមនៅ Sofia រវាង ឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជា និង ឯកអគ្គរដ្ឋទូត ​នៃ​សាធារណរដ្ឋ​ហេលេនីក ​នៃ​ប្រទេស​ក្រិក​ប្រចាំ​ប្រទេស​ប៊ុលហ្គារី នៅថ្ងៃទី ១០ ខែកញ្ញា ឯកឧត្តមបណ្ឌិត ជា ច័ន្ទបរិបូរណ៍ បង្ហាញពីកង្វល់ក្នុងតំបន់ ប្រាប់ឯកឧត្តម Alexios Marios Liberopoulos ថា បញ្ហាព្រំដែនជាមួយប្រទេសថៃ គឺកម្ពុជាមានជំហរ ដោះស្រាយវិវាទតាមរយៈផ្លូវច្បាប់ ជាពិសេសតុលាការយុត្តិធម៌អន្តរជាតិ (ICJ) ហើយថាសង្គ្រាមមិនមែនជាជម្រើសរបស់កម្ពុជានោះទេ។ ទោះបីជាកម្ពុជាបានប្តេជ្ញាចិត្តចំពោះកិច្ចព្រមព្រៀងឈប់បាញ់គ្នាកាលពីថ្ងៃទី ២៨ ខែកក្កដា នៅប្រទេសម៉ាឡេស៊ីក៏ដោយ ក៏ភាគីថៃ មិនបានគោរពកិច្ចព្រមព្រៀងនេះ ហើយនៅតែបន្តបង្កឧប្បត្តិហេតុផ្សេងៗទៀត។

ឯកឧត្តមបណ្ឌិត ជា ច័ន្ទបរិបូរណ៍ ចែករំលែកឯកសាររួមមាន សេចក្តី​ថ្លែងការណ៍​របស់​ក្រសួង​វប្បធម៌ និង​វិចិត្រសិល្បៈ ទាក់ទង​នឹង​ការ​ខូចខាត​ប្រាសាទ​ព្រះវិហារ។ កម្លាំង​ថៃ​ប្រើ​ក្នុង​ជម្លោះ​កម្ពុជា​-​ថៃ​ទល់​នឹង​កម្ពុជា​។ កម្ពុជា​ស្នើ​ឱ្យ​​បង្កើត​កម្មវិធី​ផ្លាស់​ប្តូរ​និស្សិត​ដើម្បី​លើក​កម្ពស់​ការ​យល់​ដឹង​វប្បធម៌ និង​ការ​ពង្រឹង​វិស័យ​អប់រំ​ដល់​យុវជន​ជំនាន់​ក្រោយ។ ឯកឧត្តមបង្ហាញចំណាប់អារម្មណ៍លើការសហការជាផ្លូវការលើវិស័យទេសចរណ៍ តាមរយៈអនុស្សរណៈនៃការយោគយល់គ្នា (MoU) ក្នុងគោលបំណងសម្រួលដល់ការធ្វើដំណើរទៅវិញទៅមក និងកញ្ចប់ដំណើរទេសចរណ៍រួមគ្នានៃប្រទេសទាំងពីរ។ ឯកឧត្តម Alexios Marios Liberopoulos បានសម្តែងនូវឆន្ទៈជួយរាល់បញ្ហានានា ពីភាគីកម្ពុជា និង​ទទួល​ស្គាល់​ពី​កង្វល់​ដែល​បាន​លើក​ឡើង​ទាក់ទង​នឹង​ជម្លោះ​ព្រំដែន​កម្ពុជា-ថៃ។

ក្នុងនាមរាជរដ្ឋាភិបាលកម្ពុជា ឯកឧត្តមបណ្ឌិត ជា ច័ន្ទបរិបូរណ៍ បានបញ្ជាក់ជាថ្មីពីការប្តេជ្ញាចិត្តរបស់ខ្លួនក្នុងការពង្រឹងបន្ថែមទៀតនូវទំនាក់ទំនងទ្វេភាគី និងពង្រឹងកិច្ចសហប្រតិបត្តិការក្នុងក្របខ័ណ្ឌ ពហុភាគី។ ទំនាក់ទំនងរវាងកម្ពុជា និងក្រិកលើវិស័យផ្សេងៗ ក្នុងស្មារតីនៃភាពជាដៃគូយុទ្ធសាស្ត្រអាស៊ាន-សហភាពអឺរ៉ុប មានការរីកចម្រើន និងបានសង្កត់ធ្ងន់លើសក្តានុពលដ៏រឹងមាំសម្រាប់ការពង្រីកកិច្ចសហប្រតិបត្តិការរវាងកម្ពុជា និងក្រិក ជាពិសេសលើវិស័យទេសចរណ៍ និងពាណិជ្ជកម្ម ដោយឈរលើមូលដ្ឋាននៃការគោរពគ្នាទៅវិញទៅមក និងផលប្រយោជន៍រួម។ ឯកឧត្តមបានគូសបញ្ជាក់ពីសារៈសំខាន់នៃទំនាក់ទំនងការទូតក្នុងការជំរុញសុច្ឆន្ទៈ និងការយល់ដឹង ដោយលើកឡើងពីតួនាទីនៃព័ត៌មាន និងទំនាក់ទំនងជាស្ពានដ៏សំខាន់រវាងប្រជាជាតិនានា។

ឯកឧត្តមបណ្ឌិត ជា ច័ន្ទបរិបូរណ៍ ជូនវត្ថុអនុស្សាវរីយ៍ដល់ ឯកឧត្តម  Alexios Marios Liberopoulos បង្ហាញអំពីក្រមាដែលជាក្រណាត់ត្បាញដោយដៃប្រពៃណីខ្មែរ និងតែផ្កាម្លិះរុក្ខជាតិដែលលាយជាមួយនឹងផ្កាម្រេចកំពតធម្មជាតិ។ អំណោយនេះបានឆ្លុះបញ្ចាំងពីបេតិកភណ្ឌវប្បធម៌ដ៏សម្បូរបែបរបស់កម្ពុជា និងស្មារតីការទូតដ៏កក់ក្តៅ៕