សៀមរាប​៖ក្រុមគ្រួសារវីរកងទ័ពកម្ពុជា ដែលត្រូវបានទាហានថៃចាប់ខ្លួន​ដោយខុសច្បាប់ក្រោយបទឈប់បាញ់​បានទទួល​អំណោយ​សប្បុរស​ធម៌ពីក្រុមកីឡាករប្រកួតវាយសីមិត្តភាពក្លិបហ្គូដ ថាម( Good Time)​នៅរាជធានីភ្នំពេញ តាមរយៈ​រដ្ឋបាលខេត្តសៀមរាប។ពិធីប្រគល់​អំណោយ​បានប្រព្រឹត្តកាលពីព្រឹកថ្ងៃទី ១៣ ខែកញ្ញា ឆ្នាំ២០២៥ នៅសាលា​ខេត្ត​សៀមរាបដោយមានអញ្ជើញចូលរួមពីលោក លី សារី អភិបាលរងខេត្ត​សៀមរាប ឧត្តមសេនីយ៍ទោ ហាក់ ឆេងហួត នាយរងយោធភូមិភាគទី៤ ទទួលបន្ទុកមេរងទិសទី១ប្រាសាទព្រះវិហារ ព្រមទាំងក្រុមសប្បុរសជន​ក្លិបហ្គូដ ថាម។

គប្បីជម្រាបជូនថា ក្រុមគ្រួសាររបស់កងទ័ពកម្ពុជាដែលត្រូវចាប់ខ្លួនបន្ទាប់​ពីបទឈប់បាញ់ដោយភាគីថៃកាលពីថ្ងៃទី ២៩ ខែកក្កដា ឆ្នាំ២០២៥មាន​ចំនួន២០រូប( ២រូបត្រូវបានដោះលែងរួចហើយ)បានទទួលអំណោយ​ជាច្រើនប្រភេទ រួមមាន សម្ភារៈប្រើប្រាស់ប្រចាំថ្ងៃ និងថវិកាមួយចំនួន។

សំដៅលើការជូនអំណោយ និងការសួរសុខទុក្ខដល់ក្រុមគ្រួសារកងទ័ព​ដែល​ត្រូវចាប់ខ្លួនដោយទាហានថៃនោះ លោក​អភិបាល​រងខេត្តសៀមរាប​បានបញ្ជាក់ថា នេះគឺជាការលើកទឹកចិត្ត និងផ្ដល់កម្លាំងចិត្តដល់​គ្រួសារ​ដែលកំពុងព្រួយបារម្ភ។ ការជួបផ្ទាល់បែបនេះបង្ហាញថា គ្រួសារកងទ័ព​មិនត្រូវបានបំភ្លេចឡើយ ប៉ុន្តែជាការបង្ហាញពីសាមគ្គីភាព ការដឹងគុណ និងទំនួលខុសត្រូវរបស់សង្គមចំពោះវីរបុរសជាតិ។អំណោយនេះ​ជា​និមិត្តរូបនៃការរួមគ្នារវាងប្រជាពលរដ្ឋ និងកងទ័ព បញ្ជាក់ថាកងទ័ពមិន​ឈរតែឯងទេ។សកម្មភាពនេះជួយបង្កើនស្មារតីស្នេហាជាតិ និងបង្ហាញ​ពីការរួមគ្នារវាងយោធា និងស៊ីវិល ក្នុងការកសាង និងការពារប្រទេសជាតិ។នេះជាជំនួយជាក់ស្តែងក្នុងការទ្រទ្រង់ជីវភាពប្រចាំថ្ងៃរបស់គ្រួសារទ័ព។

លោកអភិបាលរងខេត្តបានប្រាប់ដល់ក្រុមគ្រួសារទ័ពទាំងអស់ថា មិនត្រូវ​បារម្ភទេ ពីព្រោះរាជរដ្ឋាភិបាល និងអាជ្ញាធរគ្រប់​លំដាប់កំពុងខិតខំដោះ​ស្រាយបញ្ហានេះតាមយន្តការផ្លូវការដើម្បីធានាបាននូវសុវត្ថិភាព និងការ​វិល​ត្រឡប់របស់កង​ទ័ពមកកាន់គ្រួសារវិញ៕
ដោយ៖​ប៊ុន​ រដ្ឋា