ប្រជាជនរងគ្រោះដោយទឹកជំនន់ជាងមួយពាន់គ្រួសារនៅស្រុកសេសាន និងស្រុកថាឡាបរីវ៉ាត់បានទទួលអំណោយពីកាកបាទក្រហមកម្ពុជា
ស្ទឹងត្រែង៖សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាបានចាត់ឱ្យលោក យូ ឡាណា អគ្គលេខាធិការរងទី២ កាកបាទក្រហមកម្ពុជា អញ្ជើញសួរសុខទុក្ខ និងនាំយកអំណោយមនុស្សធម៌ជួយសម្រាលការលំបាកជូនប្រជាជនរងគ្រោះដោយទឹកជំនន់ចំនួន ១.០១៩គ្រួសារ រស់នៅក្នុងភូមិចំនួន២២ ឃុំចំនួន៩ នៃស្រុកសេសាន និងស្រុកថាឡាបរីវ៉ាត់ ខេត្តស្ទឹងត្រែង ។
ក្នុងសកម្មភាពកាលពីព្រឹកថ្ងៃទី២ ខែតុលា ឆ្នាំ២០២៥លោក យូ ឡាណា អគ្គលេខាធិការរងទី២កាកបាទក្រហមកម្ពុជា បាននាំនូវព្រះបណ្ដាំរបស់សម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត និងប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ ក្តីនឹករលឹក អាណិត ស្រឡាញ់ដ៏ជ្រាលជ្រៅជាមួយប្រជាជនទាំងអស់ រួមជាមួយការសោកស្តាយចំពោះគ្រោះធម្មជាតិជំនន់ទឹកភ្លៀងដែលបានប៉ះពាល់ដល់ជីវភាពរស់នៅប្រចាំថ្ងៃរបស់ប្រជាជន ក៏ដូចជាបងប្អូនជនជាតិដើមភាគតិចដែលរស់នៅទីនេះ ។
ទន្ទឹមនឹងការគិតគូរពីជីវភាពតាមរយៈឯកឧត្តម យូ ឡាណា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏បានផ្តាំផ្ញើដល់បងប្អូនប្រជាជនទាំងអស់សូមយកចិត្តទុកដាក់ថែទាំសុខភាពឱ្យបានល្អ ដោយត្រូវផ្លាស់ប្តូរឥរិយាបថក្នុងការស់នៅ និងការហូបចុក ដោយត្រូវមានអនាម័យជាប់ជានិច្ច។
អំណោយដែលផ្តល់ជូនក្នុងមួយគ្រួសារៗទទួលបាន អង្ករ ៣០គីឡូក្រាម, មីមួយកេស, ត្រីខ ១០កំប៉ុង, ទឹកត្រី ៦ដប, ប្រេងឆាមួយដប, ម្សៅសាប៊ូមួយកញ្ចប់ និងឃីត (មុង ភួយ សារុង ក្រមា)មួយកញ្ចប់។ ដោយឡែក កាកបាទក្រហមកម្ពុជា ក៏បានឧបត្ថម្ភថ្នាំពេទ្យប្រភេទបញ្ចុះកម្តៅ និងបំបាត់ការឈឺចាប់ ចំនួន ២កេស ជូនដល់មណ្ឌលសុខភាពតាឡាត ផងដែរ។
សូមជម្រាបជូនថា នៅថ្ងៃទី៣ ខែតុលាក្រុមការងារកាកបាទក្រហមកម្ពុជា ពីទីស្នាក់ការកណ្តាល និងសាខាខេត្តស្ទឹងត្រែង នឹងបន្តចុះចែកអំណោយជូនប្រជាជនរងគ្រោះដោយទឹកជំនន់ចំនួន ៤៨១គ្រួសារបន្ថែមទៀត ដែលរស់នៅក្នុងភូមិចំនួន១០ នៃឃុំកំភុន ឃុំភ្លុក និងឃុំសាមឃួយ ស្រុកសេសាន ខេត្តស្ទឹងត្រែង៕
ដោយ៖គ្រី សម្បត្តិ
