ញូវ ដែល្លី ៖ ឥណ្ឌាគ្រោងនឹងទិញប្រព័ន្ធការពារដែនអាកាស S-400 ពីប្រទេសរុស្ស៊ី ចំនួន៥គ្រឿង បន្ថែមទៀត អំឡុងដំណើរទស្សនកិច្ច របស់លោក វ្ល៉ាឌីមៀ ពូទីន នៅទីក្រុង ញូវ ដែល្លី នាដើមខែធ្នូ ខាងមុខនេះ។

យោងតាមការចេញផ្សាយ របស់ទីភ្នាក់ងារព័ត៌មាន RT កាលពីថ្ងៃទី៦ ខែតុលា បានឲ្យដឹងថា S-400 បានដើរតួនាទីយ៉ាងសំខាន់ ក្នុងការការពារមូលដ្ឋានទ័ពអាកាស របស់ឥណ្ឌា និងការដំឡើងកម្រិតយោធាផ្សេងទៀត ប្រឆាំងនឹងការវាយប្រហារ របស់ប៉ាគីស្ថាន ក្នុងអំឡុងពេល នៃការប្រឈមមុខដាក់គ្នា រយៈពេល៤ថ្ងៃ រវាងប្រទេសជិតខាង នៅអាស៊ីខាងត្បូង ទាំងពីរ កាលពីខែឧសភា។

នាយករដ្ឋមន្ត្រីឥណ្ឌា លោក Narendra Modi បានសរសើរពីសមត្ថភាពការពារដែនអាកាសរបស់ប្រទេស ជាពិសេស ការអនុវត្តប្រព័ន្ធការពារដែលផលិតដោយរុស្ស៊ី ។

ឥណ្ឌាបានទទួលបានការផ្គត់ផ្គង់ S-400 ចំនួន៣គ្រឿង រួចមកហើយ ក្នុងចំណោម៥គ្រឿង ដែលខ្លួនបានទិញ ពីប្រទេសរុស្ស៊ី ក្នុងតម្លៃ ៥.៤៣ ពាន់លានដុល្លារ ក្នុងឆ្នាំ២០១៨។ នៅសល់ ២គ្រឿងទៀត គ្រោងនឹងដឹកជញ្ជូនឲ្យ នៅឆ្នាំ២០២៦។

ក្រៅពីប្រព័ន្ធ S-400 រដ្ឋាភិបាលទីក្រុង ញូវ ដែល្លី ក៏កំពុងស្វែងរកទិញមីស៊ីល RVV-BD ពីប្រទេសរុស្ស៊ី ដែលបាញ់បានចម្ងាយ ២០០គីឡូម៉ែត្រ ដើម្បីផ្តល់ថាមពល ដល់យន្តហោះចម្បាំង ប្រភេទ Su-30 MKI របស់ខ្លួន។

បច្ចុប្បន្ន យោធាឥណ្ឌា ពឹងផ្អែកយ៉ាងខ្លាំងលើសព្វាវុធ ដែលផលិតដោយរុស្ស៊ី ក្នុងនោះ ប្រហែល ៦០% នៃឃ្លាំងអាវុធ របស់ប្រទេសនេះ ត្រូវបានផលិតដោយ ដៃគូ ភាគខាងជើង មួយនេះ។

ជុំវិញការទិញ S-400 បន្ថែម នេះដែរ ទីភ្នាក់ងារព័ត៌មាន Hindustantimes បានចេញផ្សាយថា
មន្ត្រីក្រសួងការពារជាតិឥណ្ឌា និង រុស្ស៊ី ត្រូវជួបគ្នា នៅក្នុងសប្តាហ៍នេះ សម្រេចលើការបញ្ជាទិញ មុនពេលដែល ប្រធានាធិបតីរុស្ស៊ី លោក វ្ល៉ាឌីមៀ ពូទីន នឹងហោះទៅដល់ប្រទេសឥណ្ឌា នៅថ្ងៃទី ៥ ខែធ្នូ ដើម្បីរៀបចំកិច្ចប្រជុំកំពូលប្រចាំឆ្នាំ ជាមួយនាយករដ្ឋមន្រ្តីឥណ្ឌា លោក Narendra Modi ។

ប្រភពបានបញ្ជាក់ថា ឥណ្ឌាចង់ទិញបន្ថែម ដើម្បីការពារ ទប់ស្កាត់ការវាយប្រហារណាមួយ នៅទូទាំងឆ្នេរសមុទ្រ ៧០០០ គីឡូម៉ែត្រ បន្ថែមទៀត និង ដើម្បីបិទគម្លាតការពារដែនអាកាស នៅក្នុងតំបន់បញ្ជាការ ភាគខាងជើង៕

ប្រភពពី RT, Hindustantimes ប្រែសម្រួល៖ សារ៉ាត