ព្រះវិហារ៖ ផ្ទៃដីកសិកម្មចំនួន៤៨២ហិកតា នៃដំណាំស្រូវនិងដំណាំ​ដំឡូងមី និងកសិករចំនួន ៣១៦គ្រួសារ បាន​រងគ្រោះពី​ជំនន់​ទឹកភ្លៀង​នារដូវវស្សានេះ។

ជាការគិតគូរ អាជ្ញាធរខេត្ត និងគណៈកម្មាធិការគ្រប់គ្រងគ្រោះ​មហន្តរាយខេត្តព្រះវិហារ បានត្រៀមរួចជាស្រេចដើម្បី​ស្តារឡើងវិញ​រួមទាំងហេដ្ឋារចនាសម្ព័ន្ធនានា បន្ទាប់ពីជំនន់ទឹកភ្លៀងបាន​ស្រក​ចុះអស់។

គណៈកម្មាធិការគ្រប់គ្រងគ្រោះមហន្តរាយខេត្តព្រះវិហារបានបង្ហាញនៅក្នុងរបាយការណ៍របស់ខ្លួនថា ស្ថានភាព​ទឹកភ្លៀង​ក្នុងខេត្តប់តាំង​ពីដើមរដូវវស្សារហូតដល់ថ្ងៃទី៧ ខែតុលា កន្លងទៅនេះ ខេត្តទាំង​មូលបាន​ទទួលបរិមាណ​ទឹកភ្លៀងសរុប ១៥៤៤.៣មីលីម៉ែត្រ ដែលជាកម្រិតមួយខ្ពស់គួរឱ្យកត់សម្គាល់ បើប្រៀបធៀបទៅនឹង​បណ្តាឆ្នាំមុនៗ។
ចំពោះស្ថានភាពទឹកនៅអាងទឹករក្សាវិញ​កម្ពស់​​ទឹកមានត្រឹម ១២.៣៥ម៉ែត្រ ដែលនៅទាបជាង​កម្ពស់ប្រកាស​អាសន្ន​ក្នុងកម្ពស់ ១៤ម៉ែត្រ ហើយបានស្រកចុះ០.១៥ម៉ែត្រ បើធៀបនឹង​ស្ថានភាព​កាលពីថ្ងៃទី៦ ខែតុលា ដែលជាសញ្ញា​ល្អមួយនៃការថមថយបន្ទាប់​ពីមានការកើនឡើងជាប់ៗគ្នា ។

របាយការណ៍ដដែលបានគូសរំលេចថា ទឹកបានស្រកចុះបន្តិច​មែនតែផលប៉ះពាល់​ដែល​បង្កឡើងដោយជំនន់ទឹកភ្លៀង​កន្លងមកនៅតែជាកង្វល់ចម្បង។គិតត្រឹមថ្ងៃទី៧ ខែតុលាស្រុក​ចំនួនបួនក្នុងខេត្ត រួមមាន៖ ស្រុកជ័យសែន ស្រុករវៀង ស្រុកជាំក្សាន្ត និងស្រុកត្បែងមានជ័យដំណាំស្រូវលើផ្ទៃដីសរុប ៣៤៤ហិកតា ត្រូវបានទឹកជន់លិច និងបានប៉ះពាល់​ដល់ប្រជាកសិករ ២២៥គ្រួសារ ,ដំណាំដំឡូងមីប៉ះពាល់លើផ្ទៃដី ១២៨ហិកតានិងបានប៉ះពាល់​ដល់កសិករ ៩១គ្រួសារ។

មិនព្រងើយកន្តើយ អាជ្ញាធរពាក់ព័ន្ធក្នុងខេត្តព្រះវិហារនៅតែ​បន្តតាម​ដានយ៉ាងយកចិត្តទុកដាក់ ចំពោះស្ថានភាពទឹក ដើម្បីធានាសុវត្ថិភាព​ប្រជាពលរដ្ឋ និងត្រៀមអន្តរាគមន៍បន្ទាន់ ដល់ប្រជាពលរដ្ឋដែល​រងគ្រោះ ត្រៀមស្តារឡើងវិញ​នូវហេដ្ឋារចនាសម្ព័ន្ធដែលខូចខាត។ ត្រៀមផ្តល់ជំនួយ និងអន្តរាគមន៍ដល់ដំណាំកសិកម្ម ដែលរងការ​ខូចខាត នៅពេល​ដែលទឹកជំនន់បានស្រកចុះអស់៕

ដោយ៖ឡុង សំបូរ