(កណ្ដាល)៖ ក្នុងពិធីប្រគល់ម៉ូតូចំនួន ៣៥គ្រឿង អំណោយរបស់ ឯកឧត្តម កិត្តិសង្គហបណ្ឌិត ហ៊ីង ប៊ុនហៀង សមាជិកគណៈអចិន្ត្រៃយ៍គណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានស្រុកកណ្តាលស្ទឹង ជូនសិស្សប្រឡងជាប់និទ្ទេសA ទូទាំងស្រុកកណ្តាលស្ទឹង ចំនួន ៣៥នាក់ និងសំណេះសំណាលជាមួយលោកគ្រូ អ្នកគ្រូ សិស្សប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៥ នាព្រឹកថ្ងៃទី១២ ខែតុលា ឆ្នាំ២០២៤ ឯកឧត្តម ណុប រ័ត្ននិមល បានចាត់ទុកសិស្សានុសិស្ស ដែលប្រឡងជាប់សញ្ញាបត្រមធ្យមសិក្សាទុតិយភូមិ ឆ្នាំសិក្សា ២០២៤-២០២៥ ពិសេសសិស្សជាប់និទ្ទេសA នាពេលនេះ គឺជាធនធានមនុស្សមួយ សម្រាប់ចូលរួមក្នុងការអភិវឌ្ឍប្រទេសជាតិ ឲ្យកាន់តែរីកចម្រើនជាបន្តទៀត ក្រោមម្លប់សន្តិភាពរបស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចនាយករដ្ឋមន្ត្រី ហ៊ុន ម៉ាណែត ។

ឯកឧត្តមមានប្រសាសន៍ថា រាជរដ្ឋាភិបាល នីតិកាលទី ៧ នៃរដ្ឋសភា បានចាត់ទុកការអភិវឌ្ឍមូលធនមនុស្សជាអាទិភាពទី១ ក្នុងយុទ្ធសាស្រ្តបញ្ចកោណ ដំណាក់កាលទី ១ និង បានកំណត់អាទិភាពគន្លឹះ ៥ គឺមនុស្ស ផ្លូវ ទឹក ភ្លើង និង បច្ចេកវិទ្យា សំដៅការពារថែរក្សាពូនជ្រំសមិទ្ធផលជាតិ និងជំរុញសន្ទុះកំណើនសេដ្ឋកិច្ច ធ្វើឱ្យកម្ពុជាប្រែក្លាយជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងកសាងមូលដ្ឋានឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០ ប្រែក្លាយជាប្រទេសចំណូលកម្រិតខ្ពស់។

ឯកឧត្តម ណុប រ័ត្ននិមល ក៏បានសំណូមពរដល់លោកគ្រូអ្នកគ្រូ យកចិត្តទុកដាក់អប់រំនិងបង្រៀន ពិសេសក្មួយៗសិស្សានុសិស្សនៅទូទាំងស្រុកណ្តាលស្ទឹង ត្រូវបន្តខិតខំសិក្សារៀនសូត្រ ដើម្បីក្លាយខ្លួនជាមនុស្សល្អ ជាទំពាំងស្នងឬស្សី ក្នុងអភិវឌ្ឍជាតិ និងបានអំពាវនាវដល់អាជ្ញាធរដែនដី កងកម្លាំងប្រដាប់អាវុធ និងប្រជាពលរដ្ឋ ទូទាំងស្រុកកណ្តាលស្ទឹង ត្រូវបន្តការចូលរួមថែរក្សាសុខសន្តិភាព ដែលយើងកំពុងមានក្នុងពេលបច្ចុប្បន្ន ឲ្យបានគង់វងសម្រាប់កូនចៅជំនាន់ក្រោយ  ដោយបន្តទទួលផ្លែផ្កាពីកត្តាសន្តិភាពដែលយើងរកបានយ៉ាងលំបាកនេះ ហើយកុំជឿការញ៉ួសញ៉ងពីក្រុមអគតិមួយចំនួនតូច ដែលមានបំណងបំប៉ែកបំបាក់ដល់សុខសន្តិភាពនៅកម្ពុជា។

យោងតាមរបាយការណ៍របស់លោកអភិបាលស្រុកកណ្តាលស្ទឹង បានឲ្យដឹងថា ការប្រឡងសញ្ញាបត្រមធ្យមសិក្សាទុតិយភូមិ គិតត្រឹមរយៈពេល៤ឆ្នាំជាប់គ្នា ក្នុងនោះនៅក្នុងសម័យប្រឡងឆ្នាំ២០២១ នៅទូទាំងស្រុកមានសិស្ស ចំនួន៣នាក់/ស្រី១នាក់ ទទួលបាននិទ្ទេសA, នៅឆ្នាំ២០២២ សិស្សមានចំនួន៤នាក់/ស្រី១នាក់ ទទួលបាននិទ្ទេសA, នៅឆ្នាំ២០២៣ មានសិស្សចំនួន១៧នាក់/ស្រី១៤នាក់ ទទួលបាននិទ្ទេសA , នៅឆ្នាំ២០២៤ ទទួលបាននិទ្ទេសA មានចំនួន១៤នាក់/ស្រី៨នាក់ ហើយនៅក្នុងសម័យប្រឡងឆ្នាំសិក្សា២០២៤-២៥នេះ មានសិស្សាចំនួន៣៥នាក់ ប្រឡងជាប់និទ្ទេសA ក្នុងនោះ មានស្រី១៩នាក់។ ជាមួយគ្នានេះ សិស្សានុសិស្សទាំងនោះ តែងត្រូវបានការលើកទឹកចិត្តពីសំណាក់ នាយឧត្តមសេនីយ៍ កិត្តិសង្គហបណ្ឌិត ហ៊ីង ប៊ុនហៀង និងលោកជំទាវ ប៉ែន ចន្នី ដោយបានផ្តល់នូវម៉ូតូ និងថវិកាយ៉ាងច្រើន ផងដែរ។

ក្នុងឱកាសនេះ ឯកឧត្តម ណុប រ័ត្ននិមល បាននាំអំណោយដ៏ថ្លៃថ្លា សម្តេចតេជោ  សម្តេចកិត្តិព្រឹទ្ធបណ្ឌិត សម្តេចធិបតី និងលោកជំទាវបណ្ឌិត តាមរយៈឯកឧត្តម កិត្តិសង្គហបណ្ឌិត ហ៊ីង ប៊ុនហៀង និងលោកជំទាវ ប៉ែន ចន្នី ឧបត្ថម្ភសិស្សនិទ្ទេសA ចំនួន ៣៥នាក់ /ស្រី១៩នាក់ ក្នុងម្នាក់ៗទទួលបានម៉ូតូ១គ្រឿង និងថវិកា ២០ម៉ឺនរៀល ជូនដល់សិស្សនិទ្ទេសB ចំនួន១២០នាក់ ក្នុងម្នាក់ៗទទួលបានថវិកា ២០ម៉ឺនរៀល, និទ្ទេសC ចំនួន ២៧៨នាក់ ម្នាក់ៗថវិកា ១០មុឺនរៀល, និទ្ទេសD ចំនួន២៧៩នាក់ ម្នាក់ៗថវិកា ១០ម៉ឺនរៀល, និទ្ទេសE ចំនួន៩៧នាក់ ម្នាក់ៗថវិកា ១០ម៉ឺនរៀល និងនិទ្ទេសF ចំនួន២៩នាក់ ក្នុងម្នាក់ៗថវិកា ៥ម៉ឺនរៀល។ លោកគ្រូអ្នកគ្រូ ចំនួន ២៥៦នាក់ ក្នងម្នាក់ៗថវិកា១០មុឺនរៀល។ ដោយឡែក ឯកឧត្តម ក៏បានឧបត្ថម្ភដល់សិស្សានុសិស្សប្រឡងបាក់ឌុបសាកល្បង ចំនួន១០នាក់ លេខ១ ចំនួន២នាក់ ក្នុងម្នាក់ ថវិកា៤០ម៉ឺនរៀល, លេខ២ ចំនួន២នាក់ ក្នុងម្នាក់ ថវិកា៣០ម៉ឺនរៀល, លេខ៣ ចំនួន២នាក់ ថវិកា២៥ម៉ឺនរៀល, លេខ៤ ចំនួន២នាក់ ក្នុងម្នាក់ ថវិកា២០ម៉ឺនរៀល និងលេខ៥ ចំនួន២នាក់ ក្នុងម្នាក់ ថវិកា១៥ម៉ឺនរៀល ព្រមទាំងបាន ឧបត្ថម្ភរដ្ឋបាលស្រុកកណ្ដាលស្ទឹង ថវិកាចំនួន ២លានរៀល, ក្រុមប្រឹក្សាស្រុកឃុំ និងកងកម្លាំងមានសមត្ថកិច្ចផងដែរ ៕

ដោយ ៖ វណ្ណលុក