កំពង់ឆ្នាំង ៖ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ,ព្រះធម្មវនវាសី ចន្ទ មុនី ព្រះចៅអធិការវត្តចន្ទប្បជោ​ត្ត​នារាម ហៅវត្តសុត កាលពីថ្ងៃទី១៣ ខែតុលា ឆ្នាំ២០២៥ បានអញ្ជើញនិង​និមន្តសំណេះសំណាល និងចែករង្វាន់​លើកទឹកចិត្តដល់សិស្សប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង៖ ២៨ សីហា ២០២៥ និទ្ទេស អេ (A)ចំនួនបីនាក់នៅស្រុកទឹកផុស ។

ក្នុងឱកាសនេះឯកឧត្តម ស៊ុន សុវណ្ណារិទ្ធិ បានចូលរួមអបអរសាទរដល់ក្មួយៗសិស្សានុសិស្ស ដែលបានប្រឡង​ជាប់​និទ្ទេសA ហើយក៏មិនភ្លេច​ថ្លែងអំណរគុណយ៉ាងជ្រាលជ្រៅជូនចំពោះលោកគ្រូ អ្នកគ្រូ ក៏ដូចជាអាណាព្យាបាលសិស្ស ដែលបានខិតខំប្រឹងប្រែង និងយកចិត្តទុកដាក់ខ្ពស់ក្នុងការផ្តល់ចំណេះដឹងដល់ការសិក្សារបស់ក្មួយៗ ជាពិសេស គោរព​ថ្លែងអំណរគុណចំពោះព្រះអង្គធម្មវនវាសី ចន្ទ មុនី ដែលព្រះអង្គតែងតែយកចិត្តទុកដាក់ខ្ពស់​សម្រាប់ការ​ជួយឧបត្ថម្ភជាច្រើនដល់រដ្ឋបាលខេត្ត។ថ្ងៃនេះដែរ សិស្សនិទ្ទេស A ស្រុកទឹកផុសមានចំនួន ៣នាក់ ដែលបានទទួល​ការឧបត្ថម្ភពីព្រះអង្គនូវម៉ូតូចំនួន ៣គ្រឿង និងកុំព្យូទ័រចំនួន ៣គ្រឿង ។

ព្រះធម្មវនវាសី ចន្ទ មុនី មានសង្ឈដីកា លើកទឹកចិត្តសិស្សានុសិស្ស ដែលបានខិតខំប្រឹងប្រែងរៀនសូត្រទាំងយប់​ទាំងថ្ងៃ ប្រឡងបានជាប់ចំណាត់ថ្នាក់ និងនិទ្ទេសល្អនាពេលនេះ និងណែនាំបន្ថែមសូមប្អូនកុំភ្លេចខ្លួន ព្រោះ​និទ្ទេស​ល្អនាពេលនេះមិនទាន់កំណត់ជោគវាសនាទៅថ្ងៃអនាគតបាននៅឡើយនោះទេ ត្រូវខិតខំបន្តទៀត។

គូសបញ្ជាក់ថា លទ្ធផលការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា ២០២៤-២០២៥ ក្នុងខេត្តកំពង់ឆ្នាំង មានបេក្ខជនមកប្រឡងចំនួន ៤ ៦៦៣នាក់ (ស្រី ២ ៧៤៦នាក់) ។ បេក្ខជនប្រឡងជាប់មានចំនួន ៣ ៧៨០នាក់ (ស្រី ២ ៣៥៤នាក់) ស្មើនឹង ៨១,០៦ភាគរយ( ស្រី ៨៥,៧២%) ។ សិស្សប្រលងជាប់ និទ្ទេស A ចំនួន៤៥ នាក់ , និទ្ទេស B ចំនួន២៥១ នាក់ ,និទ្ទេស C ចំនួន៧៨៣ នាក់ , និទ្ទេស D ចំនួន១ ៤៦៨ នាក់ និង និទ្ទេស E ចំនួន១ ២៣៤ នាក់ ៕

ដោយ៖សុខ គឹមសៀន