បន្ទាយមានជ័យ៖មន្ត្រីជាន់ខ្ពស់ក្រសួងអភិវឌ្ឍន៍ជន​បទ ដឹកនាំដោយឯកឧត្តម អ៊ិន ចន្ថា រដ្ឋលេខាធិការក្រសួង​អភិវឌ្ឍន៍​ជនបទ កាលពីរសៀលថ្ងៃទី១៣ ខែតុលា ឆ្នាំ២០២៥ បានដឹកនាំក្រុមការងារអន្តរក្រសួង ចុះពិនិត្យ​ការងារ​ថែទាំផ្លូវជាប្រចាំ និងថែទាំខួបផ្លូវជនបទ ក្នុងផែនការឆ្នាំ២០២៥ ចំនួន១០ខ្សែប្រវែងជាង៧២គីឡូម៉ែត្រ ក្នុងក្រុង ស្រុកចំនួន៥ក្នុងខេត្ត​បន្ទាយមានជ័យ ដែលទទួលការអនុវត្តដោយ​មន្ទីរអភិវឌ្ឍន៍ជនបទខេត្ត ។

លោកស្រី កែវ ពេជ្ជតា អនុប្រធានមន្ទីរអភិវឌ្ឍន៍ជនបទ បានឱ្យដឹងថា មន្ទីរអភិវឌ្ឍន៍ជនបទខេត្តបន្ទាមានជ័យ បានទទួលការអនុវត្ត ថែទាំផ្លូវជាប្រចាំ និងថែទាំខួបផ្លូវជនបទ ក្នុងផែនការឆ្នាំ២០២៥ ចំនួន១០ខ្សែ ក្នុងក្រុង ស្រុកចំនួន៥ ក្នុងនោះរួមមាន៖១.ការថែទាំផ្លូវជាប្រចាំ ចំនួន៨ខ្សែ ប្រវែង៦៣.៣៦០ម៉ែត្រ ទទឹងខ្នងលើ​កៅស៊ូពីរ​ជាន់ និងក្រាលល្បាយក្រួស ៥ម៉ែត្រ, ៦ម៉ែត្រ និង៧ម៉ែត្រ ស្ថិតនៅក្នុងក្រុងសិរីសោភ័ណ ស្រុកព្រះនេត្រព្រះ ស្រុកស្វាយចេក និងស្រុកអូរជ្រៅ ។២.ការថែទាំខួបផ្លូវជនបទ មានចំនួន ២ខ្សែ ប្រវែង៩.៤០០ម៉ែត្រ ទទឹងខ្នង​លើក្រាលល្បាយក្រួស ៥ម៉ែត្រ កម្រាស់២០ស.ម ស្ថិតនៅក្នុងស្រុកព្រះនេត្រព្រះ និងស្រុកថ្មពួក។

ផ្លូវដែលទទួលជួសជុលថែទាំផ្លូវជាប្រចាំ និងថែទាំខួបផ្លូវជនបទនេះ ត្រូវបានពណ៌នាថា ជាខ្សែផ្លូវសំខាន់​សម្រួល​ដល់ធ្វើដំណើរ ក៏ដូចជាការដឹកជញ្ជូនកសិផលមកកាន់ទីផ្សារ និងអ្នកជំងឺមកកាន់មណ្ឌលសុខភាព ឬ​មន្ទីរពេទ្យ ក្នុងគោលដៅដើម្បីកាត់បន្ថយភាពក្រីក្រនៅតាមជនបទ។

ក្រោយពិនិត្យដោយម៉ត់ចត់ឯកឧត្តម អ៊ិន ចន្ថា បានកោតសរសើរ និងវាយតម្លៃចំពោះថ្នាក់​ដឹកនាំមន្ទីរអភិវឌ្ឍន៍​ជនបទ​ខេត្តបន្ទាយមានជ័យអនុវត្តការងារដោយការទទួលខុសត្រូវ។ ឯកឧត្តមក៏បានរំលឹកឱ្យបន្តចុះត្រួតពិនិត្យ និងថែទាំ​ផ្លូវដែលសម្រេចរួចមកហើយ៕

ដោយ៖ឃិន គន្ធា