(កោះកុង)៖ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានអញ្ជើញជួបសំណេះសំណាល និងចែកអំណោយមនុស្សធម៌ជូនស្ត្រីជាមាតា ( ស្ត្រីមានផ្ទៃពោះ ស្ត្រីមានកូនតូច និងស្ត្រីទើបសម្រាលកូន ចំនួន ៣៦គ្រួសារ ក្នុងក្រុងខេមរភូមិន្ទ​ ខេត្តកោះកុង នាថ្ងៃទី២០ ខែតុលា ឆ្នាំ២០២៥ ។​

លោកជំទាវ​ ឈឺ​ វ៉ា​ ក្នុងនាមប្រធានគណ:កម្មាធិការសាខាថ្មីអាណតិ្តទី៦នេះ​ សូមថ្លែងអំណរគុណដល់កាកបាទក្រហមកម្ពុជាថ្នាក់កណ្តាលនិងសង្ឃឹមថានឹងនៅតែជួយគាំទ្រដល់សកម្មភាពសាខាខេត្តកោះកុងបន្តទៀត​ ។

លោកជំទាវ​ ពុំ​ ចន្ទីនី​ បាននាំប្រសាសន៍​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្តាំផ្ញើសួរសុខទុក្ខ ក្ដីនឹករលឹក ការអាណិតស្រលាញ់​ និងការគិតគូរពីជីវភាព​ សុខភាពរបស់ស្ត្រីជាមាតាគ្រប់ៗរូប ​។

លោកជំទាវអគ្គលេខាធិការ ក៏បានផ្តាំផ្ញើ ចំពោះស្ត្រីមានផ្ទៃពោះសូមទៅពិនិត្យផ្ទៃពោះឲ្យបានទៀងទាត់តាមការណាត់របស់ក្រុមគ្រូពេទ្យគឺយ៉ាងតិចណាស់ឲ្យបាន៤ដងមុនពេលសម្រាល ហើយពេលសម្រាលត្រូវទៅមណ្ឌលសុខភាពឬមន្ទីរពេទ្យដែលមានគ្រូពេទ្យមានវិជ្ជាជីវ:ត្រឹមត្រូវ ដើម្បីសុខភាពល្អ និងសុវត្ថិភាពទាំងម្តាយនិងកូនក្នុងផ្ទៃ ជៀសផុតពីគ្រោះថ្នាក់ជាយថាហេតុផ្សេងៗ និងការចម្លងជំងឺពីម្តាយទៅកូនពិសេសជំងឺអេដស៍ ។

លោកជំទាវ ពុំ ចន្ទីនី និងសការី បានសួរសុខទុក្ខ និងនាំយកអំណោយមនុស្សធម៌សម្រាលការលំបាកដល់ខ្នងផ្ទះជូនជនងាយរងគ្រោះបំផុត​ និងស្ត្រីទើបសម្រាលកូន​ សរុបចំនួន​ ១៥គ្រួសា​រ រួមមាន ចាស់ជរាគ្មានទីពឹង ៨នាក់​ ពលរដ្ឋទីទ័លក្រលំបាក ៣គ្រួសារ​ ជនពិការ ១នាក់​ និងស្ត្រីទើបសម្រាលកូន​​ ៣គ្រួសារ​ ក្នុងនោះសង្កាត់ស្ទឹងវែង​ ១០ខ្នងផ្ទះ និងសង្កាត់ដងទង់​ ៥ខ្នងផ្ទះ នៃក្រុងខេមរភូមិន្ទ​ ខេត្តកោះកុង ​និងនាំយកទេយ្យវត្ថុ​ និងបច្ច័យ​ ប្រគេនព្រះលក្ខណ៍មុនី វង្ស ពិជ័យ ព្រះមេគណគណ:ធម្មយុត្តិកនិកាយខេត្តកោះកុង និងជាព្រះចៅអធិការវត្តទេពនិមិត្តហៅវត្តថ្មី​ ដើម្បីទ្រទ្រង់ចង្ហាន់គង់នៅសិក្សាព្រះធម៌វិន័យ ១១៨អង្គ​ ក្នុងនោះនេនតូចៗជាង ៧០អង្គ ៕

ដោយ / គ្រី សម្បត្តិ