សេអ៊ូល ៖ ប្រធានាធិបតីអាមេរិក លោក Donald Trump បានអញ្ជើញទៅដល់កូរ៉េខាងត្បូង បន្ទាប់ពីបញ្ចប់ទស្សនកិច្ច នៅជប៉ុន។

ដំណើរទស្សនកិច្ច រយៈពេលពីរថ្ងៃ របស់លោក Trump ទៅកាន់សម្ព័ន្ធមិត្តដ៏សំខាន់របស់សហរដ្ឋអាមេរិក «កូរ៉េខាងត្បូង» គឺជាជើងទីបី នៃការធ្វើដំណើរ ទៅកាន់តំបន់អាស៊ី។

មេដឹកនាំអាមេរិករូបនេះ ត្រូវបានកោតសរសើរ អំឡុងកិច្ចប្រជុំកំពូលក្នុងតំបន់ នៅក្នុងប្រទេសម៉ាឡេស៊ី និង បន្តត្រូវបានលើកសរសើរថា ជា “អ្នកបង្កើតសន្តិភាព” ដោយនាយករដ្ឋមន្ត្រីជប៉ុន លោកស្រី Sanae Takaichi ។

អ្វីជាការកត់សម្គាល់ លោក Trump និង Xi មេដឹកនាំចិន គ្រោងនឹងជួបគ្នា នៅក្រៅកិច្ចប្រជុំកំពូល នៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក ហៅកាត់ APEC នៅទីក្រុង Gyeongju។

សម្រាប់ការទៅដល់កូរ៉េខាងត្បូង កាលពីខែកក្កដា លោក Trump បាននិយាយថា ក្រុងវ៉ាស៊ីនតោនបានយល់ព្រមកាត់បន្ថយពន្ធលើការនាំចូលរបស់កូរ៉េខាងត្បូង មកត្រឹម ១៥ ភាគរយ ជាថ្នូរនឹងការសន្យាវិនិយោគចំនួន ៣៥០ពាន់លានដុល្លារ ដោយទីក្រុងសេអ៊ូល។ ពន្ធលើរថយន្តដ៏ច្រើនសន្ធឹកសន្ធាប់ នៅតែមានដដែល ហើយរដ្ឋាភិបាលទាំងពីរនៅតែត្រូវបានបែងចែក លើរចនាសម្ព័ន្ធ នៃការសន្យាវិនិយោគ៕

ប្រភពពី AFP ប្រែសម្រួល៖ សារ៉ាត