មនុស្សជាង១៥ម៉ឺននាក់ បានមកកម្សាន្តនៅខេត្តកែបក្នុងឱកាសបុណ្យអុំទូកបីថ្ងៃ
កែប៖នៅខេត្តកែបផ្អែកតាមតួលេខបឋមក្នុងឱកាសឈប់សម្រាកនៃព្រះរាជពិធីបុណ្យអុំទូករយៈពេល៣ថ្ងៃ ដោយគិតចាប់ពីថ្ងៃទី៤ ដល់ទី៦ ខែវិច្ឆិកា ឆ្នាំ២០២៥ មានភ្ញៀវទេសចរជាតិ អន្តរជាតិចំនួន ១៥៥.៤៥៨នាក់ ក្នុងនោះទេសចរបរទេសចំនួន ៤១២នាក់ បានមកកម្សាន្តនៅខេត្តឆ្នេរសមុទ្រមួយនេះ។ចំនួននេះបានបង្ហាញឱ្យឃើញនូវការ កើនឡើង៥៦.៥៨ភាគរយបើធៀបនឹងរយៈពេលដូចគ្នានាឆ្នាំ២០២៤។
ជាមួយនឹងវត្តមានគួរជាទីមោទនៈ លោក ប៉ុក ទាំង ប្រធានមន្ទីរទេសចរណ៍ខេត្តកែបបានបញ្ជាក់ថាបន្ថែមថា ស្ថានភាពទូទៅនៃសន្តិសុខ សណ្តាប់ធ្នាប់ និងអនាម័យនៅតាមតំបន់ទេសចរណ៍ទូទាំងខេត្តកែបនៅតែមានរក្សាបាននូវភាពល្អប្រសើរ។
ជាការកត់សម្គាល់ ក្នុងឱកាសឈប់សម្រាកនាពិធីបុណ្យជាតិនេះ រដ្ឋបាលខេត្តកែបបានបន្តយកចិត្តទុកដាក់ លើការគ្រប់គ្រង និងតាមដានស្ថានភាពទេសចរណ៍ប្រចាំថ្ងៃ ដើម្បីធានាថាខេត្តកែបនៅតែជាគោលដៅទេសចរណ៍ដ៏មានសុវត្ថិភាព ស្អាត សណ្តាប់ធ្នាប់ល្អ និងគួរឱ្យទាក់ទាញសម្រាប់ភ្ញៀវជាតិ និងអន្តរជាតិ៕
ដោយ៖សិលា សារិន
