កំពត៖រាត្រីថ្ងៃពុធ១៥កើត ខែកក្តិក ត្រូវនឹងទី៥ ខែវិច្ឆិកា ឆ្នាំ២០២៥ ដែលជារាត្រីនៃពិធីសំពះព្រះខែ អកអំបុក​ នៅ​ប្រាសាទមាស លោក​ជំទាវម៉ៅ ស្ថិតនៅលើកំពូលភ្នំទ្វារ ឃុំល្អាង ស្រុកដងទង់ ខេត្តកំពត ពោរពេញទៅ​ថ្នាក់ដឹក​នាំ មន្រ្តីរាជការ ប្រជាពលរដ្ឋ​ ភ្ញៀវទេសចរជាតិ អន្តរជាតិ យ៉ាងកុះករបានមកជួបជុំគ្នាដើម្បីប្រារព្ធពិធីដ៏មង្គល​នេះ។ស្នាម​ញញឹម​ដែលកើត​ចេញពីទឹក​ចិត្តបរិសុទ្ធក្រោមម្លប់សន្តិភាព​បាន​បង្ហាញឡើងលើរង្វង់មុខនៃអ្នកចូលរួម។

ជាសំណួរដែលលើកឡើងតើហេតុអ្វីបានជារដ្ឋបាលខេត្តកំពតជ្រើសរើសប្រាសាទមាសធ្វើជាទីប្រារព្ធពិធីសំពះព្រះខែ?មិនជ្រើសយកទី​កន្លែងនៅក្នុងក្រុងកំពតដែលកុះករទៅដោយទេសចរ?

លោកអាចារ្យដែលរៀបចំកម្មវិធីនេះបានបញ្ជាក់ថា ក្រោមគំនិតនិត​ផ្តួចផ្តើមប្រកបដោយការច្នៃប្រឌិតខ្ពស់របស់​ឯកឧត្តម ម៉ៅ ធនិន អភិបាលខេត្តកំពត ដោយមានការឯកភាពពីឯកឧត្តម តាក ហាប់ ប្រធានក្រុមប្រឹក្សាខេត្ត រដ្ឋបាលខេត្តកំពត​ឆ្នាំនេះបានសម្រេច​ជ្រើស​រើសយកទីតាំងប្រាសាទមាសលោកជំទាវម៉ៅ ធ្វើជាកន្លែងប្រារព្ធពិធី គឺ​ដើម្បីផ្សារភ្ជាប់រវាង​ការថែរក្សាទំនៀមទម្លាប់ វប្បធម៌ ប្រពៃណី និងការរួមសាមគ្គីគ្នាដើម្បីលើកស្ទួយវិស័យទេសចរណ៍ខេត្ត។

លោកបន្ថែមថា ពិធីសំពះព្រះខែអកអំបុកគឺដើម្បីរំលឹកនឹកគុណ​ព្រះពោធិសត្វ​នៅក្នុងកាលដែលព្រះអង្គមានជាតិ​កំណើត​ជាសត្វ​ទន្សាយ ដើម្បីសន្សំបារមីផង និងដើម្បីបួងសួងសុំសេចក្តីសុខ​សេចក្តី​ចម្រើន ជូនដល់ប្រមុខថ្នាក់ដឹកនាំ ប្រជាពលរដ្ឋ និងភ្ញៀវទេសចរ​ផង។ ជាពិសេសចង់​បង្ហាញ​ទេសភាព និងបរិយាកាសដ៏សែន​មនោរម្យ​​នៅប្រាសាទមាស​លោកជំទាវ​ម៉ៅជូនភ្ញៀវទេសចរជិតឆ្ងាយ ។

សូមជម្រាបជូនថា តួលេខបឋម ក្នុងព្រះរាជពិធីបុណ្យអុំទូក បណ្តែត​ប្រទីប និងសំពះព្រះខែ អកអំបុករយៈ​ពេលពីរ​ថ្ងៃ(ថ្ងៃទី៤និងទី៥ ខែវិច្ឆិកា)ខេត្តកំពតទទួលភ្ញៀវទេសចរជាង ១៣ម៉ឺននាក់ ខណៈ​សេវាកម្ម​កន្លែង​ស្នាក់នៅគឺពេញ​ទាំងអស់៕
ដោយ៖ សិលា សារិន