កម្មវិធី “ប្រណាំងទូកមិត្តភាពសៀមរាបផ្ទះខ្ញុំ” បានបញ្ចប់ក្រោមស្នាមញញឹម
សៀមរាប៖កម្មវិធី “ប្រណាំងទូកមិត្តភាពសៀមរាបផ្ទះខ្ញុំ” ដែលរៀបចំឡើងនៅដងស្ទឹងប្រវត្តិសាស្ត្រសៀមរាប រយៈពេលពីរថ្ងៃកន្លងទៅត្រូវបានបញ្ចប់ដោយជោគជ័យ និងភាពសប្បាយរីករាយនៅថ្ងៃទី៦ វិច្ឆិកា ឆ្នាំ២០២៥នេះ។
រដ្ឋបាលខេត្តសៀមរាប និងសហភាពសហព័ន្ធយុវជនកម្ពុជាខេត្តរៀបចំព្រឹត្តិការណ៍នេះឡើងមិនត្រឹមតែជាការអបអរសាទរក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក និងបង្កភាពសប្បាយរីករាយជូនប្រជាពលរដ្ឋ ភ្ញៀវទេសចរជិតឆ្ងាយ ភ្ញៀវអន្តរជាតិប៉ុណ្ណោះទេ តែជាការរួមចំណែកក្នុងការជំរុញវិស័យទេសចរណ៍ ក្នុងខេត្តសៀមរាប ដែលជាទីក្រុងវប្បធម៌ផងដែរ។
អ្នករៀបចំកម្មវិធីប្រណាំងទូកឆ្នាំ២០២៥ បានឱ្យដឹងថា មានការចូលរួមចំនួន ២៦ ទូក។ជាលទ្ធផលជ័យលាភីលេខ ១៖ ទូករបស់ក្រុម ផែនសិល្បៈ និងកីឡា,ជ័យលាភីលេខ ២៖ ទូកឈ្មោះ ផែនវប្បធម៌ និងសាសនានិងជ័យលាភីលេខ ៣៖ ទូកឈ្មោះ យុវជនក្រុងសៀមរាប ។
ឯកឧត្ដម ប្រាក់ សោភ័ណ អភិបាលខេត្ត និងជាប្រធានសហភាពសហព័ន្ធយុវជនកម្ពុជាខេត្ត បានបញ្ជាក់ថា ព្រឹត្តិការណ៍នេះ រៀបចំឡើងក្នុងគោលដៅសំខាន់ពីរ។ទី១.ពង្រឹងសាមគ្គីភាព និងថែរក្សាប្រពៃណី៖ កសាងទំនាក់ទំនងរឹងមាំរវាងយុវជនគ្រប់ភូមិ សង្កាត់ និងស្រុក តាមរយៈការលើកស្ទួយស្មារតីស្រឡាញ់ជាតិ និងការថែរក្សាប្រពៃណីខ្មែរ។ ការចូលរួមរបស់យុវជនគឺជាកម្លាំងសំខាន់ក្នុងការជ្រៀតចូលកាត់បន្ថយអំពើអាក្រក់ និងជំរុញភាពជាឯកភាពក្នុងសង្គម។ ម៉្យាងទៀត ពិធីនេះ គឺជាការរំឭកដឹងគុណដល់វីរៈបុរសទ័ពជើងទឹកដូនតាខ្មែរ ដែលបានតស៊ូដណ្តើមជ័យជម្នះ។
ទី២.ជំរុញកំណើនភ្ញៀវទេសចរ៖ ជំនួសឱ្យព្រះរាជពិធីបុណ្យអុំទូក រដ្ឋបាលខេត្ត និង ស.ស.យ.ក.ខេត្ត បានរៀបចំកម្មវិធីកម្សាន្ត និងវប្បធម៌ចម្រុះជាច្រើននៅតាមដងស្ទឹងប្រវត្តិសាស្ត្រសៀមរាប ដូចជា ការជិះទូកកម្សាន្តលើស្ទឹងសៀមរាប, ផ្សារទឹក, ការប្រណាំងទូកខ្នាតខ្លី, ប្រគំតន្ត្រីស្គរដៃ, ការតាំងពិព័រណ៍, ប្រដាល់គុនខ្មែរ និងល្ខោនបាសាក់។
ព្រឹត្តិការណ៍ទាំងនេះគឺដើម្បីទាក់ទាញ និងផ្តល់ឱកាសឱ្យភ្ញៀវទេសចរជាតិ-អន្តរជាតិ បានសិក្សាស្វែងយល់កាន់តែច្បាស់អំពី ប្រពៃណី វប្បធម៌ ទំនៀមទម្លាប់ ដ៏សម្បូរបែបរបស់ដូនតាខ្មែរ ក្នុងនាមខេត្តសៀមរាបជា “ជង្រុកនៃសម្បត្តិវប្បធម៌”។
ឯកឧត្ដមអភិបាលខេត្តបញ្ជាក់បន្ថែមថា ភាពរីករាយនេះ មិនត្រឹមតែជាការកម្សាន្តប៉ុណ្ណោះទេ តែជាការបង្ហាញយ៉ាងច្បាស់អំពីការថែរក្សាប្រពៃណី វប្បធម៌ ដ៏សម្បូរបែប របស់ប្រជាពលរដ្ឋខ្មែរ ក្នុងលក្ខណៈជាមហាគ្រួសារខ្មែរតែមួយ ក្រោមម្លប់សន្តិភាព៕
ដោយ៖ប៊ុន រដ្ឋា
