អត្តពលិកកីឡាវាយកូនបាល់វ័យក្មេងមកពី២០ប្រទេសចូលរួមប្រជែងក្នុងពានរង្វាន់វាយកូនបាល់ ទេពឃុនណា
(ភ្នំពេញ)៖ សហព័ន្ធកីឡាវាយកូនបាល់កម្ពុជា បានរៀបចំការប្រកួតកីឡាវាយកូនបាល់ពានរង្វាន់វាយកូនបាល់ ទេពឃុនណា (30th Annual Tep Kunnah Memorial Cup 2025) លើកទី៣០ នៅពហុកីឡដ្ឋានជាតិមរតកតេជោ រាជធានីភ្នំពេញ ដើម្បីរម្លឹកខួបអតីតកីឡាករជើងខ្លាំងរបស់កម្ពុជា លោក ទេព ឃុនណា។
លោកស្រី ឯក ប៊ុនលក្ខិណា អគ្គហេរញ្ញិក សហព័ន្ធកីឡាវាយកូនបាល់កម្ពុជា បានបញ្ជាក់ឱ្យដឹងថា ព្រឹត្តិការណ៍នេះដំណើរការប្រកួតចំនួន២សប្តាហ៍ ដោយសប្តាហ៍ទី១ ចាប់ផ្តើមពីថ្ងៃទី១០-១៥ ខែវិច្ឆិកា និងសប្តាហ៍ទី២ ចាប់ផ្តើមពីថ្ងៃទី១៦-២២ ខែវិច្ឆិកា ឆ្នាំ២០២៥។
លោកស្រី ឯក ប៊ុនលក្ខិណា បញ្ជាក់ទៀតថា ការប្រកួតនេះមានកីឡាករ កីឡារិនីកម្រិតបច្ចេកទេសខ្ពស់ៗ ដោយផ្តោតសំខាន់លើអត្តពលិកវ័យក្មេង ខណៈម្ចាស់ផ្ទះកម្ពុជាមានសមាសភាពកីឡាករ៣នាក់បានចូលរួមប្រកួតប្រជែងជាមួយកីឡាករអន្តរជាតិ ដើម្បីដកពិសោធន៍ និងបង្កើនគុណភាពបច្ចេកទេសឱ្យកាន់តែល្អប្រសើរបន្ថែមទៀត។ជាមួយគ្នានេះ អគ្គហេរញ្ញិក រូបនេះ បានសង្កត់ធ្ងន់ថា សម្រាប់ការទទួលរៀបចំធ្វើម្ចាស់ផ្ទះ ឆ្នាំ២០២៥នេះ សហព័ន្ធបានត្រៀមខ្លួនជាច្រើនខែមកហើយ ដើម្បីរៀបចំឱ្យបានគ្រប់ជ្រុងជ្រោយលើការហូបចុក ស្នាក់នៅ ដឹកជញ្ជូនជាដើម ដើម្បីទទួលប្រតិភូ គ្រូបង្វឹក កីឡាករ កីឡាការិនីមកពីប្រទេសចំនួន ២០ផ្សេងទៀតឱ្យទទួលបានភាពកក់ក្តៅ និងកិត្តិយសជាតិ ក្នុងនាមជាម្ចាស់ផ្ទះផងដែរ។
លោក្រស្រី បានគូសបញ្ជាក់ថា កីឡាករ កីឡាការិនីវាយកូនបាល់មកពី ២០ប្រទេស មានដូចជា ប្រទេសម៉ាឡេស៊ី សិង្ហបុរី ចិន កូរ៉េខាងត្បូង ឥណ្ឌូណេស៊ី ឥណ្ឌា វៀតណាម ជប៉ុន អង់គ្លេស ន័រវែស ព្រុយណេ រុស្ស៊ី ស្រីលង្កា អូស្ត្រាលី នូវែលសេឡង់ អូទ្រីស បង់ក្លាដែស និងបារាំងជាដើម។
សូមបញ្ជាក់ថា ការប្រកួតនេះធ្វើឡើង ដើម្បីរម្លឹកគុណលោក ទេព ឃុនណា អតីតកីឡាករវាយកូនបាល់កម្ពុជាមួយរូបក្នុងអំឡុងឆ្នាំ១៩៦០ និងជាឪពុកបង្កើតរបស់លោក ទេព រិទ្ធីវិទ្ធ អគ្គលេខាធិការសហព័ន្ធកីឡាវាយកូនបាល់កម្ពុជា។ លោក ទេព ឃុនណា គឺជាអតីតកីឡាករវាយកូនបាល់ឆ្នើមរបស់កម្ពុជា ដែលបានទទួលមរណៈភាពជាង២០ឆ្នាំកន្លងទៅ៕
រូបភាព ៖ ជីម ភារ៉ា
អត្ថបទ ៖ ជាវ ចន្ធូ
