មជ្ឈដ្ឋាននានាទាំងក្នុងប្រទេសកម្ពុជា និងក្រៅប្រទេសចេញប្រតិកម្មថ្កោលទោសអំពើយង់ឃ្នងរបស់យោធាថៃដែលបាញ់ប្រហារមកលើពលរដ្ឋកម្ពុជាស្លូតត្រង់
(ភ្នំពេញ)៖ ដោយសារអំពើយង់ឃ្នងពីសំណាក់កងទ័ពថៃដែលបានធ្វើការបាញ់ប្រហារមកលើប្រជាពលរដ្ឋស្លូតត្រង់កម្ពុជាដែលកំពុងរស់នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យកាលពីថ្ងៃទី១២ ខែវិច្ឆិកា ឆ្នាំ ២០២៥កន្លងមកបានធ្វើឱ្យតាមស្ថាប័នក្រសួង មន្ទីរ ប្រជាពលរដ្ឋ នៅក្នុងប្រទេសកម្ពុជា ហើយក្រៅពីនេះក៏មានបណ្តាសារព័ត៌មានអន្តរជាតិ ព្រមទាំងប្រទេសមួយចំនួនថែមទៀតបានធ្វើការថ្កោលទោសប្រទេសថៃយ៉ាងខ្លាំងក្លាបំផុតពីទង្វើឃោឃៅមិនគោរពសិទ្ធមនុស្សសូម្បីតែបន្តិចរបស់ប្រទេសមួយនេះ។
គួរបញ្ជាក់ថា ជុំវិញបញ្ហាយោធាថៃបានបាញ់ប្រហារមកលើពលរដ្ឋខ្មែរស្លូតត្រង់នេះក្រសួងការពារជាតិឱ្យដឹងថាមានពលរដ្ឋកម្ពុជាបាត់បង់ជីវិតនៅនឹងកន្លែង១នាក់ ចំណែក៣ នាក់ផ្សេងទៀតរងរបួស ធ្ងន់ ស្រាល។
ប្រភពពីក្រសួងការពារជាតិកម្ពុជាបានឱ្យដឹងដែរថាករណីយោធាថៃបើក ការបាញ់ប្រហារយ៉ាងព្រៃផ្សៃមកលើប្រជាពលរដ្ឋស៊ីវិលស្លូតត្រង់កម្ពុជានៅភូមិព្រៃចាន់នេះមាន២លើក ក្នុងនេះវេលាម៉ោង ១៥:៥០នាទី និង វេលាម៉ោង ១៧:៥៤ ថ្ងៃទី១២ ខែវិច្ឆិកា ឆ្នាំ ២០២៥។
ក្រោយឧប្បត្តិហេតុដ៏ឃោឃៅដែលបង្ករឡើងដោយយោធាថៃនេះគេឃើញមានប្រតិកម្មជាច្រើនកើតចេញទាំងក្នុង និងក្រៅប្រទេស ដោយបានធ្វើការថ្កោលទោសឱ្យថៃទទួលខុសត្រូវ និងបញ្ឈប់ជាបន្ទាន់នូវអំពើព្រៃផ្សៃសម្លាប់ប្រជាពលរដ្ឋកម្ពុជាស្លូតត្រង់។
សម្រាប់ប្រតិកម្មនូវទង្វើរយង់ឃ្នងពីសំណាក់យោធាថៃទាំងនេះមានដូចជា៖ អ្នកនាំពាក្យព្រឹទ្ធសភាកម្ពុជា បានចេញសេចក្តីថ្លែងការណ៍ថ្កោលទោសអំពើឈ្លានពានគួរឱ្យស្អប់ខ្ពើម និងការរំលោភបំពានលើ អធិបតេយ្យភាពកម្ពុជា ដោយប្រទេសថៃ កាលពីថ្ងៃទី១២ ខែវិច្ឆិកា ឆ្នាំ២០២៥ ដែលបណ្តាលឱ្យពលរដ្ឋស្លូតត្រង់កម្ពុជាម្នាក់ស្លាប់ និង៣នាក់ផ្សេងទៀតរងរបួស។ក្រៅពីនេះក៏មានរដ្ឋសភាកម្ពុជា ,ក្រសួងការបរទេសកម្ពុជា ,អ្នកនាំពាក្យរាជរដ្ឋាភិបាលកម្ពុជា ,ក្រសួងការពារជាតិកម្ពុជាជាដើម។ក្រៅពីនេះក៏មានក្រសួង មន្ទីរ សហភាពសហព័ន្ធយុវជនកម្ពុជា ក៏បានចេញមកប្រកាសថ្កោលទោសព្រមៗគ្នាពីសំណាក់កងទ័ពថៃនេះដូចគ្នា។
ដោយឡែកគណៈកម្មាធិការសិទ្ធិមនុស្សកម្ពុជាក៏បានប្រកាសភ្លាមៗថានឹងដាក់បណ្តឹងទៅកាន់ឧត្តមស្នងការអង្គការសហប្រជាជាតិទទួល បន្ទុកសិទ្ធិមនុស្ស (OHCHR) និងស្ថាប័នសិទ្ធមនុស្សនានាបន្ទាប់ពីទាហានថៃបាញ់ប្រហារយ៉ាងព្រៃផ្សៃមកលើពលរដ្ឋកម្ពុជាផងដែរ។
ក្រៅពីនេះក៏មានប្រតិកម្មថ្កោលទោសពីក្រៅប្រទេសផងដែរដូចជា៖ថ្នាក់ដឹកនាំ សមាជិក សមាជិកា នៃក្រុមការងាររៀបចំអង្គការចាត់តាំងយុវជនគណបក្សប្រជាជនកម្ពុជា ប្រចាំរដ្ឋវ៉ាស៊ីងតោន តំបន់ឆ្នេរខាងលិច នៅសហរដ្ឋអាមេរិកបានប្រកាសថ្កោលទោសយ៉ាងដាច់អហង្ការ ចំពោះការប្រើប្រាស់អំពើហិង្សារបស់ភាគីថៃ ដែលទាហានថៃបានបាញ់ប្រហារមកលើប្រជាពលរដ្ឋស៊ីវិលស្លូតត្រង់របស់កម្ពុជា។ ព្រមជាមួយគ្នានេះបណ្តាញសារព័ត៌មានអន្តរជាតិល្បីៗចុះផ្សាយពីទាហានថៃសម្លាប់ពលរដ្ឋស៊ីវិលស្លូតត្រង់កម្ពុជានេះយ៉ាងព្រោងព្រាតក្នុងការថ្កោលទោសអំពើយង់ឃ្នងពីសំណាក់កងទ័ពថៃ។
ជាងនេះទៅទៀតព្រឹកថ្ងៃ ទី១៣ ខែវិច្ឆិកា ឆ្នាំ២០២៥ នៅវេលាម៉ោង០៧:៥៨ ក្រុមការងារសម្របសម្រួលអ្នកសង្កេតការណ៍របស់ក្រសួងការពារជាតិ នៃព្រះរាជាណាចក្រកម្ពុជា បានសម្របសម្រួលជូនក្រុមអ្នកសង្កេតការណ៍អាស៊ាន (AOT) បានមកដល់មន្ទីរពេទ្យកម្ពុជា-ជប៉ុនមង្គលបុរី ដើម្បីពិនិត្យប្រជាជនស៊ីវិលកម្ពុជាដែលត្រូវបានរងរបួសដោយសារការបាញ់ប្រហារ របស់យោធាថៃ នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីថ្ងៃទី១២ ខែវិច្ឆិកា ឆ្នាំ២០២៥ ម្សិលមិញនេះ។
គួររំលឹកផងដែរថា កាលពីម្សិលមិញនេះ យោធាថៃបានបើកការបាញ់ប្រហារមកលើប្រជាពលរដ្ឋស៊ីវិលកម្ពុជា ចំនួនពីរលើកគឺ៖ លើកទីមួយ នៅវេលាម៉ោងប្រមាណ ១៥:៥០នាទី និងលើកទីពីរនៅវេលាម៉ោង ១៧:៥៤នាទីល្ងាច និងបានបង្កឱ្យប្រជាជនស៊ីវិលកម្ពុជារងរបួសសរុបចំនួន ០៣នាក់ និងបាត់បង់ជីវិតចំនួន ០១នាក់។ ប្រជាជនស៊ីវិលរងរបួសទាំង៣រូប ដែលរងការបាញ់ប្រហារពីសំណាក់ យោធាថៃ កំពុងសម្រាកព្យាបាលនៅមន្ទីរពេទ្យមិត្តភាពកម្ពុជា-ជប៉ុន មង្គលបូរី ខេត្តបន្ទាយមានជ័យ ក្រោមការយកចិត្តទុកដាក់បំផុតពី ក្រុមគ្រពេទ្យ៕
ដោយ ៖ ម៉ាដេប៉ូ
