មន្រ្តីរាជការ នៃក្រសួងប្រៃសណីយ៍ និងទូរគមនាគមន៍ចេញញត្តិថ្កោលទោស ចំពោះការប្រើប្រាស់អំពើហិង្សាដោយប្រដាប់អាវុធរបស់យោធាថៃ
(ភ្នំពេញ)៖ យើងខ្ញុំទាំងអស់គ្នាជាថ្នាក់ដឹកនាំ និង មន្រ្តីរាជការនៃក្រសួងប្រៃសណីយ៍និងទូរគមនាគមន៍សូមធ្វើការប្រកាសថ្កោលទោសយ៉ាងម៉ឺងម៉ាត់បំផុតចំពោះការប្រើប្រាស់អំពើហិង្សាដោយប្រដាប់អាវុធ ដែលបង្កឡើងដោយកងកម្លាំងប្រដាប់អាវុធថៃ កាលពីល្ងាច ថ្ងៃទី១២ ខែវិចិ្ឆកា ឆ្នាំ២០២៥ មកលើប្រជាពលរដ្ឋស៊ីវិលស្លូតត្រង់របស់កម្ពុជា នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដោយបណ្តាលឱ្យពលរដ្ឋ ១រូប បាត់បង់ជីវិត និង ៣រូបទៀត រងរបួស។
ទង្វើអមនុស្សធម៌បែបនេះ គឺជាការរំលោភបំពានយ៉ាងគឃ្លើនលើអធិបតេយ្យភាពនិងបូរណភាពទឹកដីកម្ពុជា ក៏ដូចជាការរំលោភបំពានយ៉ាងធ្ងន់ធ្ងរលើច្បាប់មនុស្សធម៌អន្តរជាតិ ធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងសន្ធិសញ្ញាមិត្តភាព និងកិច្ចសហប្រតិបត្តិការនៅអាស៊ីអាគ្នេយ៍ (TAC) ជាពិសេសថែមទាំងប្រព្រឹត្តផ្ទុយពីសេចក្តីថ្លែងការណ៍រួម ស្តីពី កិច្ចព្រមព្រៀងសន្តិភាព ដែលនាយករដ្ឋមន្រ្តី នៃព្រះរាជាណាចក្រកម្ពុជា និងនាយករដ្ឋមន្រ្តី នៃព្រះរាជាណាចក្រថៃឡង់ដ៏ បានចុះហត្ថលេខាកាលពីថ្ងៃទី២៦ ខែតុលា ថ្មីកន្លងទៅនេះ ក៏ដូចជាការឯកភាពគ្នាកន្លងមកក្នុងការដោះស្រាយបញ្ហាព្រំដែនដោយសន្តិវិធី និងការឯកភាពឱ្យយន្តការគណៈកម្មការចម្រុះព្រំដែន (JBC) ចុះវាស់វែង និងបោះបង្គោលបណ្តោះអាសន្ន និងត្រូវរក្សាស្ថានភាពដើម ដដែលរហូតដល់ការវាស់វែងត្រូវបានបញ្ចប់ និងរង់ចាំការសម្រេចដោយ JBC ស្របពេលដែលកម្ពុជាគោរពយ៉ាងពេញលេញនូវគោលការណ៍សន្តិភាព និងភាពជាអ្នកជិតខាងល្អ។
ជាមួយគ្នានេះ យើងខ្ញុំទាំងអស់គ្នា សូមចូលរួមរំលែកមរណទុក្ខជាមួយក្រុមគ្រួសារនៃសព និងសូមអំពាវនាវឱ្យមានការចូលរួមពីភាគីបរទេស ដើម្បីបើកការស៊ើបអង្កេតដោយឯករាជ្យ ក្នុងន័យស្វែងរកការពិត ការទទួលខុសត្រូវ និងផ្តល់យុត្តិធម៌ជូនប្រជាពលរដ្ឋដែលរងគ្រោះដោយសារការប្រើប្រាស់អំពើហិង្សាដោយប្រដាប់អាវុធនេះ។
ជាថ្មីម្តងទៀត យើងខ្ញុំទាំងអស់គ្នា ជឿជាក់និងគាំទ្រយ៉ាងពេញទំហឹងចំពោះចំណាត់ការរបស់រាជរដ្ឋាភិបាលកម្ពុជា ដែលដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្រសួង ស្ថាប័ន រដ្ឋបាលខេត្តពាក់ព័ន្ធ ជាពិសេសកងកម្លាំងប្រដាប់អាវុធរបស់យើង ទាំងលើសមរភូមិយោធា និងសមរភូមិការទូត ដែលបាននិងកំពុងធ្វើការយ៉ាងសកម្មប្រកបដោយឆន្ទៈមោះមុត មនសិការស្នេហាជាតិ និងសូមគាំទ្រផ្តល់កម្លាំងចិត្តដល់វីរកងទ័ពខ្មែរនៅសមរភូមិជួរមុខដែលបាននិងកំពុងពុះពារយ៉ាងអង់អាចក្លាហានឥតរួញរា ក្នុងបុព្វហេតុការពារអធិបតេយ្យជាតិនិងបូរណភាពទឹកដី ប្រជាជន ថែរក្សាសន្តិភាព និងឧត្តមប្រយោជន៍របស់កម្ពុជា ទោះក្នុងតម្លៃណាក៏ដោយ ៕
ដោយ ៖ ង៉ាន់ ទិត្យ
