ក្រសួងការបរទេស ធ្វើបទបង្ហាញប្រាប់បណ្តាអង្គទូត បរទេស ប្រចាំកម្ពុជា អំពីការវិវត្តនៃសេចក្តីថ្លែងការណ៍រួមរវាងកម្ពុជា និងថៃ
(ភ្នំពេញ)៖ រដ្ឋលេខាធិការប្រចាំការក្រសួងការបរទេសកម្ពុជា លោក ជំទាវ អ៊ាត សោភា បានធ្វើបទបង្ហាញប្រាប់ដល់បណ្តាអង្គទូត និងអង្គការអន្តរជាតិនានាប្រចាំនៅប្រទេសកម្ពុជា អំពីការវិវត្តនៃសេចក្តីថ្លែងការណ៍រួមរវាងកម្ពុជា-ថៃ ក្រោយយោធាថៃបើកការបាញ់ប្រហារលើជនស៊ីវិលខ្មែរ ។ ការធ្វើបទបង្ហាញនេះ បានធ្វើឡើង នៅល្ងាចថ្ងៃទី១៣ ខែវិច្ឆិកា ឆ្នាំ២០២៥ នៅទីស្តីការក្រសួងការបរទេស រាជធានីភ្នំពេញ។
ការធ្វើបទបង្ហាញនេះ ធ្វើឡើង នៅបន្ទាប់ពីក្រុមយោធាថៃ បានបើកការបាញ់ប្រហារមកលើប្រជាពលរដ្ឋស៊ីវិលកម្ពុជា នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីថ្ងៃទី១២ វិច្ឆិកា ចំនួនពីរលើក គឺនៅវេលាម៉ោង ១៥:៥០នាទី និងម៉ោង ១៧:៥៤នាទីល្ងាច ដែលបណ្តាលឱ្យប្រជាជនស៊ីវិលកម្ពុជា ម្នាក់បានស្លាប់ និង ៣នាក់ បានរងរបួស ។
ក្រសួងការបរទេស និងសហប្រតិបត្តិការអន្តរជាតិកម្ពុជា រាជរដ្ឋាភិបាលកម្ពុជា បានថ្កោលទោសយ៉ាងខ្លាំងបំផុតចំពោះការបាញ់ប្រហារលើជនស៊ីវិលនៅភូមិព្រៃចាន់ នៃខេត្តបន្ទាយមានជ័យកម្ពុជា និងបានហៅការបាញ់ប្រហារនោះថា គឺជាការបាញ់ប្រហារដោយគ្មានហេតុផលពីសំណាក់កងកម្លាំងថៃ ។ នៅជាមួយគ្នានោះទៀត ក្រសួងការបរទេស បានចាត់ទុកឧប្បត្តិហេតុនេះ គឺជាការបង្ហាញពីការរំលោភយ៉ាងធ្ងន់ធ្ងរលើអធិបតេយ្យភាព និងបូរណភាពទឹកដីរបស់កម្ពុជា ក៏ដូចជាការបំពានយ៉ាងគឃ្លើនចំពោះច្បាប់មនុស្សធម៌អន្តរជាតិ និងគោលការណ៍ជាមូលដ្ឋាននៃធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងសន្ធិសញ្ញាមិត្តភាព និងកិច្ចសហប្រតិបត្តិការនៅអាស៊ីអាគ្នេយ៍ (TAC) ។
នៅក្នុងសេចក្តីថ្លែងការណ៍ ក្រសួងការបរទេស បន្ទាប់ពីមានហេតុការណ៍បានប្រហារនោះ បានបញ្ជាក់ថា រាជរដ្ឋាភិបាលកម្ពុជា បានធ្វើការតវ៉ាជាផ្លូវការតាមរយៈស្ថានទូតថៃប្រចាំនៅទីក្រុងភ្នំពេញ ហើយនឹងចាត់វិធានការសមស្របដើម្បីតាមដាន រួមទាំងការស៊ើបអង្កេតនៅនឹងកន្លែងអំពីការបាញ់សម្លាប់ជនស៊ីវិល ដោយមានការចូលរួមពីក្រុមអ្នកអង្កេតការណ៍អាស៊ានផងដែរ ។ កម្ពុជាស្វាគមន៍ចំពោះការគាំទ្រ និងការចូលរួមពីគ្រប់ដៃគូដែលពាក់ព័ន្ធក្នុងការស៊ើបអង្កេតនេះ ។
ក្រសួងការបរទេសបានបញ្ជាក់ថា កម្ពុជា ចាប់តាំងពីមានបទឈប់បាញ់ចូលជាធរមាននៅថ្ងៃទី២៨ ខែកក្កដា ឆ្នាំ២០២៥ មក កម្ពុជាបានអនុវត្តការអត់ធ្មត់ជាទីបំផុត ដោយមិនចាត់វិធានការតបតទៅនឹងសកម្មភាពញុះញង់ឥតឈប់ឈរ រួមទាំងការបាញ់ប្រហារលើជនស៊ីវិលដ៏ឃោរឃៅនាពេលនេះ ក្នុងគោលបំណងរក្សាឲ្យបាននូវបទឈប់បាញ់នេះ ។ ដើម្បីបុព្វហេតុសន្តិភាព ស្ថិរភាព និងវិបុលភាពសម្រាប់ប្រជាជាតិទាំងពីរ និងសម្រាប់តំបន់ទាំងមូល រាជរដ្ឋាភិបាលកម្ពុជាទាមទារឲ្យប្រទេសថៃបញ្ឈប់ការគំរាមកំហែង និងការប្រើប្រាស់កម្លាំង ហើយងាកទៅប្រកាន់ខ្ជាប់នូវការប្តេជ្ញាចិត្តរបស់ខ្លួនក្នុងការគោរពគ្នាទៅវិញទៅមក ដោះស្រាយជម្លោះដោយសន្តិវិធី ស្របតាមច្បាប់អន្តរជាតិ ដូចមានចែងក្នុងសេចក្តីថ្លែងការណ៍រួម ដែលបានចុះហត្ថលេខារវាងនាយករដ្ឋមន្រ្តីនៃប្រទេសទាំងពីរ នៅទីក្រុងគូឡាឡាំពួ កាលពីថ្ងៃទី២៦ ខែតុលា ឆ្នាំ២០២៥ កន្លងទៅ ៕
អត្ថបត ៖ គង់ សុផុល
រូបភាព ៖ សួង ពិសិដ្ឋ
