(ភ្នំពេញ)៖ រដ្ឋបាលខណ្ឌចំការមន បើកការដ្ឋាន​ជួស​ជុល​ផ្លូវអ៊ុតកៅស៊ូ និងដាក់លូរំដោះទឹក ក្នុងសង្កាត់ចំនួនពីរ មាន​សង្កាត់បឹងត្របែក និងសង្កាត់ផ្សារដើមថ្កូវ នាព្រឹក​ថ្ងៃទី១៧ ខែវិច្ឆិកា ឆ្នាំ២០២៥ ក្រោមវត្តមានលោក ហ៊ត វ៉ាន់ធី អភិបាលរងខណ្ឌ តំណាងលោក កៀង ល័ក្ស អភិបាលខណ្ឌចំការមន ។

លោក ហ៊ត វ៉ាន់ធី បានធ្វើការណែនាំទៅដល់អ្នកម៉ៅការ ទទួលជួសជុលផ្លូវអ៊ុតដៅស៊ូ និងដាក់ប្រព័ន្ធលូ ធ្វើយ៉ាង​ណាឱ្យពន្លឿនរួចរាល់តាមគម្រោង និងត្រឹមត្រូវតាម​លក្ខណៈបច្ចេកទេស ធានាពីគុណភាពប្រើប្រាស់​បាន​យូរអង្វែង ។

លោកអភិបាលរងខណ្ឌ បានលើកឡើងថា រាជរដ្ឋាភិ​បាល បានផ្តល់ថវិកាវិភាជន៍ដល់ឃុំសង្កាត់​ទូទាំង​ប្រ​ទេសមានការកើនឡើងជាលំដាប់រៀងរាល់ឆ្នាំ ដើម្បីរៀប​ចំ អភិវឌ្ឍន៍មូលដ្ឋាន ស្របតាមស្ថានភាពដែលតម្រូវការ​ចាំ​បាច់របស់ប្រជាពលរដ្ឋ។ ដោយឡែកចំពោះសង្កាត់ នៅក្នុងរាជធានីភ្នំពេញ បានរៀបចំផែនការអភិវឌ្ឍន៍របស់​ខ្លួន ដោយផ្តោតជាសំខាន់ទៅលើគម្រោងជាអាទិភាព គឺ៖ ការជួសជុលផ្លូវ ដាក់ភ្លើងបំភ្លឺផ្លូវសាធារណៈ ដាក់លូ ស្តារលូ និងការរៀបចំការ៉ូឡា ឱ្យមានលក្ខណៈ ល្អប្រសើរ និងមានគុណភាពខ្ពស់។

លោកអភិបាលរង ក៏បានធ្វើការណែនាំដល់ចៅសង្កាត់ ដែលជាម្ចាស់គម្រោង ត្រូវតាមដានឱ្យបានជាប់ជាប្រចាំ ចំពោះក្រុមហ៊ុនទទួលការ ក្នុងការអនុវត្តគម្រោង ដោយ​ត្រូវហ៊ានសរសេរ នូវរាល់ចំណុចខ្វះខាត អសកម្មទាំង​​ឡាយ​ណារបស់ក្រុមហ៊ុនទទួលម៉ៅការ ដែលមិនអនុវត្ត​តាមកិច្ចសន្យា នៅក្នុងសៀវភៅ តាមដានការដ្ឋាន ។

លោកក៏សូមឱ្យបងប្អូនប្រជាពលរដ្ឋ ត្រូវចូលរួមតាមដាន ការអនុវត្តន៍ការងាររបស់ក្រុមហ៊ុនទទួលម៉ៅការផងដែរ ពីព្រោះបងប្អូន គឺជាអ្នកទទួលផលផ្ទាល់ពីគម្រោងនេះ បើឃើញការអនុវត្តន៍របស់ក្រុមហ៊ុនខុសពីកិច្ចសន្យា ត្រូវរាយការណ៍ជូនលោកចៅសង្កាត់ ឬសាលាខណ្ឌ ដើម្បីចុះពិនិត្យ និងកែសម្រួលជាបន្ទាន់ ។

សូមជម្រាបថា សង្កាត់បឹងត្របែក មានគម្រោងជួសជុល​អ៊ុតកៅស៊ូ AC នៅផ្លូវលេខ ១២៣ ប្រវែង ៩១ម៉ែត្រ ទទឹង ៨ម៉ែត្រ ។ ជួសជុលអ៊ុតកៅស៊ូ AC នៅផ្លូវលេខ ៤២០ ប្រវែង ២០០ម៉ែត្រ ទទឹង៨ម៉ែត្រ ។ ដាក់លូមូល រំដោះទឹក ទំហំ ០.៦ម នៅផ្លូវ៩៥ ប្រវែង២៤២ ម៉ែត្រ ។ ដាក់លូរំដោះទឹកមូល ទំហំ ០.៦ម ផ្លូវ៩៩ ប្រវែង១៣១ ម៉ែត្រ ។ ដាក់លូរំដោះទឹកមូល ទំហំ ០.៦ម ផ្លូវ៩៩ ប្រវែង ៣៣៥ ម៉ែត្រ ។

ចំណែកសង្កាត់ផ្សារដើមថ្កូវ មានគម្រោងដាក់លូរំដោះ​ទឹក​ទំហំ ០,៦ម សងខាងផ្លូវ​៥១០ ប្រវែង ៣២០ ម៉ែត្រ ។ ដាក់លូរំដោះទឹកទំហំ ០,៦ម ផ្លូវ៤៩៤ ប្រវែង ១.០០០ម៉ែត្រ និងដាក់លូរំដោះទឹកទំហំ ០,៦ម ផ្លូវ​១៣៥ ប្រវែង ៤០០ ម៉ែត្រ ៕

ដោយ វណ្ណលុក