(ភ្នំពេញ)៖ ឯកឧត្តម ឆោម សំបូរ អគ្គលេខាធិការរង សហព័ន្ធ​កីឡាវាយកូនគោលកម្ពុជា បញ្ជាក់ថា វគ្គ​បណ្តុះ​បណ្តាលគ្រូបង្វឹកថ្នាលកីឡាវាយគោល ដែល​រៀបចំ​ដោយ​​សហព័ន្ធកីឡាវាយកូនគោលកម្ពុជា ក្រោម​ការ​បណ្តុះបណ្តាលដោយគ្រូឧទ្ទេសអន្តរជាតិមកពីស្ថាបប័ន R & A នឹងរួមចំណែកជួយឱ្យសិក្ខាកាម​ជាគ្រូ​បង្វឹក​យល់ដឹងកាន់តែច្បាស់អំពីជំនាញបណ្តុះបណ្តាលកីឡាករកីឡាការិនីវ័យក្មេង ។

ឯកឧត្តម អគ្គលេខាធិការរង បានរំលេចថា វគ្គបណ្តុះ​បណ្តាលនេះ គឺជាការបណ្តុះបណ្តាលលើកដំបូង ដែលមានកីឡាករកីឡាការិនីថ្មីៗចូលរួម ហើយក៏ផ្តល់​ឱកាសឱ្យសិក្ខាកាមមិនធ្លាប់មានជំនាញកីឡាវាយគោលចូលរួមផងដែរ ក្នុងគោលបំណងបំពាក់បំប៉នចំណេះ​ដឹង និង​ពង្រីកនៃការផ្សព្វផ្សាយឱ្យកាន់តែផុសផុលខ្លាំង​នៅ​កម្ពុជា។

វគ្គបណ្តុះបណ្តាលគ្រូបង្វឹកថ្នាលនេះ សិក្សា​រយៈ​ពេល ៣ថ្ងៃ​គ្រូបង្វឹកបានក្រេបជញ្ជក់​ពីយុទ្ធសាស្រ្តបង្ហាត់​កុមារ​ធ្វើយ៉ាងណាឱ្យកុមារដែលចូលរួមហ្វឹកហាត់បានសប្បាយរីករាយនិងចង់ហ្វឹកហាត់កីឡាកូនគោល។ ដោយក្នុង​នោះ មានទាំងការសិក្សាទ្រឹស្តី និងការអនុវត្តផ្ទាល់​នៅ​លើ​ទីលានផងដែរ ។

ជាមួយគ្នានោះ ឯកឧត្តម អគ្គលេខាធិការរង ក៏បានអំពាវ​នាវដល់សិក្ខាកាមដែលទទួលបានចំណេះដឹងពីវគ្គបណ្តុះ​បណ្តាលគ្រូបង្វឹកថ្នាលរយៈពេល ៣ថ្ងៃនេះ សូម​យកទៅអនុវត្តក្នុងការបង្ហាត់ឱ្យត្រឹមត្រូវទៅតាមអ្វីដែលដែលទទួលបានការចែករំលែកពីគ្រូឧទ្ទេសអន្តរជាតិ ដើម្បីបណ្តុះធនធានថ្នាលរបស់កម្ពុជាឱ្យកាន់តែមានសក្កានុពល។

លោក ប៉ែន វុទ្ធី ប្រធាននាយកដ្ឋានអប់រំកាយ និងកីឡា បានកោតសើរនិងវាយតម្លៃខ្ពស់ក្នុងការចំណាយពេលវេលារបស់សិក្ខាកាមមកចូលរួមវគ្គបណ្តុះបណ្តាលដើម្បីទទួលបានចំណេះជំនាញយកទៅបង្ហាត់ប្រកបដោយវិជ្ជាជីវៈ។ លោក សង្ឈឹមយ៉ាងមុតមាំថា សិក្ខាកាមដែលទទួល​បានចំណេះជំនាញពីវគ្គនេះ នឹងនាំយក​ទៅចែករំលែក​នៅមូលដ្ឋានជួយធ្វើឱ្យធនធានគ្រូបង្វឹកមានកាន់តែច្រើនដែលនឹងរួមចំណែកផលិតបានធនធានថ្នាលកាន់តែមានសក្កានុពល និង សប្បូរបែប ។

សូមបញ្ជាក់ថា វគ្គបណ្តុះបណ្តាលគ្រូបង្វឹកថ្នាលកីឡាវាយគោល មានសិក្ខាកាមចូលរួមចំនួន៣០នាក់ក្នុងនោះមានសិក្ខាកាម៤នាក់មកពីប្រទេសមីយ៉ាន់ម៉ា ក្រោមការវាយតម្លៃរបស់គ្រូឧទ្ទេសអន្តរជាតិ សិក្ខាកាមទទួលបាននិទ្ទេសល្អភាគច្រើន៕

រូបភាព ៖ ជីម ភារ៉ា
អត្ថបទ ៖ ជាវ ចន្ធូ