ភ្នំពេញ៖ត្រីគល់រាំងគល់រាំងចំនួន២ក្បាល ដែលមានទម្ងន់ចន្លោះពី ១២ ទៅ១៦គីឡូក្រាមក្នុងមួយក្បាល ព្រមទាំង​ត្រី​ត្រសក់មួយក្បាលទម្ងន់ ២គីឡូក្រាម ត្រូវបានលែងចូលទៅក្នុងទឹកទន្លេក្នុងទីជម្រក​ធម្មជាតិរបស់វាវិញនៅ​ថ្ងៃអង្គារក្នុង​សប្ដាហ៍នេះ។

គម្រោងអច្ឆរិយភាពនៃទន្លេមេគង្គ(the Wonders of the Mekong)បានឱ្យដឹងថា ត្រីដ៏កម្រទាំងពីរប្រភេទ​នេះត្រូវ​បានលែងបន្ទាប់ពីម្ចាស់ដាយត្រី និងប្រជានេសាទតាមដងទន្លេសាប និងទន្លេមេគង្គបាន​ប្រគល់ដោយស្ម័គ្រចិត្ត​នៅ​ពេលចាប់បានត្រីទាំង២ប្រភេទនេះរួចមក។ការប្រគល់នេះបានបង្ហាញថា ប្រជាពលរដ្ឋមានយល់ដឹងពី​តម្លៃនៃធនធាន​ធម្មជាតិ និងបានចូលរួមអភិរក្សមច្ឆាជាតិដ៏កម្រផងដែរ។

ប្រភពខាងលើនេះបញ្ជាក់ថា ត្រីទាំង២ប្រភេទចំនួនបីក្បាលនេះ ត្រូវបានលែងក្នុងទីធម្មជាតិវិញនៅថ្ងៃទី១៨ ខែវិច្ឆិកា ឆ្នាំ ២០២៥។ជាមួយគ្នានេះគម្រោងអច្ឆរិយភាពនៃទន្លេមេគង្គក៏បានថ្លែងអំណរគុណដល់ម្ចាស់ឧបករណ៍នេសាទ «ដាយត្រី ២ដេ» ព្រមទាំងបងប្អូនកម្មករនៅលើបែរទាំងអស់ ដែលបានទំនាក់ទំនងមកកាន់រដ្ឋបាលជលផល ដើម្បីចុះទៅលែង​ត្រី​ទឹកសាប ដែលកំពុងរងគ្រោះជិតផុតពូជទាំងនេះ ដើម្បីឱ្យវាបានទៅដល់ទីជម្រកដើមដោយសុវត្ថិភាព។

គួរសូមជម្រាបថា ត្រីគល់រាំងជាប្រភេទត្រីទឹកសាបដែលធំបំផុតមួយក្នុងចំណោមត្រីធំៗបំផុតទាំង៣ប្រភេទ គឺទី១. ត្រីបបែល​​យក្ស ,ទី២. ត្រីរាជ និងទី៣.ត្រីគល់រាំង ។

ត្រីគល់រាំង មានប្រវត្តិយូរលង់ណាស់មកហើយទាក់ទងនឹងជីវភាពប្រជាជនតាំងពីមុនសម័យអង្គរមកម្ល៉េះ ដោយ សារ​តែនៅតាមប្រាង្គប្រាសាទបុរាណ នៅខេត្តសៀមរាបក៏មានរូបចម្លាក់ជាច្រើនទាក់ទងនឹងជីវភាពប្រចាំ ថ្ងៃរបស់ប្រជាជន​ដោយភ្ជាប់នឹងរូបត្រី ជាពិសេសគឺនៅប្រាសាទបាយ័ន ។នៅតាមជញ្ជាំងប្រាសាទបាយ័នផ្នែកខ្លះៗ យើងអាចមើល​ឃើញ​នូវចម្លាក់រូបត្រីគល់រាំងនេះ ដែលជាភស្តុតាងបញ្ជាក់អំពីទំនាក់ទំនងរវាងត្រីនេះ ទៅនឹងជីវភាពរស់នៅរបស់ប្រជាជន​ក្នុង
សម័យបុរាណកាល។

ចំណែកត្រីត្រសក់ ជាប្រភេទត្រីធំ ក្នុងចំណោមប្រភេទត្រីធំៗដទៃទៀត ដែលរស់នៅក្នុងទន្លេមេគង្គ។ ត្រីប្រភេទនេះ វាអាចធំលូតលាស់រហូតដល់ទម្ងន់ជាង៩០គីឡូក្រាម និងមានប្រវែងដងខ្លួនប្រមាណ ១,៥ ម៉ែត្រ ។

គម្រោងអច្ឆរិយភាពនៃទន្លេមេគង្គបានអំពាវនាវដល់ពលរដ្ឋសូមចូលរួមការពារប្រភេទត្រីកម្រ «ត្រីរាជ ត្រីគល់រាំង ត្រីបបែលយក្ស ត្រីត្រសក់ ត្រីប៉ាសាណាក និងធននធានជលផលដែលកំពុងរងគ្រោះឱ្យបានគ្រប់ៗគ្នា» ។​​មានន័យថា​ការពារត្រីកម្រនៅថ្ងៃនេះ គឺជាការការពារប្រព័ន្ធអេកូឡូស៊ីទន្លេមេគង្គសម្រាប់ពេលអនាគត និងទុកដល់កូនចៅ​ជំនាន់​ក្រោយៗទៀត៕
ដោយ៖ម៉ាដេប៉ូ