មន្រ្តីជាន់ខ្ពស់ក្រសួងព័ត៌មាន៖ ទីប្រឹក្សារបស់ក្រសួង គឺជាអ្នកផ្តល់ប្រឹក្សា ជួយដល់ ប្រធាន ស្ថាប័ន និងថ្នាក់ដឹកនាំនៅក្នុងការងារប្រតិបត្តិការប្រចាំថ្ងៃ
(ភ្នំពេញ)៖ មន្រ្តីជាន់ខ្ពស់ក្រសួងព័ត៌មាន បានលើកឡើងថា តួនាទីជាទីប្រឹក្សារបស់ក្រសួងព័ត៌មាន គឺមានសារៈសំខាន់ណាស់ ព្រោះជាអ្នកផ្តល់ប្រឹក្សា ជួយដល់ ប្រធាន ស្ថាប័ន និងថ្នាក់ដឹកនាំនៅក្នុងការងារប្រតិបត្តិការជាប្រចាំថ្ងៃ របស់ក្រសួងព័ត៌មានដែលជាស្ថាប័ន គ្រប់គ្រងទៅលើវិស័យព័ត៌មាន ដែលជាស្ថាប័នគាំទ្រមួយយ៉ាងសំខាន់ក្នុងការជួយទៅដល់ក្រសួង មន្ទីរទាំងនៅថ្នាក់ជាតិ និងថ្នាក់ក្រោមជាតិ នៅក្នុងវិស័យព័ត៌មាន និងសាធារណៈមតិ ។
ប្រសាសន៍ ឯកឧត្តម ទន់ សារ៉ាត រដ្ឋលេខាធិការ និងជាប្រធានក្រុមការងារសម្របសម្រួល ជាមួយទីប្រឹក្សាក្រសួងព័ត៌មាន នៅព្រឹកថ្ងៃទី១៩ ខែវិច្ឆិកា ឆ្នាំ២០២៥នេះ បានបើកកិច្ចប្រជុំបូកសរុបលទ្ធផលការងាររបស់ទីប្រឹក្សាក្រសួងព័ត៌មាន ឆ្នាំ២០២៥ និងលើកទិសដៅការងារបន្តសម្រាប់ឆ្នាំ២០២៦។
គួរបញ្ចាក់ថា ទីប្រឹក្សាក្រសួងព័ត៌មាន បច្ចុប្បន្ននេះមាន សរុបចំនួន ៤១៣នាក់ ស្រី១១៥នាក់ ហើយក្នុងចំណោមទីប្រឹក្សាទាំងនេះ មានចំនួន ៦៤រូប ត្រូវបានឯកឧត្តម រដ្ឋមន្ត្រី និងជាប្រធានក្រុមការងាររាជរដ្ឋាភិបាល ចាត់បញ្ចូលជាសមាជិក សមាជិកា ក្រុមការងារចុះមូលដ្ឋានខេត្តក្រចេះ ដើម្បីរួមបំពេញការងារជាមួយប្រធានក្រុមការងារក្រុង និងស្រុកទាំង៧ របស់ខេត្តក្រចេះ ដើម្បីត្រួតពិនិត្យការអនុវត្តកម្មវិធីនយោបាយយុទ្ធសាស្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា។
ឯកឧត្តម ទន់ សារ៉ាត បានថ្លែងថា នេះជាលើកទី២ហើយក្នុងរយៈពេលជាង ២ឆ្នាំ នៃដំណើរការរបស់ រាជរដ្ឋាភិបាលកម្ពុជាអាណត្តិទី៧ នៃរដ្ឋសភា ដោយក្រសួងព័ត៌មាន បានរៀបចំកិច្ចប្រជុំទីប្រឹក្សាក្រសួងព័ត៌មាន ក្រោមការដឹកនាំរបស់ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន។
ជាមួយគ្នានេះដែរ ដើម្បីលើកស្ទួយការងារជំនាញ ក៏ដូចជាការផ្ទេរចំណេះជំនាញដល់ មន្ត្រីបន្តវេន ទីប្រឹក្សាក្រសួងព័ត៌មាន ចំនួន ៧៨នាក់ បានចូលរួមជួយបណ្តុះបណ្តាលដល់មន្ត្រីតាមអគ្គនាយកដ្ឋានទាំង ៥ចំណុះឱ្យក្រសួង។ ក្រៅពីកិច្ចការងារស្នូល ទីប្រឹក្សាមួយចំនួនបានជួយចែករំលែកព័ត៌មានល្អៗ ដែលទទួលបានពីក្រុមការងារប្រចាំការសមរភូមិព្រំដែន របស់ក្រសួងព័ត៌មាន ដោយជួយបង្ហោះសារទាក់ទងដល់ការទប់ស្កាត់ព័ត៌មានក្លែងក្លាយ ព័ត៌មានប្រឌិត ព័ត៌មានញុះញង់ជាដើម ៕
ដោយ ៖ ង៉ាន់ ទិត្យ
រុបភាព ៖ រិន រចនា
