ទេសរដ្ឋមន្រ្តី អៀង មូលី ស្នើភាគីពាក់ព័ន្ធ ប្រកាន់យកគោលការណ៍ «បីមួយ» ដើម្បីឈានទៅបញ្ចប់ការឆ្លងមេរោគអេដស៍ និងជំងឺអេដស៍
(ភ្នំពេញ)៖ ប្រធានអាជ្ញាធរជាតិប្រយុទ្ធនឹងជំងឺអេដស៍ បានស្នើដល់ភាគីពាក់ព័ន្ធ ឱ្យប្រកាន់យកគោលការណ៍ «បីមួយ» ដើម្បីឈានទៅបញ្ចប់ការឆ្លងរាលដាលមេរោគអេដស៍ និងជំងឺអេដស៍ ។
ឯកឧត្តមទេសរដ្ឋមន្រ្តី អៀង មូលី ថ្លែងដូច្នេះ ក្នុងឱកាសបិទសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅសកម្មភាព ឆ្នាំ២០២៦ នាព្រឹកថ្ងៃទី២០ ខែវិច្ឆិកា ឆ្នាំ២០២៥ នៅទីស្តីការគណៈរដ្ឋមន្រ្តី ដោយមានការចូលរួមពីប្រធានគណៈកម្មាធិការប្រយុទ្ធនឹងជំងឺអេដស៍ក្រសួង ស្ថាប័ន រាជធានី ខេត្ត និងប្រធានលេខាធិការដ្ឋានប្រយុទ្ធនឹងជំងឺអេដស៍រាជធានី ខេត្ត អង្គការជាតិ អន្តរជាតិ និងអង្គការសង្គមស៊ីវិល សរុប ១៨០នាក់ ។
ឯកឧត្តម ទេសរដ្ឋមន្រ្តី បានថ្លែងថា ក្នុងរយៈពេល ១ឆ្នាំកន្លងទៅនេះ យើងបានបំពេញភារកិច្ចយ៉ាងសកម្មរួមគ្នា ដើម្បីឈានទៅបញ្ចប់ការឆ្លងរាលដាលមេរោគអេដស៍ និងជំងឺអេដស៍ ក្នុងដំណាក់កាលដែលស្ថានភាពជំនួយបរទេស មានការធ្លាក់ចុះ ខណៈគោលដៅរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី ក្នុងការបញ្ចប់ជំងឺអេដស៍នៅឆ្នាំ២០២៨ គឺស្ថិតក្នុងលក្ខខណ្ឌនៃការឈានទៅសម្រេចបានរបស់យើង។ ប៉ុន្តែម្ចាស់ជំនួយ កំពុងកាត់បន្ថយការគាំទ្ររបស់ខ្លួន ដែលយើងត្រូវប្រឈមនឹងស្ថានភាពមួយ ដែលធនធានមានកំណត់ ពេលវេលាដែលមានខ្លី ហើយនឹងគោលដៅ មានមហិច្ឆតាខ្ពស់ ។
ឯកឧត្តម បន្តថា ក្នុងការផ្ទេរដំណាក់កាលនេះ យើងទាំងអស់គ្នា ចាប់ផ្តើមបំពេញតួនាទីក្នុងភាពជាម្ចាស់ រួមជាមួយនឹងការពង្រឹងភាពជាអ្នកដឹកនាំ ជាពិសេស ការទទួលខុសត្រូវរបស់គណៈកម្មាធិការប្រយុទ្ធនឹងជំងឺអេដស៍ នៅតាមក្រសួង ស្ថាប័ន រាជធានី ខេត្ត និងអង្គការដៃគូ សំដៅពង្រីកសក្តានុពលនៃបទអន្តរាគមន៍នានា ព្រមទាំងធ្វើការសិក្សាស្រាវជ្រាវ និងជំរុញលើកទឹកចិត្តអ្នកសង្ស័យថា ផ្ទុកមេរោគអេដស៍ ឱ្យមកទទួលសេវាធ្វើតេស្តរកមេរោគអេដស៍ ដើម្បីឈានទៅសម្រេចបានគោលដៅ ៩៥ ទី១ ។
ឯកឧត្តម បន្ថែមថា ចំណុចស្នូលចំនួនបី ដែលទាមទារក្នុងភាព ជាអ្នកដឹកនាំ និងភាពជាម្ចាស់ គឺ៖ -គំរូប្រតិបត្តិការ, -ការធានាហិរញ្ញវត្ថុប្រកបដោយចីរភាព ដោយការបង្កើនប្រសិទ្ធភាពធនធានដែលមានស្រាប់ និង-អភិបាលកិច្ចល្អ ។ ការដកថយរបស់ម្ចាស់ជំនួយពីខាងក្រៅ មិនមែនជាការថយក្រោយនោះទេ តែគឺជាលទ្ធផលផ្ទាល់ នៃភាពជោគជ័យរបស់យើង ហើយនេះ ជាកត្តាចាំបាច់ ក្នុងការជំរុញឱ្យមានការផ្លាស់ប្តូរ ។
ដើម្បីទទួលបានជោគជ័យក្នុងបរិបទថ្មីនេះ ភាគីពាក់ព័ន្ធទាំងអស់ ត្រូវប្រកាន់យកគោលការណ៍ «បីមួយ» ដែលជាប្រព័ន្ធថាមវន្ត ក្នុងដំណើរការក្រោមក្របខណ្ឌរួមមួយ គឺ៖ ផែនការយុទ្ធសាស្រ្តតែមួយ៖ សកម្មភាពរបស់យើង ត្រូវតែតម្រឹមឱ្យបានល្អសមស្របជាមួយយុទ្ធសាស្រ្តជាតិ។
យន្តការសម្របសម្រួលតែមួយ៖ កិច្ចខិតខំប្រឹងប្រែងទាំងអស់ របស់ថ្នាក់ជាតិ និងថ្នាក់ក្រោមជាតិ ត្រូវបញ្ជូនតាមរយៈអាជ្ញាធរជាតិប្រយុទ្ធនឹងជំងឺអេដស៍ ដើម្បីលុបចេញការត្រួតជាន់ភារកិច្ច និងបង្កើនប្រសិទ្ធភាព ។
ប្រព័ន្ធតាមដាន និងវាយតម្លៃតែមួយ៖ យើងត្រូវតែប្រើប្រព័ន្ធជាតិតែមួយ ដែលអាចទុកចិត្តបាន សម្រាប់ការតាមដានវឌ្ឍនភាព និងការប្រើប្រាស់ធនធាន ។
ឯកឧត្តម ទេសរដ្ឋមន្រ្តី បានស្នើគ្រប់ក្រសួង ស្ថាប័ន ជាពិសេស ប្រធានគណៈកម្មាធិការប្រយុទ្ធនឹងជំងឺអេដស៍ រាជធានី ខេត្តនីមួយៗ បង្ហាញពីភាពជាអ្នកដឹកនាំ និងភាពជាម្ចាស់ តាមរយៈការប្រកាន់ខ្ជាប់ និងភាពម៉ឺងម៉ាត់ចំពោះតម្លាភាព និងគណនេយ្យភាព, ប្រសិទ្ធភាព និងអាទិភាព, ការត្រួតពិនិត្យ និងតាមដាន ៕
ដោយ វណ្ណលុក
