ឯកឧត្តម ឃួង ស្រេង ណែនាំ អាជ្ញាធរយកចិត្តទុកដាក់ខ្ពស់ ដោះស្រាយការកកស្ទះចរាចរ
(ភ្នំពេញ)៖ ឯកឧត្តម ឃួង ស្រេង បានណែនាំឱ្យអភិបាលខណ្ឌទាំង១៤ យកចិត្តទុកដាក់ឱ្យបានខ្ពស់បំផុត លើការដោះស្រាយការកកស្ទះចរាចរ ពិសេសការចតយានយន្តគ្មានសណ្តាប់ធ្នាប់ និងការរំលោភទ្រូងផ្លូវ និងចិញ្ចើមផ្លូវ ពីសំណាក់អាជីវករមួយចំនួន ខណៈកំណាត់ផ្លូវតូចធំ ចំនួន ១០៨ផ្លូវ ត្រូវបានរំលោភធ្វើឱ្យបាត់បង់សណ្តាប់ធ្នាប់ និងរបៀបរៀបរយ បណ្តាលឱ្យមានការកកស្ទះចរាចរណ៍។
ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ បានណែនាំបែបនេះ នារសៀលថ្ងៃទី២០ ខែវិច្ឆិកា ឆ្នាំ២០២៥ ក្នុងកិច្ចប្រជុំស្តីពីការងាររៀបចំសណ្តាប់ធ្នាប់ និងរបៀបរៀបរយសាធារណៈ ក្នុងភូមិសាស្ត្ររាជធានីភ្នំពេញ ជាមួយកងកម្លាំង និង អាជ្ញាធរខណ្ឌទាំង១៤ នៅសាលារាជធានីភ្នំពេញ ។
ឯកឧត្តម ឃួង ស្រេង បន្តថា តាមការសង្កេតជាក់ស្តែងក្នុង ១សប្តាហ៍កន្លងមកនេះ នៅរាជធានីភ្នំពេញ មានការកកស្ទះចរាចរណ៍យ៉ាងខ្លាំង ពិសេសនៅលើបណ្តោយផ្លូវធំៗ និងផ្លូវចេញចូលរាជធានីភ្នំពេញ។ តាមការសិក្សា ការកកស្ទះចរាចរណ៍នេះ គឺបណ្តាលមកពីការចតយានយន្តមិនមានសណ្តាប់ធ្នាប់ និងមួយចំនួនទៀតបណ្តាលមកពីប្រជាពលរដ្ឋមកពីប្រទេសថៃ និងមកពីបណ្តាខេត្តផ្សេងៗទៀត សម្រុកមកភ្នំពេញដើម្បីរកការងារធ្វើ។
ចំពោះការកកស្ទះចរាចរណ៍នេះ ត្រូវយកចិត្តទុកដាក់ដោះស្រាយឱ្យប្រសើរឡើង ជៀសវាងឱ្យបាននូវការថ្នាំងថ្នាក់ពីសំណាក់ប្រជាពលរដ្ឋ ពិសេសមើលនៅតាមសាលារៀនឯកជនមួយចំនួន ដោយសាលាទាំងនេះ ក្នុង ១ថ្ងៃបានស្ទះចរាចរណ៍រហូត ៤ដង ។ បន្ថែមពីនេះត្រូវត្រួតពិនិត្យ និងចាត់វិធានការចំពោះការចតយានយន្ត មិនមានសណ្តាប់ធ្នាប់ និងការលក់ដូររបស់បងប្អូនអាជីវករ ។
ឯកឧត្តម ឃួង ស្រេង បញ្ជាក់ថា៖ នៅរាជធានីភ្នំពេញមានកំណាត់ផ្លូវតូចធំចំនួន ១០៨ផ្លូវ ត្រូវបានរំលោភធ្វើឱ្យបាត់បង់សណ្តាប់ធ្នាប់របៀបរៀបរយ។ តែទោះបីជាយ៉ាងណាក្តី អាជ្ញាធររាជធានីភ្នំពេញ បានណែនាំ និង អនុវត្តលើការងារនេះបានល្អប្រសើរបានមួយកម្រិតហើយ ៕
រូបភាព៖ ថេត វិចិត្រ
អត្ថបទ៖ ហេង សម្បត្តិ
