សមត្ថកិច្ចកំពុងស៊ើបអង្កេត លើសំណុំរឿងរំដោះឧក្រិដ្ឋជន ៦នាក់ នៅសាលាដំបូងខេត្តស្វាយរៀង
(ភ្នំពេញ)៖ ក្រោយការរត់គេចខ្លួន និងការចាប់ខ្លួនបានមកវិញទាំងអស់ នៃ ជនសង្ស័យចំនួន ៦នាក់ រួមទាំងស្រ្តីជនជាតិវៀតណាមម្នាក់ដែលរួមគំនិតរំដោះបក្សពួករបស់ខ្លួននៅសាលាដំបូងខេត្តស្វាយរៀងនោះ កំពុងត្រូវបានស្ថិតនៅក្នុងការសង្ស័យថា កើតឡើងពីអ្វីឱ្យពិតប្រាកដ ដោយមានការចោទប្រកាន់ពីសំណាក់បណ្តាញសង្គមហ្វេសប៊ុក និងដាក់ការសង្ស័យថា អាចមានការឃុបឃិតណាមួយ ពីសមត្ថកិច្ច និង ខ្លះទៀតថា ជាការហ្វេសប្រហែសរបស់សមត្ថកិច្ចប៉ុណ្ណោះ ។
ទាក់ទិនក្នុងរឿងនេះអ្នកនាំពាក្យអគ្គនាយកដ្ឋានពន្ធនាគារ នៃ ក្រសួងមហាផ្ទៃ លោក ឃៀង សុណាឌីន បានប្រាប់ទូរទស្សន៍អប្សរាថា៖គិតរហូតមកដល់ថ្ងៃទី២១ ខែវិច្ឆិកា ឆ្នាំ២០២៥នេះ ក្នុងប្រតិបត្តិការតាមចាប់ខ្លួនជនជាប់ឃុំទាំង ៦នាក់ និងស្ត្រីម្នាក់ដែលបានបន្លំខ្លួនចូលក្នុងបរិវេណសាលាដំបូងខេត្តស្វាយរៀងដើម្បីរំដោះបក្សពួកខ្លួននោះ កំពុងធ្វើការសើបអង្កេតបន្ថែមទៀតថា តើការរត់គេចខ្លួនរបស់ជនជាប់សង្ស័យបណ្តាមកពីអ្វីពិតប្រាកដ។
គួរបញ្ជាក់ថា ជនជាប់សង្ស័យចំនួន ៦នាក់ ដែលបានរត់គេចខ្លួនចេញពីសាលាដំបូងខេត្តស្វាយរៀង ក្នុងពេលក្រុមអនុរក្ស ពន្ធនាគារនាំខ្លួន ពួកគេមកកាត់ទោសនោះត្រូវបានស្រ្តីវ័យក្មេង ជនជាតិវៀតណាម ម្នាក់ ឈ្មោះ ង្វៀង ធី ហាយវ៉ាន់ បាននាំអាវុធខ្លីឱ្យបក្សពួករបស់គេ និង មធ្យោបាយ រថយន្តមួយគ្រឿង ដោយបានបាញ់រំដោះ រួចហើយនាំគ្នាឡើងរថយន្តគេចខ្លួនតែម្តង ។ ក្រោយមកក្រុមសមត្ថកិច្ចបានតាមចាប់ខ្លួនទាំងអស់មកវិញដោយបានបិទបញ្ចប់នៅថ្ងៃដដែលពោលគឺកាលពីថ្ងៃទី១៨ វិច្ឆិកា ឆ្នាំ២០២៥។
លោក ឃៀង សុណាឌីន បញ្ជាក់ប្រាប់ថា ជនសង្ស័យទាំង ៦នាក់ រួមទាំងស្រ្តីម្នាក់បានរំដោះជនសង្ស័យ រួមគ្នាទាំងអស់ ៧នាក់ ត្រូវបានបញ្ជូនទៅកាន់ស្នងការដ្ឋាននគរបាលខេត្តស្វាយរៀង។ពេលនេះក្រុមការងារជំនាញនៃអគ្គនាយកដ្ឋានពន្ធនាគារ កំពុងស៊ើបអង្កេតស្រាជ្រាវ និងរង់ចាំមើលលទ្ធផល ថាតើហេតុការណ៍ដែលបានកើតឡើងនៅក្នុងបរិវេណសាលាដំបូងខេត្តស្វាយរៀងនេះ បណ្តាលមកពីភាពចន្លោះប្រហោងនៅក្នុងការអនុវត្តតួនាទីរបស់មន្ត្រីពន្ធនាគារ ឬយ៉ាងណាឱ្យពិតប្រាកដ។
អ្នកនាំពាក្យអគ្គនាយកដ្ឋានពន្ធនាគារបានបញ្ជាក់ថា”យើងកំពុងរង់ចាំលទ្ធផលសាកសួរចម្លើយរបស់សមត្ថកិច្ចបន្ថែមទៀត។ខ្ញុំសុំបញ្ជាក់ថា ក្នុងការដឹកក្រុមជនសង្ស័យមកបើកសវនាការនេះមានចំនួន ២គន្លាក់។ ក្នុងនេះមានចាក់សោរស្រ្តីជនជាប់សង្ស័យមួយតង់ឱ្យពួកគេចុះពីរថយន្ត ចូលទៅកាន់កន្លែងសវនាការហើយ តែយើងនៅមានទ្វារសុវត្តិភាពមួយតង់ទៀតដែលជាទីកន្លែងជនសង្ស័យទាំង៦នាក់ចុះទៅកាន់ទីសវនាការ”។
បើតាមអ្នកនាំពាក្យអគ្គនាយកដ្ឋានពន្ធនាគារ លោក ឃៀង សុណាឌីន បានបញ្ជាក់ប្រាប់ដែរថា៖”ការសើបអង្កេតកំពុងធ្វើបន្តបន្ថែមទៀត ហើយលទ្ធផលនោះនឹងធ្វើការប្រកាសនៅថ្ងៃខាងមុខ”។
ទាក់ទិនក្នុងរឿងនេះដែរ លោក ឈីវ អ៊ិចគង់ អ្នកនាំពាក្យនៃអយ្យការសាលាដំបូងខេត្តស្វាយរៀងបានបញ្ជាក់ប្រាប់ឱ្យដឹងថា ពេលនេះការស៊ើបអង្កេតកំពុងដំណើរការនៅឡើយថាតើការរំដោះជនសង្ស័យចេញពីបរិវេណសាលាដំបូងរបស់ខេត្តស្វាយរៀងនេះ កើតចេញពីអ្វី ហើយនៅពេលលទ្ធផលចេញមកយ៉ាងណានោះខាងសាលាដំបូងខេត្តស្វាយរៀងនឹងធ្វើការប្រកាសប្រាប់សាធារណជន។
គួរបញ្ជាក់ថា ឧក្រិដ្ឋជនជនជាតិវៀតណាម ទាំង ៦នាក់នេះ ពួកគេជាប់សង្ស័យពាក់ព័ន្ធករណី Scam Online ដែលត្រូវបានសមត្ថកិច្ចជំនាញចាប់ខ្លួនបានកាលពីពេលកន្លងទៅ ៕
ដោយ ៖ ម៉ាដេប៉ូ
