ក្រុមស្ថាបត្យករ អាស៊ានបង្ហាញពីគំនិត និងគម្រោងអំពីស្ថាបត្យកម្មបែបសម័យទំនើប
(ភ្នំពេញ)៖ ស្ថាបត្យករ អាស៊ានបានបង្ហាញក្នុងការចែករំលែកដល់ភាគីពាក់ព័ន្ធ និងក្រុមនិស្សិតនូវគំនិតច្នៃប្រឌិតលើ វិស័យស្ថាបត្យកម្ម និងសំណង់ ដែលនេះបានចាត់ទុកជាការចូលរួមយ៉ាងសំខាន់មួយ ក្នុងការឈានទៅរកការអភិវឌ្ឍទីក្រុងឆ្លាតវៃ (Smart City) ដែលកំពុងរីកចម្រើនយ៉ាងខ្លាំងក្នុងតំបន់បណ្តាប្រទេសអាស៊ាន។
តាមរយៈការធ្វើបទបង្ហាញរបស់ក្រុមស្ថាបត្យករ គឺក្រៅអំពីការផ្តល់នូវចំណេះជំនាញ ក៏នៅបានផ្តល់នូវផ្នត់គំនិតថ្មីៗសម្រាប់ជំរុញក្រសួងពាក់ព័ន្ធ និងវិស័យឯកជន ពិសេស គឺវិស័យស្ថាបត្យកម្ម និងសំណង់តែម្ដង ដែលជាចលករមួយ សម្រាប់កសាងទីក្រុង តំបន់ប្រជុំជន ឈាន ទៅរកការរស់នៅប្រកបដោយភាពឆ្លាតវៃ ពោលគឺការរស់នៅដែលមានប្រើប្រាស់បច្ចេកវិទ្យាភាគច្រើន សម្រាប់ជាមធ្យោបាយក្នុងការបញ្ជា តាមរយៈប្រព័ន្ធស្វ័យប្រវត្តិកម្ម។
គួរបញ្ជាក់ថា កិច្ចប្រជុំ សភាស្ថាបត្យករអាស៊ានលើកទី៥ ដែលបានរៀបចំឡើងចាប់ពីថ្ងៃទី២០-២២ ខែវិច្ឆិកា ឆ្នាំ២០២៥នៅសណ្ឋាគារ SUN AND MOON RIVERSIDE ក្នុងរាជធានីភ្នំពេញ។
សម្រាប់ព្រឹត្តិការណ៍ សភា ស្ថាបត្យករ អាស៊ាន លើកទី៥ ដែលកម្ពុជាធ្វើជាម្ចាស់ផ្ទះនេះ រៀបចំឡើងក្នុងគោលបំណង លើកកម្ពស់បណ្តាញទំនាក់ទំនង និងកិច្ចសហប្រតិបត្តិការរវាងស្ថាបត្យករអាស៊ាន លើកកម្ពស់ការយល់ដឹងឱ្យកាន់តែទូលំទូលាយ និងជំរុញការអនុវត្តជំនាញស្ថាបត្យកម្មឆ្លងព្រំដែនរបស់ស្ថាបត្យករអាស៊ាន នៅទូទាំងប្រទេសដែលជាសមាជិករបស់ខ្លួន។
ក្នុងការចែករំលែកតាមរយៈបទបង្ហាញ ស្តីពី គម្រោងស្ថាបត្យកម្មសម្រាប់និរន្តភាពនៃការរស់នៅ(Architecture for Quality of Living)នារសៀលថ្ងៃទី ២០ ខែវិច្ឆិកា ឆ្នាំ២០២៥ ដោយស្ថាបត្យករអាស៊ាន លោក ឃុយ ពីការ បានធ្វើការចែករំលែក និងបង្ហាញពីគំនិតស្ថាបត្យកម្មពីប្រទេសកម្ពុជាដែលជាប្រទេសមួយកំពុងអភិវឌ្ឍន៍ទាំងសេដ្ឋកិច្ច និងធនធានមនុស្ស។
លោកបានចែករំលែកពីវិស័យសំណង់ក្នុងរាជធានីភ្នំពេញ ដែលជាទីប្រមូលផ្តុំប្រជាជន អភិវឌ្ឍន៍ ទំនើបកម្ម។ រាជធានីមួយនេះបានប្រមូលផ្តុំដោយសេដ្ឋកិច្ច លំនៅដ្ឋាន ធនធាន និងជាទីបណ្តុំនៃប្រព័ន្ធអប់រំ។ ជាមួយគ្នានេះ លោក បានចែករំលែកអំពី តំបន់ខេត្តកំពង់ស្ពឺដែលបង្ហាញពីសំណង់ទាក់ទិនបរិស្ថានផ្សារភ្ជាប់នឹងធម្មជាតិ ,សំណង់និងធនធានធម្មជាតិ ដែលជំរុញដល់គុណភាពនៃការរស់នៅ និងផ្ទៃដីធំទូលាយសម្រាប់ការអភិវឌ្ឍជាដើម។
ក្រៅពីនេះស្ថាបត្យករ អាស៊ាន លោក ឃុយ ពីការ បានបង្ហាញពីគំរូសម្រាប់ទីកន្លែងបណ្តុះបណ្តាលធនធានមនុស្សនៅរាជធានីភ្នំពេញ ,ទីកន្លែងសំណង់សម្រាប់ទីកន្លែងផ្សារភ្ជាប់នឹងធម្មជាតិ នៅខេត្តកំពង់ស្ពឺ និងសំណង់សម្រាប់ទីកន្លែងអេកូទេសចរណ៍ខេត្តកែបជាដើម។
ក្នុងបទបង្ហាញនារសៀលថ្ងៃដដែលនេះស្ថាបត្យករអាស៊ានដ៏ល្បីមួយរូបទៀតគឺ លោក ហ៊ុន ចាន់សាន ក៏បានបង្ហាញពីវិស័យសំណង់តាមតំបន់ទីក្រុង ទីប្រជុំជន ព្រលានយន្តហោះ និងចង្អុលបង្ហាញពីវិស័យសំណង់បែបទំនើប បរិស្ថានស្អាតបរិសុទ្ធ ព្រមទាំងជីវិតរស់នៅប្រកបដោយផាសុខភាពរបស់ពលរដ្ឋ។
ស្ថាបត្យករអាស៊ាន លោក ហ៊ុន ចាន់សាន បានលើកឡើងថា ស្ថាបត្យកម្ម ស្ថាបត្យករ គឺជាមនុស្សរបស់សង្គមជាតិដែលមានកាតព្វកិច្ចបម្រើផលប្រយោជន៍រួមទៅអ្នកដទៃដោយប្រើវិជ្ជាជីវៈ វិទ្យាសាស្ត្រ សិល្បៈក្នុងខ្លួន ទាំងសិល្បៈជាអ្នកជំនួញដើម្បីផលប្រយោជន៍អ្នកដទៃ។
ជាមួយគ្នានេះលោកក៏បាន លើកទឹកចិត្តដល់និស្សិតដែលជាស្ថាបត្យករកម្ពុជាត្រូវតែចេះជំនាញប្រកបដោយសមត្ថភាពខ្ពស់។ លោកបា្រប់ថា ជំនាញស្ថាបត្យកម្មទាមទារឱ្យគេបានឃើញ បានប៉ះ បានប្រើប្រាស់ និងអនុវត្តន៍ផ្ទាល់ដែលធ្វើឱ្យស្ថាបត្យករកាន់តែមានភាពច្នៃប្រឌិត និងគំនិតថ្មីបន្ថែម ។
ដោយឡែកអនុប្រធានក្រុមប្រឹក្សាភិបាលសមាគមស្ថាបត្យករខ្មែរ លោកស្ថាបត្យករ MATTHEW HAYHURST បានលើកក្នុងបទបង្ហាញរបស់លោកផងដែរ ពីព្រលានយន្តហោះក្នុងបណ្តាប្រទេសនីមួយៗទាំងអាស៊ី អឺរ៉ុប និងបណ្តាប្រទេសមួយចំនួនទៀត។
លោកបានបង្ហាញពីសារសំខាន់ក្នុងការច្នៃប្រឌិត និងពិសេសការអភិវឌ្ឍន៍ លើវិស័យស្ថាបត្យកម្ម និងសំណង់ប្រកបដោយភាពរឹងមាំ មានសោភណ្ឌភាព បរិស្ថានស្អាតបរិសុទ្ធ និងប្រកបដោយផាសុខភាពរបស់អ្នកដំណើរ។
គួរបញ្ជាក់ថា កម្ពុជាបានសម្រេចបញ្ចូលជាស្ថាបត្យករ កម្ពុជា ជាង ១០រូប ជាស្ថាបត្យករអាស៊ាន កាលពីដើម ខែ មីនា ឆ្នាំ២០២០។ការបញ្ចូលធនធានស្ថាបត្យករកម្ពុជា ទៅក្នុងសមាជិកស្ថាបត្យករអាស៊ាននេះ គឺដើម្បីធ្វើយ៉ាងណាផ្លាស់ប្តូរចរន្តការងារនៅក្រៅប្រទេស ជាពិសេសការងារសាងសង់នៅក្នុងប្រទេសអាស៊ានទាំង១០៕
ដោយ ៖ ម៉ាដេប៉ូ
