កែច្នៃឫស្សីមកធ្វើជាសម្ភារប្រើប្រាស់ ជួយរកប្រាក់ចំណូលប្រជាសហគមន៍មូលដ្ឋាន
(ភ្នំពេញ)៖ ការបណ្តុះបណ្តាលវិជ្ជាជីវៈកែច្នៃឫស្សី ឱ្យក្លាយទៅជារបស់ប្រើប្រាស់ផ្សេងៗជាផ្នែកមួយលើកស្ទួយសេដ្ឋកិច្ចមូលដ្ឋាន និង ផ្តល់នូវជម្រើសថ្មី នៃមុខរបររបស់ប្រជាពលរដ្ឋសម្រាប់រកចំណូលចិញ្ចឹមជីវិត។
ការកែច្នៃរបស់ធម្មជាតិមួយនេះមិនត្រឹមតែអាចរកចំណូលបានទេ តែវានៅបានជួយថែរក្សារបស់ដូនតាខ្មែរទាំងនេះឱ្យបានជាប់គង់វង្សថែមទៀត។ ដើមឫស្សីទាំងនេះត្រូវបានគេកែច្នៃធ្វើជា វត្ថុអនុស្សាវរីយ៍ និងសម្ភារប្រើប្រាស់ផ្សេងៗដែលមើលទៅស្រស់ស្អាតគួរជាទីជាប់ចិត្ត ។ សម្ភារកែច្នៃទាំងនេះអាចប្រើប្រាស់ប្រចាំថ្ងៃ និងពិសេសគេអាចដាក់តាំង នៅតាមផ្ទះសម្បែង ហាងនានាបានថែមទៀត ។
អ្នកស្រី ម៉ា សុខជា បុគ្គលិកប្រចាំ វិទ្យាស្ថានអន្តរជាតិស្តារជនបទឡើងវិញឬហៅកាត់ IIRR បានប្រាប់ឱ្យដឹងថា តាមរយៈការសហការជាមួយគម្រោង រេដបូក អំឡុងឆ្នាំ២០២៣ ហើយបានធ្វើការសរុប ២១ភូមិគោលដៅក្នុងនេះមានក្រុមផលិតសាប៊ូ ក្រុមផលិតនំ ក្រុមផលិតផ្លែឈើ ក្រុមប្រមូលផលផ្លែឈើ និងក្រុមផលិត ឫស្សីជាដើម ។
អ្នកស្រីប្រាប់ថា ចំពោះក្រុមផលិត និងកែច្នៃឫស្សីនេះជនជាតិពូនង មាន ២ភូមិគោលដៅគឺ ភូមិពូចារ និងភូមិ ពូគង់ ស្ថិតនៅក្នុងឃុំស្រែព្រះ ស្រុកកែវសីមា ខេត្តមណ្ឌលគិរី ។ ប្រជាសហគមន៍ស្ថិតនៅក្នុងក្រុមកែច្នៃឫស្សីនេះ បានប្រមូលយកឫស្សីដែលមានដើមចាស់ៗមកធ្វើការកែច្នៃជាសម្ភារប្រើប្រាស់ផ្សេងៗដូចជា កែវទឹកធំមានដៃ ពែងទឹក ប្រដាប់ដាក់ទៀនក្រអូប កន្រ្តកកំសៀវទឹក ប្រអប់ដាក់ក្រដាសជូតដៃ តម្ពក់ព្យួរខោអាវ ឧបករណ៍បំពងសម្លេង ទូរសព្ទដៃ ប្រដាប់ដាក់ប៊ិច បំពង់ដាក់គ្រឿងធ្វើម្ហូបក្នុងផ្ទះបាយ ថូផ្កា និងសម្ភារជាច្រើនទៀត។
អ្នកស្រីបានពន្យល់ប្រាប់ថា សម្ភារកែច្នៃទាំងនេះ ត្រូវបានលក់លើទីផ្សារ ហើយទទួលបាននូវប្រាក់កម្រៃជាច្រើនដូចជាឧបករណ៍បំពងសម្លេងមួយក្រោយការកែច្នៃគាត់អាចលក់បានក្នុងតម្លៃមួយដើម ១២០០០រៀល ខណៈឫស្សីមួយដើមធំនោះលក់បានត្រឹមតែ ១ម៉ឺនរៀលឬ ២ម៉ឺនរៀលប៉ុណ្ណោះ។ ក្រៅពីនេះដូចជាប្រអប់ក្រដាសលក់មួយបានតម្លៃ ២ម៉ឺនរៀល និងកែវមានដៃមួយ ៥ពាន់រៀល ដែលនេះសុទ្ធសឹងជាចំណូលដល់គ្រួសាររបស់ពួកគាត់។
ជាមួយការផលិតសម្ភារប្រើប្រាស់ទាំងនេះត្រូវបាន អ្នកស្រី ម៉ា សុខជា ប្រាប់ថា បច្ចុប្បន្នត្រូវបានពលរដ្ឋខ្មែរគាំទ្រច្រើនដោយសារជារបស់ខ្មែរផលិតដោយផ្ទាល់ ហើយវាជារបស់ធម្មជាតិដែលជាទីពេញនិយមរបស់ពួកគាត់នាពេលបច្ចុប្បន្ន។
លោក ខៀវ សំណាង ទីប្រឹក្សាផ្នែកលើកម្ពស់ជីវភាពគ្រួសារសហគមន៍មូលដ្ឋានរបស់អង្គការសមាគមអភិរក្សសត្វព្រៃ (WCS) បានឱ្យដឹងថា គម្រោងរេដបូកមានគោលបំណងសំខាន់គឺជួយដល់បងប្អូនកសិករដែលមានចំនួន ២១ភូមិឱ្យមានមុខរបរបង្កើតចំណូល និងមានការងារធ្វើ។ ក្នុងការបង្កើតមុខរបរចិញ្ចឹមមាន់នេះគម្រោងមិនត្រឹមជួយថ្នាំ ចំណី សំណាញ់ និងបង្កើតទ្រុងឱ្យទេនៅជួយក្នុងបច្ចេកទេស ពិធីព្យាបាលមាន់ឈឺដើម្បីឱ្យការចិញ្ចឹមទទួលជោគជ័យទៀតផង ។
ឯកឧត្តម ខ្វែ អាទិត្យា មន្រ្តីអ្នកនាំពាក្យក្រសួងបរិស្ថានថ្មីៗនេះពេលដឹកនាំក្រុមអ្នកសារព័ត៌មានបំពេញទស្សនកិច្ច នៅខេត្តមណ្ឌលគិរី បានឱ្យដឹងថា ៖ ការដាំដំណាំ ការចិញ្ចឹមសត្វ និងពិសេសការផលិតនូវសម្ភារប្រើប្រាស់ពីឫស្សីមិនត្រឹមតែបម្រើលើវិស័យទេសចរណ៍ទេ តែក៏កំពុងជួយលើកស្ទួយជីវភាពរបស់ពួកគាត់ទាំងពេលបច្ចុប្បន្ន និងអនាគត ។
គួរបញ្ជាក់ថា ក្រសួងបរិស្ថាន បានកំពុងធ្វើឱ្យសហគមន៍ មានចំណូលបន្ថែម និងបង្កើតជម្រើសថ្មី សម្រាប់ការប្រកបមុខរបរចិញ្ចឹមជីវិត ដោយផ្តល់ចំណេះដឹង ជំនាញ និងមុខរបរថ្មី ក្នុងនោះរួមមាន ការចិញ្ចឹមសត្វ ការដាំដំណាំរួមផ្សំផ្សេងទៀត សម្រាប់ប្រើប្រាស់ប្រចាំថ្ងៃផង និងសម្រាប់លក់នៅលើទីផ្សារផងដែរ ព្រមទាំងជួយរៀបចំបង្កើតជាអេកូទេសចរណ៍ នៅក្នុងតំបន់សហគមន៍ថែមទៀត ៕
ដោយ ៖ ម៉ាដេប៉ូ
