(ភ្នំពេញ)៖ ក្រសួងពាណិជ្ជកម្មនឹងរៀបចំ «ពិព័រណ៍​ពា​ណិជ្ជ​​កម្មកម្ពុជា (CTExpo)» ដែលជាព្រឹត្តិការណ៍​ពិ​ព័រណ៍​ដ៏ធំមួយប្រចាំឆ្នាំ ក្នុងគោលបំណងតាំងបង្ហាញ​ផលិតផលដែលមានគុណភាពខ្ពស់របស់កម្ពុជា ទំនិញ​នាំចេញ-នាំចូលសំខាន់ៗ និង សេវាកម្មដែលមាន​លក្ខណៈ​ពិសេសរបស់បណ្តាអ្នកផ្គត់ផ្គង់​ជុំវិញពិភព​លោក។ ពិព័រណ៍នេះ ធ្វើឡើងក្នុងគោលបំណង ជំរុញ​សកម្មភាពពាណិជ្ជកម្មកម្ពុជា និងធ្វើឱ្យកាន់​តែប្រសើរ​ឡើងនូវបរិយាកាសធុរកិច្ច និងវិនិយោគ ព្រមទាំងជំរុញ ការនាំចេញ-នាំចូល និងការផ្សារភ្ជាប់ទំនាក់ទំនងពា​ណិជ្ជ​កម្ម​រវាងអ្នកតាំងពិព័រណ៍ក្នុងស្រុកនិងអន្តរជាតិ អ្នកទស្សនា ពិព័រណ៍ និងអ្នកចូលរួមពិព័រណ៍។

ថ្លែងក្នុងសន្និសីទព័ត៌មាន ស្ដីពី ការរៀបចំ «ព្រឹត្តិការណ៍ពិព័រណ៍ពាណិជ្ជកម្មកម្ពុជាលើកទី១៨ ក្រោមមូលបទ “យុគសម័យថ្មីនៃពាណិជ្ជកម្ម៖ បង្កើនកិត្យានុភាពផលិតផលក្នុងស្រុក»នៅរសៀលថ្ងៃទី២១វិច្ឆិកានេះ ឯកឧត្តម ប៉ែន សុវិជាតិ រដ្ឋលេខាធិការ​និងជាអ្នកនាំពាក្យក្រសួងពាណិជ្ជកម្ម មានប្រសាសន៍ថា ពិព័រណ៍ពាណិជ្ជកម្មកម្ពុជានេះនឹងប្រព្រឹត្តិទៅរយៈពេល៤ថ្ងៃ ចាប់ពីថ្ងៃទី៤ ដល់ ថ្ងៃទី៧ ខែធ្នូ ឆ្នាំ២០២៥ នៅ​មជ្ឈមណ្ឌលភីអេច ល្ខោនបាល បុរីប៉េងហួតបឹង​ស្មោ រាជធានីភ្នំពេញ ដោយមានបណ្តាក្រុមហ៊ុន​ចូលរួមដាក់​តាំងពិព័រណ៍ផលិតផលប្រមាណ ២៥០ស្តង់ រំពឹងថានឹ​ងមានអ្នកចូលរួមទស្សនាពិព័រណ៍នេះប្រមាណ ៤ម៉ឺន​នាក់ ។

សូមរំលឹកថា“ពិព័រណ៍ពាណិជ្ជកម្មកម្ពុជា ដើមឡើយ​មាន​ឈ្មោះថា «ពិព័រណ៍ផលិតផលខ្មែរ និងទំនិញនាំ​ចេញ-នាំចូល ដែលបានរៀបចំឡើងដោយជោគជ័យ​ចំនួន ១៧​លើកមកហើយ។ ការផ្លាស់ប្តូរឈ្មោះ​ពិព័រណ៍​នេះ​ក្នុងគោលបំណងធ្វើឱ្យ ពិព័រណ៍កាន់តែមាន​ភាព​សាមញ្ញ ឆ្លុះបញ្ចាំងពី គោលគំនិតនៃឧត្តមភាព និង​ប្រកបដោយ​ភាពទាក់ទាញក្នុងទីផ្សារសម័យថ្មី ដែល​មានភាព​រស់​រវើក និងការយកចិត្ត ទុកដាក់លើ​គុណ​ភាពខ្ពស់ និង​​ភាព​សាមញ្ញ។ ជាមួយនឹងការបង្កើត​កិត្តិនាមថ្មី និង​កាន់​តែទំនើប ក្រសួងពាណិជ្ជកម្ម នឹង​ផ្សារភ្ជាប់ការតាំង​ពិព័រណ៍​ថ្មីនេះជាមួយនឹង​គោល​គំនិត​ច្នៃប្រឌិតថ្មី ដើម្បី​ធ្វើឱ្យពិព័រណ៍ដ៏ធំនេះកាន់តែមានភាព រស់រវើក បង្ហាញ​នូវលក្ខណៈពិសេសពាណិជ្ជកម្ម និងអត្តសញ្ញាណ​វប្ប​ធម៌​ក្នុងយុគសម័យទំនើប៕

អត្ថបទ ៖ ង៉ាន់ ទិត្យ
រូបភាព ៖ រិន រចនា